ထိုင်းရောက် မြန်မာရွှေ့ပြောင်း အလုပ်သမားများ နိုင်ငံရေး နှင့် ပတ်သက်သူများကို နိုင်ငံကူးလက်မှတ် CI လုပ်မပေး ဟုဆို

ထိုင်းရောက် မြန်မာရွှေ့ပြောင်း အလုပ်သမားများကို ကရင်နီ (ကယား) မှတ်ပုံတင် ကိုင်ဆောင်ထားသူ၊ ပြည်သူ့ကာကွယ်ရေးတပ်ဖွဲ့ PDF နှင့် ချိတ်ဆက်သူများဖြစ်ပါက နိုင်ငံကူးလက်မှတ် CI မလုပ်ပေးကြောင်း စုံစမ်းသိရသည်။

ပြီးခဲ့သည့် (ဖေဖော်ဝါရီလ) ပိုင်းမှစပြီး ထိုင်းရောက် မြန်မာရွှေ့ပြောင်း အလုပ်သမားကို နိုင်ငံရေးအကြောင်း နှင့် ပတ်သက်ပြီး ကယားမှတ်ပုံတင် ၂/(နိုင်) ကိုင်ဆောင်သူများ အပါအဝင် PDF နှင့် ချိတ်ဆက်မှုရှိထားသူများ၊ လူမှုကွန်ရက် စာမျက်နှာ ပရိုဖိုင်းတွင် (လက်သုံးချောင်း) ထောင်ထားသူများ စသည့် နိုင်ငံရေးအကြောင်း နှင့် ပတ်သက်မှုရှိထားလျှင် နိုင်ငံကူးလက်မှတ်၊ မည်သူမည်ဝါဖြစ်ကြောင်း သက်ခံလက်မှတ် CI စာအုပ်ကို မလုပ်ပေးတော့ကြောင်း နိုင်ငံကူးလက်မှတ် ပြုလုပ်ပေးသူများက သျှမ်းသံတော်ဆင့်ကို ပြောဆိုလိုက်သည်။

CI သည် ထိုင်းနိုင်ငံရောက်နေသည့် အထောက်အထားမဲ့ မြန်မာလုပ်သားများကို မြန်မာသံရုံးက ထုတ်ထားပေးသော စာအုပ်ဖြစ်သည်။

“ အရင်က CI လုပ်ရင် မှတ်ပုံတင်မရှိလည်း လုပ်လို့ရတယ်။ အိမ်ထောင်စု ဇယားသာရှိရင် အဲ့ဒီအိမ်ထောင်စု ဇယားထဲက နာမည်တွေကြည့်တယ်၊ စစ်ဆေးပြီး မေးတယ်။ အခုက မှတ်ပုံတင်မရှိရင် လုပ်မရတော့ဘူး။ မှတ်ပုံတင်က ကယားဘက်ကလာရင် လုံးဝကို မလုပ်ပေးဘူး။ သူတို့က လူကိုကြည့်ပြီး နိုင်ငံရေးအကြောင်း နဲ့ ပတ်သက်မှုရှိတဲ့သူလား ကြည့်တယ်။ ပတ်သက်လာရင်တော့ ဖုန်းတွေပါ စစ်ဆေးတယ် “ ဟု နိုင်ငံကူးလက်မှတ် လုပ်ဆောင်ပေးနေသူ စိုင်းမိန်း (အမည်လွှဲ) ကပြောသည်။

အဆိုပါ နိုင်ငံကူးလက်မှတ် CI လုပ်မပေးခြင်းကြောင့် ထိုင်းရောက် မြန်မာရွှေ့ပြောင်း အလုပ်သမားသည် အလုပ်ရှာဖွေခြင်း၊ အလုပ်လုပ်ကိုင်ခြင်း၊ ခရီးသွားလာခြင်း နှင့် အလုပ်ပြောင်းရွှေ့ခြင်းတွင် အခက်အခဲရှိနေကြောင်း သိရသည်။

ထို့အပြင် သျှမ်း – ကယား (ကရင်နီ) နယ်စပ် ဆီဆိုင်မြို့နယ်အတွင်း နေထိုင်သူ ရွှေ့ပြောင်းအလုပ်သမားတစ်ဦး သည်လည်း စစ်ကောင်စီတပ်ဖွဲ့မှ ဝရမ်းထုတ် စာရင်းထဲပါရှိနေသူဖြစ်သဖြင့် အဆိုပါ နိုင်ငံကူးလက်မှတ် CI ကဒ် လုပ်ဆောင်ထားချိန်မှာ ၁ နှစ်နီးပါးရှိပြီဖြစ်သော်လည်း မရသေးကြောင်း စိုင်းဖေမြင့် (အမည်လွှဲ) က ပြောသည်။

“ ပိုက်ဆံကတော့ သောင်းကျော်ကုန်ထားပြီ။ ကျနော်တုန်းက ဝရမ်းထုတ်ခံထားရတာဆိုတော့ အရင်က သံရုံး နဲ့ ချိတ်ဆက်ရမယ့်ဟာဆို မလုပ်ရဲဘူး။ မလုပ်ရင်လည်း နေလို့က အဆင်မပြေဘူး။ အခု ထိုင်းကလူ နဲ့ ချိတ်ဆက်ပြီးလုပ်တာ တစ်နှစ်တောင်ပြည့်တော့မယ် မရသေးဘူး။ သက်တမ်းက တိုးနေရပြီ “ ဟု စိုင်းဖေမြင့်က ပြောသည်။

ထိုကြောင့် မြန်မာရွှေ့ပြောင်းအလုပ်သမား နေထိုင်သည့် တိုက်ခန်းပေါ်မှ ထိုင်းအာဏာပိုင် ဝန်ကြီးဌာန ရဲတပ်ဖွဲ့က ဝင်ရောက်စစ်ဆေးလျှင် မြန်မာရွှေ့ပြောင်းအလုပ်သမားများ ဖမ်းဆီးခံနေရကြောင်း ၎င်းကဆက် ပြောသည်။

“ ထိုင်းအစိုးရလည်း မြန်မာနိုင်ငံ အခြေအနေကို သိနေတာပဲလေ။ မြန်မာလူထုအပေါ် နိုင်ငံကူးလက်မှတ် တင်မဟုတ်ဘဲ အလုပ်သမားကဒ်တွေ အစ ငဲ့ညှာပေးစေချင်တယ် “ ဟု ၎င်းက ထပ်လောင်းပြောသည်။

ယင်း နိုင်ငံကူးလက်မှတ် CI စာအုပ် သက်တမ်းကုန်မည့် အလုပ်သမားအတွက် ဖေဖော်ဝါရီလမှ မေလအထိ ၃ လ ဆက်လက်နေထိုင် အလုပ်လုပ်ခွင့်ပြုခဲ့ပြီး မေလ ၁၅ ရက် နောက်ဆုံးထား သက်တမ်းတိုးရမည် ဖြစ်ကြောင်း မြန်မာသံရုံးမှ ကြေညာထားသည်။