Sunday, May 26, 2024

စစ်ကောင်စီ ဦးစီးပြုလုပ်သည့် ကျိုင်းတုံဟော်နန်း ၆၀ ရာခိုင်နှုန်း ဆောက်လုပ်ပြီးစီးနေ

Must read

သျှမ်းပြည် ကျိုင်းတုံခရိုင် ကျိုင်းတုံမြို့တွင် စစ်ကောင်စီမှ ဦးစီးပြုလုပ်သည့် ဟော်နန်းအသစ် ၆၀ ရာခိုင်နှုန်း ဆောက်လုပ်ပြီးစီးနေပြီဖြစ်ကြောင်း စုံစမ်းသိရှိရသည်။

photo by – Ko Hom ကျိုင်းတုံဟော်နန်း ပုံစံ

ပြီးခဲ့သည့် ၂၀၂၂ ခုနှစ် ဇွန်လ ၂၆ ရက်နေ့မှစပြီး ကျိုင်းတုံမြို့ ရပ်ကွက် (၅) နောင်တုံရေကန် အနီးရှိ စကိတ်ကွင်း အဟောင်းတွင် စစ်ကောင်စီမှ ဦးစီးပြီး သမိုင်းဝင် အမွေအနှစ် ထိန်းသိမ်းစောင့်ရှောက်ရေးအဖွဲ့များ ပူးပေါင်း၍ ဟော်နန်း အသစ်ကို စတင်ဆောက်လုပ်ခဲ့ခြင်း ဖြစ်သည်။

လက်ရှိ ကျိုင်းတုံဟော်နန်းအသစ်သည် ၆၀ ရာခိုင်နှုန်းခန့် ဆောက်လုပ်ပြီးစီးနေပြီ ဖြစ်ကြောင်း သမိုင်းဝင် အမွေအနှစ် ထိန်းသိမ်းစောင့်ရှောက်ရေးအဖွဲ့ ကော်မတီဝင် စိုင်းဆမ်တစ်ဆေက သျှမ်းသံတော်ဆင့်ကို ပြောသည်။

“ အပြင်ကတော့ ပြီးသလောက် ဖြစ်နေပြီ။ ခေါင်းမိုး မိုးဖို့ဘဲ လိုတော့တယ်။ ဘာအရောင် နဲ့ မိုးမယ်လို့ စဉ်းစားပြီး ဆွေးနွေးနေတာပေါ့။ ၁၀၀ ရာခိုင်နှုန်းမှာ ၆၀ ရာခိုင်နှုန်းလောက်တော့ ပြီးစီးနေပြီ။ ဆောက်လည်း ဆောက်နေတုန်းပါ “ ဟု ၎င်းက ပြောသည်။

photo by – Ko Hom ကျိုင်းတုံဟော်နန်း ပုံစံ

အဆိုပါ ဟော်နန်းဆောက်လုပ်ဖို့ရန်အတွက် အသုံးပြုစရိတ်မှာ သိန်းပေါင်း (၄၀,၀၀၀) ကုန်ကျမည်ဖြစ် ကြောင်းလည်း သိရသည်။

ထို့အပြင် ဟော်နန်းအသစ် ဆောက်လုပ်ပြီးသွားပါက ပျောက်ဆုံးနေသည့် သမိုင်းဝင် သျှမ်းစော်ဘွားများ၏ အမွေအနှစ် ပြန်လည်ရှာဖွေရေး ကော်မတီအသစ်ကို ဖွဲ့စည်းမည်ဖြစ်ကြောင်း၊ သမိုင်းဝင် အမွေအနှစ်များကို ပြန်လည်ထိန်းသိမ်း သွားမည်ဖြစ်ကြောင်းလည်း သိရသည်။

“ ဒီက အမွေအနှစ်တွေ ထိုင်းရောက်နေတဲ့သူတွေ ပြန်ရှာဝယ်ပြီး ပို့လာပေးမှရမယ်။ ဒီက အမွေအနှစ်တွေကို ထိုင်းမှာသွားရောင်းခဲ့ပြီးပြီ။ ဒါတွေကို ထိုင်းရောက်နေတဲ့ သျှမ်းလူမျိုးတွေ စုပေါင်းပြီး သျှမ်းစော်ဘွားရဲ့ သမိုင်းဝင် အမွေအနှစ်တွေကို ပြန်ရှာဝယ်ပြီး ပို့လာပေးမှပဲ ရတော့မယ် “ ဟု ၎င်း ကော်မတီဝင် တစ်ဦးက ထပ်လောင်းပြောသည်။

photo by – Ko Hom ကျိုင်းတုံဟော်နန်း ပုံစံတူ

စစ်ကောင်စီ ဦးစီးပြီး ဆောက်လုပ်နေသည့် ကျိုင်းတုံဟော်နန်း အသစ်သည် ယခု (၂၀၂၃) ခုနှစ်၊ နှစ်ကုန်ပိုင်း လောက်မှာ အပြီးဆောက်လုပ်သွားမည်ဟုလည်း သိရသည်။

ကျိုင်းတုံ ဟော်နန်းအသစ်ကို မဆောက်လုပ်ခင် လွန်ခဲ့တဲ့ ၂၀၂၂ ဖေဖော်ဝါရီ ၁၇ ရက်တွင် အာဏာသိမ်း စစ်ကောင်စီ ခေါင်းဆောင် မင်းအောင်လှိုင် ကိုယ်တိုင်လာရောက်ပြီး ဟော်နန်းအသစ် ဆောက်လုပ်ဖို့ရန် အုတ်များ လာချခဲ့ကြောင်း ဒေသခံများကပြောသည်။

၁၉၀၆ ခုနှစ်တွင် သျှမ်းစော်ဘွားကြီး (စဝ်ကွန်ကျောက်အင်ထလျန်း) ကိုယ်တိုင်က ကျိုင်းတုံမြို့ရှိ ဟော်နန်းကို ဆောက်လုပ်ခဲ့ခြင်း ဖြစ်သည်။

၁၉၉၁ ခုနှစ် (နိုဝင်ဘာလ ၉ ရက်နေ့) မှာ န.ဝ.တ (အစိုးရခေတ်) ဗိုလ်ချုပ်မှူးကြီး သန်းရွှေ က ကျိုင်းတုံ ဟော်နန်းကို ဘူဒိုဇာဖြင့် ဖြိုဖျက်ပျက်စီးခဲ့ပြီး ထိုနေရာ၌ ဟိုတယ် အသစ်ဆောက်လုပ်ပြီး လက်ရှိ ကျိုင်းတုံဟိုတယ်ကို နှစ်ပေါင်း ၇၀ အတွင်း ငှားပေးထားကြောင်း သိရသည်။

Leave a Comments

- Advertisement -spot_img

Latest article