သျှမ်းပြည် ကျောက်မဲခရိုင် သီပေါမြို့နယ် စံဖိတ်ကျေးရွာရှိ မီးလောင်သွားသည့် ဘုန်းကြီးကျောင်း ပြန်ဆောက်ရန် လောင်းကစားဝိုင်းဖြင့် ရန်ပုံငွေ ရှာမည်ဟု သတင်း သိရှိရသည်။
လောင်းကစားဝိုင်းသည် ယခုနှစ် မတ်လဆန်းပိုင်းတွင် မီးလောင်သွားသည့် စံဖိတ်ဘုန်းကြီးကျောင်းဝန်းထဲ၌ ကုန်းကင်း၊ လေးကောင်ဂျင်၊ ဖဲဝိုင်းများ စသည့် လောင်းကစားဝိုင်းများ အပါအဝင် လောင်းကစားဖွင့်လှစ်ဖို့ရန် အတွက်လည်း စစ်ကောင်စီမှ ခွင့်ပြုမည်ဟု သတင်းထွက်ပေါ်နေကြောင်း သီပေါမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီလကုန်ပြီးမှ စလုပ်မယ်လို့တော့ ပြောတယ်။ သီပေါမှာတော့ အများအားဖြင့် ကုန်းကင်း၊ လေးကောင်ဂျင်၊ ဖဲဝိုင်းတွေ ပါတယ်။ ဒီက လောင်းကစားဝိုင်း ဖွင့်ဖို့အတွက်လည်း စစ်ကောင်စီက ခွင့်ပြုထားတယ်။ တစ်လအတွင်း လုပ်သွားမယ် “ ဟု ၎င်းက ပြောသည်။
အဆိုပါ လောင်းကစားဝိုင်းကို သီပေါ၊ လားရှိုး၊ ကျောက်မဲ နှင့် နမ့်လန်မှ စီးပွားရေး သူဌေးပိုင်ရှင် (လောင်းကစား ဒိုင်) များက ဦးစီးပြီး ပြုလုပ်ကာ စစ်ကောင်စီတပ်ဖွဲ့ အပါအဝင် လက်နက်ကိုင်တပ်ဖွဲ့များ နှင့် ကျောင်းထိုင် ဆရာတော်ကိုပါ အခွန်ဆောင်ထားကြောင်းလည်း သိရသည်။
“ လောင်းကစားဝိုင်း လုပ်တဲ့သူတွေက သီပေါ၊ လားရှိုး၊ ကျောက်မဲ နဲ့ နမ့်လန်က ဒိုင်တွေပါတယ်။ စစ်ကောင်စီကော၊ TNLA ကော၊ SSPP တွေကော အခွန်ဆောင်ထားတယ်။ ဘယ်လောက်ဆောင်ထားလဲတော့ သေချာမသိဘူး။ ဒါပေမယ့် ကျောင်းထိုင်ဆရာတော်ကိုတော့ ၅ ရက် ကနေ ၁၀ ရက်ကြားအထိ သိန်း ၃၀ ပေးလှူထားတယ်။ ဆရာတော် ကိုယ်တိုင်လည်း ဒီ လောင်းကစားလုပ်ဖို့ ခွင့်ပြုထားတယ် “ ဟု ၎င်းက ပြောသည်။
ထို့အပြင် မီးလောင်သွားသည့် စံဖိတ် ဘုန်းကြီးကျောင်းဆောက်ရန် ရန်ပုံငွေအတွက် လောင်းကစားဝိုင်း ဖွင့်လှစ်ပြီး ရှာရန် မသင့်တော်ကြောင်း သီပေါမြို့ ဒေသခံ အသက် ၃၀ နှစ် အမျိုးသားတစ်ဦးက ပြောသည်။
“ ကျောင်းအသစ်ဆောက်ဖို့ ရန်ပုံငွေကို လောင်းကစားဝိုင်း လုပ်ပြီး ရှာမယ်ဆိုတာက မသင့်တော်ဘူး။ မိုက်လည်း မမိုက်ဘူး။ ဦးထိပ်ထားပြီး တင်တဲ့ငွေလည်း မဟုတ်ဘူး။ မျက်ရည်၊ မျက်ခွက် နဲ့ ရလာတဲ့ ငွေတွေကို ကျောင်းဆောက်မယ်ဆိုတော့ မြဲမှာမဟုတ်ပါဘူး “ ဟု ၎င်းက အမျိုးသားက ပြောသည်။
ပြီးခဲ့သည့် ဖေဖော်ဝါရီ ၁၃ ရက် ည ၁၀ နာရီဝန်းကျင်တွင် စံဖိတ်ကျေးရွာမှ ဘုန်းကြီးကျောင်း ဘုရားမီးပူဇော်ရာကနေ တစ်ဆင့် မီးလောင်မှုဖြစ်ပွားခဲ့ပြီး အသက် ၁၀ နှစ်အရွယ် ကိုရင်လေးအပါအဝင် ကျောင်းဆောင်တစ်လုံး မီးလောင်သွားပြီး ဆုံးရှုံးမှုမှာ ၆၅ သိန်းရှိခဲ့ကြောင်း သိရသည်။
စစ်တပ်မှ နို်ငငံတော် အာဏာသိမ်းပြီး ၂ နှစ်ကာလအတွင်း သျှမ်းပြည်တွင် ပြုလုပ်သည့် ပွဲတိုင်းတွင် စစ်ကောင်စီမှ လောင်းကစားဝိုင်းများ ပေါ်ပေါ်ထင်ထင် ထည့်သွင်းလာမှုကြောင့် အိမ်ထောင်ရေး ပြိုကွဲခြင်း၊ ခိုးဆိုးလုယက် ဖြစ်ပွားခြင်း နှင့် အိမ်တွင်းဖောက်ခံရမှုမှာလည်း ဖြစ်ပွားနေကြောင်း သိရသည်။
