သျှမ်းပြည် ချင်းရွှေဟော်မြို့ရှိ မြန်မာ – တရုတ် နယ်စပ် ကုန်သွယ်ရေး လမ်းကြောင်း ဖြစ်သည့် ချင်းရွှေဟော်ဂိတ် လမ်းကြောင်းတွင် ယာဥ်ကြောပိတ်ဆို့မှု နေ့စဥ်နီးပါး ရှိနေကြောင်း သတင်းသိရသည်။

ပြီးခဲ့သည့် ဖေဖော်ဝါရီလ ၂၃ ရက်နေ့တွင် ချင်းရွှေဟော်ဂိတ်ကို မြန်မာ – တရုတ် နှစ်ဖက်နိုင်ငံ သဘောတူ ညီချက်ဖြင့် အဝင်အထွက် ခွင့်ပြုကာ ပြန်လည် ဖွင့်လှစ်ခဲ့ပြီးနောက် ယခုလို ယာဥ်ကြောပိတ်ဆို့မှုများ ဖြစ်ပေါ်လာရခြင်းဖြစ်ကြောင်း ကုန်တင်ကားမောင်းသည့် ကားသမား တစ်ဦးက သျှမ်းသံတော်ဆင့်ကို ပြောသည်။

“ယာဥ်ကြောပိတ်ဆို့မှု ဖြစ်တာက တစ်ပတ်ကျော်ကျော် ဖြစ်နေပြီ၊ အခွန်ကောက်တဲ့ နေရာမှာ ယာဥ်တွေကို တားပြီးတော့ ပိုက်ဆံကောက်တယ်လေ၊ အဲ့လိုတွေကြောင့် ယာဥ်တွေက ကြာပြီးတော့ နောက်ကကားတွေ ကျော်တက်လည်းမရ ဖြစ်ပြီး ယာဥ်ကြောပိတ်ဆို့မှုတွေ ဖြစ်တာ” ဟု ချင်းရွှေဟော် နယ်စပ်ကားမောင်းသည့် ကားသမားတစ်ဦးက သျှမ်းသံတော်ဆင့်ကို ပြောသည်။

အဆိုပါ ချင်းရွှေဟော်ဂိတ်သည် ဇန်နဝါရီလ (၁၇) ရက်တွင် မြန်မာနိုင်ငံဘက်မှ ကြံတင်ယာဉ် မောင်းများ ကို တရုတ်ပြည်သူ့သမ္မတနိုင်ငံ ယူနန်ပြည်နယ် ကိန်းမခရိုင် မိန့်တိန်မြို့ရှိ နမ့်ဟွာသကြားစက်ရုံသို့ တိုက်ရိုက် မောင်းနှင်ခွင့်ပြုခဲ့ပြီး ဖေဖော်ဝါရီလ (၂၃)ရက်နေ့တွင် နှစ်နိုင်ငံ လူအဝင်/အထွက် အတွက် ပြန်လည် ဖွင့်လှစ်ခဲ့ခြင်း ဖြစ်သည်။

လက်ရှိ ယာဥ်ကြောပိတ်ဆို့မှု နှင့် ပတ်သက်ပြီး အခွန်ကောက်သည့် ဌာနဆိုင်ရာ ဝန်ထမ်းများ၏ လုပ်ငန်းပိုင်း ကျွမ်းကျင်မှု နှင့် လူအင်အား လုံလောက်မှု မရှိခြင်းတို့ ဖြစ်ရကြောင်းလည်း အထက်ပါ ကားသမားက ဆက်ပြောသည်။

“လမ်းက နဂိုကတည်းက ကျဥ်းပါတယ်၊ တွဲကားမောင်းရင် မျက်နှာချင်းဆိုင်လာတဲ့ ကားကို ရှောင်နိုင်ဖို့က မလွယ် ဘူး၊ ဒါကြောင့် ကားသေးတွေက လမ်းဘေးဆင်းပေးရတယ်၊ ပြီးတော့ အခွန်ကောက်တဲ့ လူတွေကလည်း လူနည်း လို့လား ဘာကြောင့်လား မသိဘူး၊ ကားတစ်စီး တစ်စီးကို တော်တော်ကြာတယ်” ဟု အထက်ပါ ကားသမားက ပြောသည်။

ယင်းကဲ့သို့ ယာဥ်ကြောပိတ်ဆို့မှု ဖြစ်နေခြင်း နှင့် ပတ်သက်ပြီး ကားမောင်းသမားများ အတွက် အချိန်နှောင့်နှေးမှု ဖြစ်ပေါ်စေပြီး အချို့သီးနှံ့များက စျေးနှိမ်ခံရ နစ်နာမှုများ ရှိနေကြောင်းလည်း ၎င်းက ဆိုသည်။

ချင်းရွှေဟော်ဂိတ်မှ တင်ပို့နေသည့် မြန်မာပြည်ဘက်မှ ကုန်ပစ္စည်းများ အနေဖြင့် ပြောင်း၊ ကြံ၊ ရော်ဘာ၊ ဖရဲသီး နှင့် တချို့သော အစားအစာ ပစ္စည်းများ ဖြစ်ကြကြောင်းလည်း သိရသည်။