“ရှမ်း နှင့် တိုင်းရင်းသားများ ဒီမိုကရက်တစ်ပါတီ”ဟု နာမည် ပြောင်းလဲထားသည့် ကျားဖြူပါတီ SNDP သည် ရန်ကုန်တိုင်းဒေသကြီး၏ ပါတီတာဝန်ခံကို အမျိုးသား ဒီမိုကရေစီ အဖွဲ့ချုပ် (NLD) ၏ လွှတ်တော် ကိုယ်စားလှယ်ဟောင်း ဦးလှဌေးကို ခန့်အပ်လိုက်ကြောင်း သတင်းရရှိသည်။

အာဏာသိမ်း စစ်ကောင်စီ လက်အောက်ခံ ပြည်ထောင်စု ရွေးကောက်ပွဲ ကော်မရှင်ထံသို့ နိုင်ငံရေးပါတီနာမည် အသစ်ဖြင့် မှတ်ပုံတင်ထားသည့် ကျားဖြူပါတီ SNDP သည် စစ်ကောင်စီ ကျင်းပမည့် ရွေးကောက်ပွဲကို တိုင်းဒေသကြီး ၆ ခုနှင့် သျှမ်းပြည်အနှံ့ကို ဝင်ရောက်ယှဥ်ပြိုင်မည် ဖြစ်ရာ ရန်ကုန်တိုင်း ဝာာဝန်ခံ အဖြစ် NLD မှ လွှတ်တော်ကိုယ်စားလှယ်ဟောင်း ဦးလှဌေးကို ခန့်အပ်လိုက်သည်။

ဦးလှဌေးကို ရန်ကုန်တိုင်းဒေသကြီး ပါတီတာဝန်ခံအဖြစ် ခန့်အပ်ခြင်းသည် ၎င်း၏ အောင်နိုင်ခြေများနေသည့် အတွက်ကြောင့်ဟု SNDP ဥက္ကဌ ဦးစိုင်း အိုက်ပေါင်းက သျှမ်းသံတော်ဆင့်ကို ပြောသည်။

“ဦးလှဌေးကို ဘာကြောင့် ရန်ကုန်တိုင်းဒေသကြီးရဲ့ တာဝန်ခံ အဖြစ် ရွေးလိုက်သလဲဆိုရင် သူက အောင်နိုင်ခြေ များတယ်၊ အဲ့ဒါကြောင့် ခန့်လိုက်တာပါ” ဟု ဦးစိုင်းအိုက်ပေါင်းက သျှမ်းသံတော်ဆင့်ကို ပြောသည်။

ယင်းကဲ့သို့ ရန်ကုန်တိုင်းဒေသကြီး၏ SNDP ပါတီတာဝန်ခံ အဖြစ် လုပ်ဆောင်သည့် ဦးလှဌေးကို နိုင်ငံရေး ဖောက်ပြန်ရေးသမားအဖြစ် မင်္ဂလာတောင်ညွန့်သပိတ်ကော်မတီက ထုတ်ပြန်ကြေညာခဲ့သည်။

ယင်းကဲ့သို့ ထုတ်ပြန်ကြေညာချက်နှင့် ပတ်သက်ပြီး မနာလိုသူများ၏ စကားဖြစ်ကြောင်း ပါတီ ဥက္ကဌ ဦးစိုင်းအိုက်ပေါင်းက တုန့်ပြန်ပြောဆိုထားသည်။

“မနာလိုသူတွေ ပြောတဲ့စကားပါ။ ဘာမှ နိုင်ငံရေးဖောက်ပြန်မှု မဟုတ်ပါဘူး၊သူက (ဦးလှဌေး) နိုင်ငံရေး ဖောက်ပြန်ရေး သမားလည်း မဟုတ်ဘူး”ဟု ဦးစိုင်းအိုက်ပေါင်းက သျှမ်းသံတော်ဆင့်ကို ပြောသည်။

ဦးလှဌေးသည် ၂၀၁၀ ရွေးကောက်ပွဲတွင် ဦးသုဝေပါတီဟု လူသိများသည့် ဒီမို ကရက်တစ်ပါတီ(မြန်မာ)မှ ပါတီဝင်တစ်ဦးဖြစ်ပြီး ၂၀၁၂ ခုနှစ်တွင် မင်္ဂလာ တောင်ညွန့်မြို့နယ်မှ NLD ပါတီဝင်တစ်ဦးဖြစ်ခဲ့ပြီး ၂၀၁၅ ရွေးကောက်ပွဲ တွင် လွှတ်တော်ကိုယ်စားလှယ်အဖြစ် ရွေးချယ်ခံခဲ့ရသူဖြစ်သည်။

လက်ရှိတွင် ကျားဖြူပါတီ SNDP ၏ ရန်ကုန်တိုင်း၏ တာဝန်ခံရာထူးကို ရယူထားသည့်အတွက် နိုင်ငံရေး ဖောက်ပြန်ရေးသမားဟု မင်္ဂလာတောင်ညွှန့်သပိတ်ကော်မတီမှ ပြင်းထန် စွာဝေဖန်ထားသည်ကို တွေ့ရသည်။

ထို့အပြင် မင်္ဂလာတောင်ညွှန့်သပိတ်ကော်မတီမှ ဖောက်ပြန်သည့် နိုင်ငံရေးသမားများ ၊ ခြစားနေသည့် စနစ်များနှင့် လူ့ယဥ်ကျေးမှုများကို တွန်းလှန်တိုက်ဖျက်ကြရန်လည်း တိုက်တွန်းပြောဆိုမှုများ ရှိနေသည်။

ဦးလှဌေးသည် ၂၀၁၀ခုနစ်တွင် ဒီမိုကရက်တစ်ပါတီ (မြန်မာ)မှ ပါတီဝင်တစ်ဦးဖြစ်ပြီး၊ ၂၀၁၂ ခုနစ်တွင် မင်္ဂလာတောင်ညွန့်မြို့နယ် မှ NLD ပါတီဝင်တစ်ဦးဖြစ်ပြီး ၂၀၁၅ခုနစ်တွင် ရွေးကောက်ပွဲတွင် ဝင်ရောက် ယှဥ်ပြိုင်ရာမှ လွှတ်တော်ကိုယ်စားလှယ်အဖြစ်ရွေးချယ်ခံခဲ့ရသူဖြစ်သည်။

ရှမ်းနှင့် တိုင်းရင်းသားများ ဒီမိုကရက်တစ်ပါတီဟု နာမည်ပြောင်းလဲထားသည့် (ကျားဖြူပါတီ) သည် သျှမ်းပြည် နှင့်အတူ ရန်ကုန်တိုင်း၊ မန္တလေးတိုင်း၊ ဧရာဝတီတိုင်း၊ ပဲခူးတိုင်း၊ တနင်္သာရီတိုင်း နှင့် နေပြည်တော်တို့ကို ဝင်ရောက်ယှက်ပြိုင်မည် ဖြစ်ကြောင်း သိရသည်။