သျှမ်းပြည် မူဆယ်ခရိုင် မူဆယ်မြို့နယ်အတွင်းတွင် အမည်မသိ လူတစ်စုသည် မြန်မာငွေကျပ်သိန်း ၂၅၀ ကို ဆက်ကြေးအဖြစ် ပေးဆောင်ရန် ဒေသခံ ဆိုင်ပိုင်ရှင်တစ်ဦးထံ ခြိမ်းခြောက်တောင်းခံနေကြောင်း စုံစမ်း သိရသည်။

ပြီးခဲ့သည့် မတ်လ ၂၅ ရက် နံနက်ပိုင်း အချိန်တွင် အမည်မသိ လူတစ်စုသည် မူဆယ်မြို့၊ တောင်ရပ်ကွက်ရှိ ဆောက်လုပ်ရေး ပစ္စည်းများ ရောင်းချသည့် ဆိုင်တစ်ခုကို Viber ဖုန်းနံပါတ်မှ တစ်ဆင့် ဆက်ကြးအဖြစ် မြန်မာငွေ ကျပ်သိန်း ၂၅၀ ကို ၎င်းတို့ Kpay နံပါတ်ထံ လွှဲပေးရန် ခြိမ်းခြောက်တောင်းဆိုမှု ရှိခဲ့ကြောင်း သတင်းသိရသည်။

“Viber ဖုန်းနံပါတ်ကို ဘယ်ကနေရလာလဲ မသိဘူး၊ သူတို့ပြောတာက ရန်ပုံငွေပေးဖို့တဲ့၊ သူတို့က ဘယ်သူတွေလဲ၊ ဘယ်တပ်ဖွဲ့ကလဲဆိုတာတွေလည်း မေးလို့မရဘူး၊ မပေးရင် ဆိုင်ကို ဗုံးခွဲမယ် ဆိုပြီး ခြိမ်းခြောက် ပြောဆို သွား တယ်” ဟု ခြိမ်းခြောက်ခံရသည့် ဆိုင်ရှင် နှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ထို့အပြင် ငွေကျပ် သိန်း ၂၅၀ ဆက်ကြေးတောင်းခံမှု နှင့် ပတ်သက်ပြီး ဆိုင်ပိုင်ရှင်များ အနေဖြင့် ကျေနပ်သည် ဖြစ်စေ မကျေနပ်သည် ဖြစ်စေ ငွေကြေးပေးသွင်းရမည် ဖြစ်ကြောင်း နှင့် မပေးဆောင်ပါက ဆိုင်ကို ဗုံးဖြင့် ဖောက်ခွဲ ပစ်မည်ဟု ခြိမ်းခြောက်ပြောဆိုခဲ့ကြောင်း ဒေသခံများက ပြောသည်။

တောင်းခံသည့် ငွေကြေးပမာဏ အပြည့်အစုံကို မတ်လ ၂၅ ရက်နေ့ မွန်းလွဲပိုင်း ၂ နာရီ နောက်ဆုံးထား ပေးဆောင်ရန် နှင့် ပျက်ကွက်ပါက ဆိုင်ကို ဖောက်ခွဲပစ်မည် ဖြစ်ကြောင်း ဒေသခံများက ဆက်ပြောသည်။

“ဆိုင်ကို ဗုံးနဲ့ ဖောက်ခွဲမယ်ဆိုပြီးတော့ လက်နက်ဗုံး ရဲ့ ပုံနဲ့အတူ ပို့ခဲ့တယ်၊ သူတို့ကို မပေးရင်၊ အရေးမလုပ်ပဲ အကြောင်းမပြန်ခဲ့ရင်လည်း ဆိုင်ကို ဗုံးခွဲမယ်တဲ့၊ အခုကလည်း ဆိုင်ရှင်တွေဘက်က ငွေကြေးအခက်အခဲ ရှိနေ တော့ သူတို့တောင်းထားတဲ့ အတိုင်း မပေးရသေးဘူးလို့ သိရတယ်၊ဆိုင်ကိုလာပြီး ဗုံးခွဲမှာလည်းကြောက်တယ်” ဟု အထက်ပါ ပုဂ္ဂိုလ်က ဆက်ပြောသည်။

လက်ရှိတွင် ဆိုင်ရှင်မိသားစုများသည် လုံခြုံရေး အတွက် စိုးရိမ်ပူပန်မှုများ ရှိသလို ဆိုင်ဖောက်ခွဲခံရမှာလည်း စိုးရိမ်နေကြောင်း သိရသည်။

စစ်တပ်မှ နိုင်ငံတော် အာဏာသိမ်းပြီးနောက်ပိုင်း မူဆယ်မြို့ပေါ် အမည်မသိလက်နက်ကိုင်များ၏ ခြိမ်းခြောက် ငွေကြေး တောင်းဆိုမှုများသည် ငါးကြိမ်ထက်မနည်းရှိနေပြီး တချို့က သေနတ်ကျည်ဆန်ပြကာ ခြိမ်းခြောက် တောင်းဆိုမှု ပြုလုပ်ခဲ့ကြောင်းလည်း သိရသည်။

၂၀၂၂ ခုနှစ် ဇူလိုင်တွင် မင်္ဂလာမူဆယ်မြို့သစ်ရှိ ကိုးထပ်တိုက် အဆောက်အအုံတွင် ဖွင့်လှစ်ထားသည့် တရုတ် လူမျိုးကို ပစ်မှတ်ထားပြီး အွန်လိုင်းမှငွေလိမ်သည့် လုပ်ငန်း စီးနင်းခံရသော်လည်း လက်ရှိ ဒေသအတွင်းတွင် ခြိမ်းခြောက် ငွေတောင်းမှုများ၊ အချင်းချင်းပစ်ခတ်တိုက်ခိုက်မှုများက ရှိနေဆဲ ဖြစ်ကြောင်း စုံစမ်းသိရသည်။

မူဆယ်မြို့ စွမ်စော်ရပ်ကွက်အတွင်းတွင် လောင်းကစားဝိုင်းများကို ၂၄ နာရီ ပိတ်ရက်မရှိ ပေါ်တင် ပြုလုပ်နေပြီ စစ်ကောင်စီ တပ်ဖွဲ့ဝင်များ၊ ပြည်သူ့စစ်အဖွဲ့များ ပါဝင်ပတ်သက်နေသည်ဟုလည်း မူဆယ်ဒေသခံများ ပြောပြ ချက်အရ သိရသည်။

မူဆယ်မြို့နယ်သည် စစ်ကောင်စီ တပ်ဖွဲ့အပြင် ၎င်းတို့၏ လက်အောက်ခံ တရုတ်လူမျိုးများ ပါဝင်နေသည့် ပြည်သူ့စစ်တပ်ဖွဲ့၊ တိုင်းရင်းသား လက်နက်ကိုင်တပ်ဖွဲ့တို့မှ သွားလာလှုပ်ရှားနေသည့်နေရာဖြစ်သည်။