သျှမ်းပြည် တောင်ကြီးခရိုင် ဆီဆိုင်မြို့နယ်အတွင်းရှိ စစ်ရှောင်စခန်း (၅) နေရာခန့်မှ စစ်ရှောင်များသည် ရေရှားပါး ပြဿနာ နှင့် ကြုံတွေ့နေရသဖြင့် အကူညီ လိုအပ်နေကြောင်း စုံစမ်းသိရှိရသည်။
နှစ်စဉ်နှစ်တိုင်း နွေဦးကာလသို့ ရောက်ရှိလျှင် ရေရှားပါးသော ပြဿနာ အမြဲကြုံတွေ့ နေရသည့် ဆီဆိုင်မြို့နယ် ဘုရားဖြူ၊ နောင်ကျော၊ ပန်တိုင်း နှင့် ရေဖြူ စသည့် တောင်ပေါ်ဒေသမှ ကျေးရွာ ဒေသခံများသည် ရေကို အမြဲဝယ်သုံးနေရကြောင်း ဆီဆိုင်မြို့ဒေသခံ အမျိုးသားတစ်ဦးက ပြောသည်။
အဆိုပါ ရေရှားပါးသည့် ပြဿနာ နှင့် ကြုံတွေ့နေရသည့် ကျေးရွာများထဲမှ စစ်ရှောင်များသည် ဦးရေ စုစုပေါင်း (၂,၀၀၀) ရှိနေပြီး စစ်ရှောင် အများစုဟာ ရေကို ဝယ်သုံးဖို့ရန်အတွက် အခက်ခဲရှိနေကြောင်း ပန်တိုင်းစစ်ရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ သောက်သုံးဖို့အတွက် ရွာထဲမှာ ရေသွားခပ်ရတယ်။ ရွာက ဝေးတယ်။ တောင်ပေါ်လည်း တက်ရတယ်။ ဆိုင်ကယ်မရှိတဲ့ လူဆိုအဆင်မပြေဘူး။ အဝေးကြီးကို လမ်းလျှောက်သွားရတယ်။ အခုတော့ ပိုက်နဲ့တွယ်လိုက်ပြီ။ ရေက ပုံမှန်လာနိုင်မလား မသိသေဘူး “ ဟု ၎င်းက ပြောသည်။
လက်ရှိ ဆီဆိုင်မြို့ပေါ်တွင် ရေ ( ၈ ပေပါ ) ပြည့် ရေသယ်ကား တစ်စီးကို ကျပ်ငွေ (၁ သောင်း) အထိ ဈေးနှုန်းမြင့်တက် နေပြီး ကျေးလက်ဒေသမှ ရေ ( ၁ ပေပါ )ကိုတော့ ကျပ်ငွေ (၃,၀၀၀) အထိ ဈေးနှုန်း မြင့်တက်နေကြောင်းလည်း သိရသည်။
ထို့အပြင် ရေရှားပါးသည့် ပြဿနာနှင့် ကြုံတွေ့နေရသောကြောင့် စစ်ရှောင်များသည် ရရာကို အသုံးပြုရခြင်း၊ မသန့်ရှင်းသည့် ရေကို သောက်သုံးရခြင်းကြောင့် ယမန်နှစ်က စစ်ရှောင်ကလေးငယ်များသည် ဝမ်းပျက်၊ ဝမ်းလျော ရောဂါဖြစ်ပွားပြီး ဆေးရုံသို့ ဆေးဝါး ကုသခံမှု ယူရသည့်အဆင့်ထိ ဖြစ်ပွားခဲ့ဖူးကြောင်း သိရသည်။
“ မနှစ်တုန်းက ရေဝယ်ရတာ မသက်သာဘူး။ မသန့်ရှင်းတဲ့ ရေကိုသောက်ကြရတယ်။ အဓိက ကလေးငယ်တွေပေါ့ ဝမ်းပျက်၊ ဝမ်းလျောပြီး ဆေးရုံအထိ ကုသရတယ်။ ဒီနှစ်တော့ အဲ့လိုဖြစ်တာ သိပ်မတွေ့ရ သေးပေမယ့် စိုးတော့ စိုးရိမ်နေရသေးတယ် “ ဟု စစ်ရှောင်ကူညီပေးနေသူ ဒေသခံတစ်ဦးက ပြောသည်။
အလားတူ သျှမ်း နှင့် ကယားပြည် (ကရင်နီ) နယ်စပ် ဖယ်ခုံမြို့နယ်တွင် နေထိုင်သည့် ဒေသခံ အပါအဝင် စစ်ရှောင်များ ဦးရေ စုစုပေါင်း (၂,၀၀၀) ဝန်းကျင်မှာလည်း မသန့်ရှင်းသည့် ရေကို သောက်သုံးပြီး ဝမ်းပျက်၊ ဝမ်းလျော ဖြစ်ပွားနေကြောင်း သိရသည်။
စစ်တပ်က အာဏာသိမ်းပြီးနောက်ပိုင်း ကယားပြည် (ကရင်နီပြည်) တွင် စစ်ကောင်စီတပ်ဖွဲ့ နှင့် ပြည်သူ့ကာကွယ်တပ်ဖွဲ့ PDF တို့ကြား တိုက်ပွဲကြောင့် ဆီဆိုင်မြို့နယ်အတွင်း ထွက်ပြေးတိမ်းရှောင်နေသည့် စစ်ရှောင် ဦးရေဟာ (၆,၀၀၀) ကျော် ရှိနေပြီဖြစ်ကြောင်း သိရသည်။
Leave a Comments