တအာင်း (ပလောင်) အမျိုးသား ပါတီ TNP ပါတီသည် သျှမ်းပြည် အခြေစိုက်ပါတီ အဖြစ် နိုင်ငံရေးပါတီ မှတ်ပုံတင် လုပ်ဆောင်ရန် ပြင်ဆင်နေကြောင်း သတင်းသိရသည်။

သျှမ်းပြည် အခြေစိုက် တအာင်း (ပလောင်) အမျိုးသားပါတီသည် စစ်ကောင်စီ၏ လက်အောက်ခံ ရွေးကောက်ပွဲ ကော်မရှင်ထံသို့ နိုင်ငံရေးပါတီ အဖြစ် မှတ်ပုံတင် တင်သွင်းရန်အတွက် ပြင်ဆင်နေလျက်ရှိကြောင်း ပါတီ၏ ဗဟို အထွေထွေ အတွင်းရေးမှူး ဦးကျော်အောင် က သျှမ်းသံတော်ဆင့်ကို ပြောသည်။

“လက်ရှိမှာက ကျနော်တို့ ပါတီ မှတ်ပုံတင် လုပ်ဖို့ ပြင်ဆင်နေတာတော့ ဟုတ်ပါတယ်၊ ဒါပေမဲ့ ဘယ်အချိန်မှာ တင်မလဲ ဆိုတာတော့ မဆုံးဖြတ်ရသေးဘူး၊ အခုချိန်ကလည်း စိန်ခေါ်မှုတွေလည်း အရမ်းများနေတယ်” ဟု TNP ပါတီ၏ အထွေထွေ အတွင်းရေးမှူး ဦးကျော်အောင် က ပြောသည်။

လက်ရှိ အချိန်၌ TNP ပါတီသည် အာဏာသိမ်း စစ်ကောင်စီထံ နိုင်ငံရေး မှတ်ပုံတင်ရန် ပြင်ဆင်ထားသော်လည်း မြေပြင်ကွင်းဆင်း စည်းရုံးမှုများအတွက် စိန်ခေါ်မှုလည်း ရှိနေကြောင်း ဦးကျော်အောင် က ဆက်ပြောသည်။

“အခုက သျှမ်းပြည်ကိုပဲ ထားပြီး မှတ်ပုံတင် လုပ်မယ်ဆိုပေမဲ့ မြေပြင်ကွင်းဆင်း စည်းရုံးမှုတွေ ပြီးတော့ တခြား အခက်အခဲတွေက ရှိနေသေးတယ်၊ ဒါကြောင့် ဘယ်တော့ မှတ်ပုံတင် မလဲဆိုတာတော့ မပြောတတ်ဘူး၊ ရွေးကောက်ပွဲ ဝင်မဝင်က နောက်ထပ် တစ်ကဏ္ဍ ဖြစ်သွားတယ်ပေါ့” ဟု ဦးကျော်အောင် က ဆိုသည်။

TNP ပါတီမှ စစ်ကောင်စီ လက်အောက်ခံ ရွေးကောက်ပွဲ ကော်မရှင်ထံ နိုင်ငံရေး ပါတီ မှတ်ပုံတင်ခြင်း နှင့် ပတ်သက်ပြီး တချို့သော တအာင်း (ပလောင်) အရပ်သား အဖွဲ့အစည်းများက ကန့်ကွက်နေကြောင်းလည်း သိရသည်။

ထို့အပြင် တအာင်း (ပလောင်) အမျိုးသား လွတ်မြောက်ရေး တပ်မတော် (PSLF/TNLA) ၏ ဒု ဥက္ကဌ ဗိုလ်ချုပ် တားဂျုတ်ဂျားကလည်း စစ်ကောင်စီ ကျင်းပမည့် ရွေးကောက်ပွဲကို လုံးဝ အသိအမှတ် မပြုသည့်အကြောင်း ရွှေဖီမြေ သတင်းဌာနကို ပြောဆိုခဲ့ဖူးသည်။

စစ်ကောင်စီမှ အသစ်ပြဌာန်းလိုက်သည့် နိုင်ငံရေးပါတီများ မှတ်ပုံတင်ခြင်း ဆိုင်ရာ ဥပဒေသစ်များကြောင့် နိုင်ငံရေး ပါတီ တင်သွင်းဖို့ရန်အတွက် အခက်အခဲ ဖြစ်စေသည့်အပြင် မူရင်း မဲဆန္ဒရှင်များကိုလည်း ဆုံးရှုံးရကြောင်း TNP ပါတီ၏ ဗဟို အထွေထွေ အတွင်းရေးမှူး ဦးကျော်အောင် က သျှမ်းသံတော်ဆင့်ကို ဆက်ပြောသည်။

“အရင်က ကျနော်တို့ TNP ပါတီဆိုရင် ပြင်ဦးလွင်ခရိုင်က မိုးကုတ်မြို့နယ်မှာ လုံးကျွတ်နိုင်ခဲ့ဖူးတယ်၊ အခုတော့ နိုင်ငံရေးပါတီများဆိုရာ ဥပဒေသစ် ပြဌာန်းချက်တွေကြောင့် အဲ့နေရာတွေကို မဝင်နိုင်တော့ဘူး၊ မဲဆန္ဒရှင်တွေကို ဆုံးရှုံးရတယ်၊” ဟု ဦးကျော်အောင် က ပြောသည်။

တအောင်း (ပလောင်) အမျိုးသားပါတီ (TNP) သည် ပြီးခဲ့သည့် ၂၀၂၀ ခုနှစ်တွင် ကျင်းပခဲ့သည့် ပါတီစုံ ဒီမိုကရေစီ အထွေထွေ ရွေးကောက်ပွဲ၌ ပလောင်ကိုယ်ပိုင် အုပ်ချုပ်ခွင့်ရဒေသ နှင့် မြို့နယ် ၅ မြို့နယ်မှ လွှတ်တော်အမတ် (၁၂) နေရာ ကို အနိုင်ရရှိထားသည့် နိုင်ငံရေးပါတီ တစ်ခု ဖြစ်သည်။

ပြီးခဲ့သည့် မတ်လ ၁၃ ရက်နေ့မှာလည်း ရှမ်းနီ (တိုင်းလျန်) သွေးစည်းညီညွတ်ရေးပါတီ နှင့် လူထုပါတီတို့ကလည်း နိုင်ငံရေးပါတီ ဆက်လက် တည်ထောင်ခွင့် နှင့် မှတ်ပုံတင်ခွင့်ကို ပြည်ထောင်စု ရွေးကောက်ပွဲ ကော်မရှင်ထံ လျှောက်ထားခဲ့ကြောင်း စစ်ကောင်စီ၏ ထုတ်ပြန်ကြေညာချက်များ အရ သိရသည်။

လက်ရှိတွင် စစ်ကောင်စီ ရွေးကောက်ပွဲ ကော်မရှင်ထံ လျှောက်ထားသည့် နိုင်ငံရေးပါတီ စုစုပေါင်း ၂၁ ပါတီ ရှိနေပြီး ပြည်ထောင်စု တစ်ဝန်းလုံး စည်းရုံးမည့် နိုင်ငံရေးပါတီ ၅ ပါတီ၊ ပြည်နယ်တစ်ခု အတွင်း စည်းရုံးမည့် နိုင်ငံရေး ပါတီ ၁၆ ပါတီအထိ ရှိထားကြောင်း စစ်ကောင်စီက ထုတ်ပြန်ထားသည်။