နေပြည်တော် – ပင်လောင်းမြို့ထိ လမ်းဧရိယာ တိုးချဲ့ဖောက်လုပ်သွားမည်ဖြစ်သဖြင့် မလွှတ်ကင်းသည့် နေအိမ်များကို စစ်ကောင်စီမှ ဖယ်ရှားခိုင်းကြောင်း စုံစမ်းသိရသည်။
ပြီးခဲ့သည့် မတ်လဆန်းပိုင်းတွင် စစ်ကောင်စီ လက်အောက်ခံ လမ်းဦးစီးဌာနက လမ်းနယ်အတွင်း ဖယ်ရှားပေးရန် အကြောင်းနှင့် ပတ်သက်ပြီး စာစောင်ထုတ်ပြန်ခဲ့ကာ နေပြည်တော် ကင်းသာလမ်းခွဲကနေ ကိုးကွေ့၊ လိန်းလီ ပင်လောင်း လမ်းအထိ လမ်းဗဟိုမှ တစ်ဖက်လျှင် (၇၅) ပေထိ လမ်းဧရိယာ တိုးချဲ့ ဖောက်လုပ်သွားမည် ဖြစ်ကြောင်း သိရသည်။
အဆိုပါ လမ်းဧရိယာကို တိုးချဲ့ဆောက်လုပ်မည် ဖြစ်သဖြင့် သတ်မှတ်ထားသည့် လမ်းဧရိယာထက် မလွှတ်သည့် နေအိမ်များကို စစ်တပ်မှ ဖယ်ရှားခိုင်းကြောင်း၊ ဖယ်ရှားခြင်း မရှိပါက လမ်းမကြီးများ၏ ဉပဒေအရ အမြန်ဆုံး အရေးယူဆောင်ရွက်သွားမည်ဟု ဆိုသည်။
“ခုက ကိုးကွေ့နား ရောက်ပြီလို့ ပြောတယ်။ လမ်းဘေးက မလွတ်တဲ့ အိမ်တွေ၊ ဆိုင်တွေ ဖယ်ရမှာပေါ့။ ကျမတို့ ရွာမှာတော့ ဆယ်အိမ်ကျော်ကျော်တော့ ရှိမယ်။ သူတို့ အိမ်ရှေ့မှာ ဆိုင်ခန်းတွေလုပ်ပြီး အခန်းငှားစားတာ။ သူတို့ တကယ်ဖောက်လာရင်တော့ အခိုင်အမာ ဆောက်ထားတဲ့ နေအိမ်တွေ ပြန်ဖျက်ရမှာ ဒုက္ခရောက်ကုန်မှာပေါ့ “ ဟု ပေါင်းလောင်းဒေသခံ အမျိုးသမီးတစ်ဦး က ထပ်လောင်းပြောသည်။
စစ်ကောင်စီသည် နေပြည်တော် ကင်းသာလမ်းခွဲမှ ပင်လောင်းအထိ လမ်းဧရိယာ တိုးချဲ့ဖောက်လုပ်သွားမည် ဖြစ်ပြီး အဆိုပါ လမ်းဧရိယာကို အမှန်တကယ် တိုးချဲ့ဖောက်လုပ်သွားမည်ဆိုပါက ပေါင်းလောင်းရွာမှ နေအိမ် ၁၀ လုံးခန့်က ရွှေ့ပြောင်းခံရမည်ဖြစ်ကြောင်း သိရသည်။
နေပြည်တော် – ပင်လောင်းလမ်းသည် ယခင် အစိုးရလက်ထက် ဖောက်လုပ်ခဲ့ပြီး သျှမ်းပြည် နှင့် ကယားပြည် (ကရင်နီ) နယ်စပ် စစ်တပ်မှ ထောက်ပို့လမ်းကြောင်း ဖြစ်ကြောင်း သိရသည်။
