Sunday, May 26, 2024

ရေကာတာ စီမံကိန်းတွေအတွက် အကြံပေးဖို့ ဥရောပ ကုမ္ပဏီတွေကို မြန်မာစစ်အုပ်စုက ဒေါ်လာ သန်း နဲ့ ချီပြီးငွေပေးခဲ့

Must read

ရေအားလျှပ်စစ် စီမံကိန်းတွေ လုပ်ဆောင်ရန် အတိုင်ပင်ခံ လုပ်ငန်းအတွက် ဥရောပ အင်ဂျင်နီယာ ကော်ပိုရေးရှင်း နှစ်ခုကို စစ်အုပ်စုက ဒေါ်လာသန်းချီ ပေးချေခဲ့သည့်အကြောင်း Justice For Myanmar က ထုတ်ဖော်ခဲ့သည်။

မင်းအောင်လှိုင် မှ ရေကာတာ စီမံကိန်းကို ကြည့်ရှု့စဥ်

အဆိုပါ ထုတ်ပြန်ချက်သည် ယမန်နေ့ ( မတ် ၁၄) ရက် အပြည်ပြည်ဆိုင်ရာ မြစ်ချောင်းများနေ့ တွင် ထုတ်ပြန်ခဲ့ခြင်း ဖြစ်သည်။

ဆွီဒင်အိတ်ချိန်း စာရင်းဝင်ကုမ္ပဏီ AFRY AB ၏ ဆွဇ်ကုမ္ပဏီခွဲသည် မြန်မာနိုင်ငံမှ အထက်ရဲရွာ နှင့် အလယ် ပေါင်းလောင်း ရေအား လျှပ်စစ်စီမံကိန်းများမှာ ၂၀၂၁ ခုနှစ် ဖေဖော်ဝါရီလမှ ၂၀၂၂ ခုနှစ် စက်တင်ဘာလ အထိ အတိုင်ပင်ခံ လုပ်ငန်းအတွက် ဝန်ဆောင်ခအဖြစ် အမေရိကန် ဒေါ်လာ ၄.၆၈ သန်း ရရှိခဲ့ကြောင်း ထုတ်ပြန်ချက်တွင် ရေးသားထားသည်။

ဩစတြီးယား အခြေစိုက် ILF Group ၏ မြန်မာကုမ္ပဏီခွဲက ၂၀၂၁ ခုနှစ် ဖေဖော်ဝါရီလမှ ၂၀၂၂ ခုနှစ်၊ ဧပြီလအထိ အတိုင်ပင်ခံလုပ်ငန်းအတွက် စစ်အုပ်စုဆီက အမေရိကန်ဒေါ်လာ ၁.၁ သန်း ရရှိခဲ့ကြောင်း Justice For Myanmar ထုတ်ပြန်ချက်တွင် ဖော်ပြထားသည်။

ကုမ္ပဏီနှစ်ခုလုံးကို စစ်အုပ်စုက တရားမဝင် ထိန်းချုပ်ထားသည့် လျှပ်စစ်ဝန်ကြီးဌာနရဲ့ ဦးစီးဌာနတစ်ခုက ပေးချေခဲ့ကြောင်း သိရသည်။

ပုံဟောင်း

AFRY သည် မြန်မာနိုင်ငံတွင် လုပ်နေသည့် လုပ်ငန်းများ၏ လက်ရှိအခြေအနေ နှင့် ပတ်သက်ပြီး Justice For Myanmar ကို အသေးစိတ် မဖြေကြားခဲ့သော်လည်း မြန်မာနိုင်ငံထဲတွင် စီမံကိန်းများ ရှိနေသည့်အကြောင်း ကို အတည်ပြုခဲ့ သည်။

ILF Group က “ကျွန်ုပ်တို့ရဲ့ လုပ်ငန်းတွေကို ဆက်မလုပ်တာ ကာလတခုရှိပါပြီ။ လက်တလောအချိန်မှာ ဆည်ရေပိုလွှဲလုပ်ငန်းအတွက် ရေလှောင်တမံ ခိုင်ခံ့ရေး နဲ့ မြေထိန်း နံရံ ခိုင်ခံ့ရေးတို့ကို အဓိကဆောင်ရွက် ခဲ့ပါတယ်” လို့ ပြန်လည်ဖြေကြားခဲ့ပါတယ်။

ILF Group က သူတို့လုပ်ငန်းများ ရပ်ဆိုင်းထားခဲ့တဲ့ ရက်စွဲကိုတော့ ထုတ်ဖော်ပြောကြားတာမျိုး မရှိပါဘူး” ဟု ပြောဆိုခဲ့သည်။

ဆက်လက်ပြီး Justice For Myanmar ၏ ပြောရေးဆိုခွင့်ရှိသူ မရတနာမောင်က “AFRY နဲ့ ILF အဖွဲ့တို့ဟာ သူတို့ရဲ့ စီးပွားဖက်ဖြစ်တဲ့ စစ်အုပ်စုက မြန်မာပြည်သူတွေကို အကြမ်းဖက် စစ်ဆင်နေတဲ့အချိန်မှာ မြန်မာစစ်အုပ်စုနဲ့ ပူးပေါင်းပြီး၊ လူမှုဝန်းကျင်နဲ့ သဘာဝပတ်ဝန်းကျင်ကို ပျက်စီးစေတဲ့ ရေကာတာ တည်ဆောက်ရေးအတွက် ပံ့ပိုးကူညီနေတာက စိတ်ပျက်စရာ ကောင်းလှပါသည်။

လက်ရှိအချိန်ထိ ကုမ္ပဏီ နှစ်ခုလုံးသည် မြန်မာနိုင်ငံ ကုမ္ပဏီမှတ်ပုံတင်စာရင်းတွင် မှတ်ပုံတင်ထားဆဲဖြစ်ကြောင်း သိရသည်။

AFRY နဲ့ ILF အဖွဲ့သည် ဒေသခံ လူ့အဖွဲ့အစည်း အသံများ၊ နိုင်ငံတကာ လူ့အခွင့်အရေးဆိုင်ရာ တာဝန်များကို လျစ်လျူရှုပြီး စစ်ရာဇာဝတ်မှု ကျူးလွန်သည့် စစ်ကောင်စီ နှင့် ပုံမှန်အတိုင်း စီးပွားရေး လုပ်ဆောင်နေဆဲဟု Justice For Myanmar က ပြောဆိုလိုက်သည်။

မြန်မာနိုင်ငံ ဖက်ဒရယ် ဒီမိုကရေစီရရှိသည့် အချိန်အထိ မြန်မာနိုင်ငံအတွင်း တခြားကျန်ရှိသော ရေအားလျှပ်စစ်စီမံကိန်း မှန်သမျှကို တာဝန်သိစွာ ရပ်ဆိုင်းထားရန် Justice For Myanmar က တောင်းဆိုလိုက်သည်။

Leave a Comments

- Advertisement -spot_img

Latest article