သျှမ်းပြည် လွိုင်လင်ခရိုင် ကျေးသီးမြို့နယ် ဝမ်ဟိုင်းတွင် MPT ဆင်းကဒ် အသုံးပြုသူများ ဖုန်းလိုင်းပိတ်ခံထား ရာမှတစ်ဆင့် Kpay အကောင့်ထဲရှိ ပိုက်ဆံများ အလိုအလျောက် ပျောက်ဆုံးသွားကြောင်း စုံစမ်းသိရှိရသည်။

ဖြစ်စဉ်မှာ (မတ်လ ၁၈ ရက်) ညနေ ၉ နာရီခန့်တွင် ကျေးသီးမြို့နယ် ဝမ်ဟိုင်းတွင် နေထိုင်သော အမျိုးသမီးတစ်ဦးသည် MPT ဆင်းကဒ်ကို အသုံးပြုပြီး (၁၂) နာရီဝန်းကျင် ဖုန်းလိုင်းပိတ်ခံရပြီး၊ ထိုအတောအတွင်း Kpay အကောင့်ထဲရှိ ပိုက်ဆံ ကျပ်ငွေ (၁) သိန်းအား အခြားအကောင့်ထဲသို့ အလိုလို လွှဲအပ်သွားကြောင်း ကြုံတွေ့ခဲ့ရသူ နန်းဆိုင် (အမည်လွှဲ) က သျှမ်းသံတော်ဆင့်ကို ပြောသည်။

“ အစက ကျွန်မ Facebook ကြည့်နေတုန်း ဖုန်းလိုင်း ကစ ပြတ်သွားတာ။ ဒီမှာက ဖုန်းလိုင်းခဏခဏ ပြတ်တော့ သူများဖုန်းလိုင်းဖြတ်တာလားပဲ ထင်နေတာ။ မနက်ရောက်တော့ အိမ်ကလူကိုမေးတော့ ဖုန်းလိုင်းက မပြတ်ပါဘူး ဆိုပြီးပြောမှ ကျွန်မလည်း ဒါဆို Kpay အကောင့်ထဲက ပိုက်ဆံတွေ ခိုးခံရပြီလားလို့ ရိပ်မိလာတာ။ တကယ်လည်း ကျွန်မအကောင့်ထဲက ပိုက်ဆံ (၁)သိန်းအကုန် ပါသွားတယ် “ ဟု ၎င်းက ပြောသည်။

အဆိုပါ ဖုန်းလိုင်းပိတ်ခံထားရသူများသည် MPT ဆင်းကဒ်ကို အသုံးပြုထားသူများဖြစ်ကြပြီး ဆင်းကဒ် မှတ်ပုံတင်ထားသူများမှာလည်း ပိတ်ခံနေရကြောင်း သိရသည်။

အလားတူ ယမန်နေ့ (မတ်လ ၁၉) ရက် ကျေးသီးမြို့နယ် ဝမ်းဟိုင်းရွာတွင် နေထိုင်သည့် အမျိုးသမီး ၃ ဦးသည်လည်း ဖုန်းလိုင်းပိတ်ခံထားရာမှတစ်ဆင့် Kpay အကောင့်ထဲရှိ ပိုက်ဆံများ တခြားအကောင့်ထဲသို့ လွှဲအပ်သွားပြီး ပိုက်ဆံအများအပြား ဆုံးရှုံးနေရကြောင်း သိရသည်။

“ ဖုန်းလိုင်းပိတ်ပြီး Kpay လည်းအလိုလို ဝင်လို့မရလို့ ဝင်ရတဲ့အချိန်လည်း ပိုက်ဆံက မရှိတော့ဘူး။ မနေ့က တစ်ရက်တည်း ၃ ယောက်ဖြစ်တယ်။ အကုန်လုံး ဝမ်ဟိုင်းကလူတွေဘဲ ဖြစ်နေတယ်။ ကျွန်မကတော့ အခုချိန်ထိ ဖုန်းလိုင်း ပြန်မရသေးဘူး။ Kpay အကောင့်ထဲလည်း ဝင်လို့မရသေးဘူး။ အကောင့်ထဲက ကျပ် (၁၃) သိန်းရှိတယ်။ ကျွန်မ သူငယ်ချင်း နှစ်ယောက်တော့ သိန်း (၃၀) ပါသွားပြီ “ ဟု ဖုန်းလိုင်း ပိတ်ခံထားရသူ နန်းနောင့် (အမည်လွှဲ) က ပြောသည်။

ယခု (မတ်လအတွင်း) ကျေးသီးမြို့နယ် ဝမ်ဟိုင်းရွာမှာ နေထိုင်သည့် အမျိုးသမီး ၅ ဦးခန့်သည် MPT ဆင်းကဒ်ကို အသုံးပြုကာ ဖုန်းလိုင်း ပိတ်ခံထားရာမှ တစ်ဆင့် Kpay အကောင့်ထဲရှိ ပိုက်ဆံများ ဆုံးရှုံးနေရသူ နှင့် လက်ရှိအချိန်ထိ ဖုန်းလိုင်း ပြန်လည်အသုံးပြု၍ မရသေးသူများရှိနေကြောင်း သိရသည်။

ထို့အပြင် ဖုန်းလိုင်းပိတ်ရမှု နှင့် ပတ်သက်ပြီး IT နည်းပညာဆိုင်ရာ အသိပညာရှင်တစ်ဦးက “ ဒီခေတ်ကာလမှာ နိုင်ငံရေး အခြေနေ မကောင်းတော့ လိုင်းပေါ်မှာ လိမ်လည်လုပ်စားတဲ့သူတွေ အရမ်းများပါတယ်။ စစ်ကောင်စီ လက်အောက်ခံက ဝန်ထမ်းတွေလည်း ဖြစ်နိုင်တယ်၊ သူက ဒီလူကို ဖုန်းနံပါတ် သိရင် ပထမ တစ်ခါ စမ်းပိတ်မယ်။ ပိတ်ခံရပြီဆိုရင် သူ့ဆီပြန်လာလျှောက်ရမှာသိတော့ နံပါတ်သိရင် Code ရရင် အကောင့်တစ်ခုကို ဝင်မယ်ဆိုရင် လွယ်လွယ်လေးပါ။ ဒီတော့ သတိထားရမှာပေါ့ သူများဆီသွားလျှောက်တဲ့ ဖုန်းနံပါတ်တွေ၊ Password ပြန်ပြောင်းထားပါ “ ဟု ၎င်းက ပြောသည်။

ထိုသို့ လိမ်လည်ခံရပြီးနောက် Kpay သုံးစွဲရန် လုံခြုံမှု မရှိလာလျှင် သက်ဆိုင်ရာ ရဲတပ်ဖွဲ့၊ ကမ္ဘောဇဘဏ်ကို တိုင်ကြားပြီး ကျုးလွန်သူကို အရေးယူ ဆောင်ရွက် ဖမ်းဆီးစေလိုကြောင်း ၎င်းက တိုက်တွန်းထားသည်။

ထို့အပြင် စစ်ကောင်စီကလည်း Kpay အကောင့်များကို အဆင့် (၂) အထိ မမြှင့်တင်ထားသည့် အကောင့်များကို ပိတ်သိမ်းမည်ဖြစ်ကြောင်း၊ မှတ်ပုံတင်၊ ဖုန်းနံပါတ် နှင့် မကိုက်ညီသည့် နံပါတ်များကိုလည်း အကောင့်ပိတ်သွားမည်ဟု ယမန်နှစ်တွင် ထုတ်ပြန်ခဲ့သည်။