Sunday, May 26, 2024

မန့်ပန်ပြည်သူ့စစ်တပ်ဖွဲ့သည် ပြည်သူ့ကားကို တိုက်သည့်အပြင် ခေါင်းကွဲအောင်ရိုက်

Must read

သျှမ်းပြည် လားရှိုးမြို့နယ်အတွင်း မန့်ပန်ပြည်သူ့စစ်တပ်ဖွဲ့ မောင်းနှင်လာသည့် ကားတစ်စီးသည် အရပ်သား အမျိုးသား တစ်ဦး မောင်းနှင်လာသည့်ကားကို ဝင်တိုက်သည့်အပြင် လူကိုပါ ခေါင်းကွဲအောင် ရိုက်နှက်ခဲ့ကြောင်း သတင်းသိရသည်။

အရိုက်ခံရသည့် အမျိုးသား

ယမန်နေ့ မတ်လ ၁၆ ရက်နေ့ ညနေပိုင်း ၃ နာရီ ဝန်းကျင်အချိန်တွင် လားရှိုးမြို့ အဝင် မုဒ်ဦးနား၌ ကားမောင်းလာသည့် မန့်ပန်ပြည်သူ့စစ် တပ်ဖွဲ့သည် အရပ်သား မောင်းနှင်သည့်ကားကို တိုက်မိခဲ့ကြောင်း အရိုက်ခံရသည့် ကားပိုင်ရှင် အမျိုးသား နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။

“ကားချင်း အရင်တိုက်မိတာ၊ ကားကို တိုက်မိလို့ တိုက်မိတယ် ပြောတာကို တုတ်ချောင်း နဲ့ ခေါင်းကိုရိုက်တယ်၊ ခေါင်းကွဲသွားတယ်၊ ပြီးတော့ ဘာတာဝန်ယူမှုမှ မရှိဘူး၊ မန့်ပန် ပြည်သူ့စစ် ဆိုတာက စကားအချေအတင် ပြောနေတဲ့အချိန် သူတို့ကိုယ်တိုင်က ပြောခဲ့တာ” ဟု အရိုက်ခံရသည့် ကားပိုင်ရှင် အမျိုးသား နှင့် နီးစပ်သူ က သျှမ်းသံတော်ဆင့်ကို ပြောသည်။

မန့်ပန်ပြည်သူ့စစ် တပ်ဖွဲ့စီးလာသည့် ကားသည် စုစုပေါင်း ၄ ယောက်ထက်မနည်း ရှိနေပြီး ကားကို ဝင်တိုက် မိသည့် အတွက် စကားအချေအတင်ပြောရာ တုတ်ဖြင့် တစ်ဖက် အမျိုးသား၏ ဦးခေါင်းကို ရိုက်နှက်ပြီး ကားမောင်းထွက်ပြေးသွားကြောင်း သိရသည်။

အဆိုပါ ရိုက်နှက်ခံရသည့် ကားပိုင်ရှင် အမျိုးသားသည် ဦးခေါင်းကွဲပြီး ဆေးရုံသို့ ရောက်ရှိရာ ၅ ချက် ထက်မနည်း ချုပ်လိုက်ရကြောင်းလည်း သိရသည်။

“ဆေးရုံကို အားတင်းပြီးတော့ ရောက်ခဲ့တယ်၊ သူက ၅ ချုပ်ထက် မနည်း ချုပ်ရတယ်၊ အခုမှလည်း ရဲစခန်း နဲ့ တိုင်းမှူးတွေဆီမှာ အမှူတော့ ဖွင့်ထားတယ်၊ ဘယ်လိုလာမလဲတော့ မသိဘူး” ဟု အထက်ပါ နီးစပ်သူက ဆက်ပြောသည်။

စစ်တပ်မှ နိုင်ငံတော် အာဏာသိမ်းယူပြီး နောက်ပိုင်းတွင် ယာဥ်စည်းကမ်း လမ်းစည်းကမ်း ချိုးဖောက်မှု များပြား လာခဲ့ကြောင်းလည်း သိရသည်။

Leave a Comments

- Advertisement -spot_img

Latest article