သျှမ်းပြည် လားရှိုးခရိုင် ကွမ်လုံမြို့နယ်အတွင်းတွင် အာဏာသိမ်း စစ်ကောင်စီ တပ်ဖွဲ့ နှင့် ကချင်လွတ်မြောက်ရေး တပ်မတော် KIA ပူးပေါင်း တပ်ဖွဲ့တို့ ထိတွေ့တိုက်ပွဲ ဖြစ်ပွားခဲ့ကြောင်း သတင်းသိရသည်။
ယမန်နေ့ (မတ်လ ၇) ရက် မွန်းလွဲပိုင်း ၁ နာရီမှ ၂ နာရီကျော် ဝန်းကျင်အထိ ကွမ်းလုံမြို့နယ် ဖာဆန်ကျေးရွာ စစ်ကောင်စီ တပ်ဖွဲ့ နှင့် KIA ပူးပေါင်း တပ်ဖွဲ့ PDF တို့က ထိတွေ့တိုက်ပွဲ ဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။
အဆိုပါ ထိတွေ့တိုက်ပွဲကြောင့် KIA ပူးပေါင်း တပ်ဖွဲ့မှ တပ်သားတစ်ဦး ကျဆုံးခဲ့ကြောင်း ဖြစ်စဥ်ကို သိရှိသူ အမည် မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မနေ့က တစ်နာရီ နီးနီးလောက် တိုက်ပွဲ ဖြစ်ခဲ့တယ်၊ စစ်ကောင်စီ ဘက်ကလည်း အကျအဆုံးတွေ ရှိနိုင်ပါတယ်၊ တိုက်ပွဲ ဖြစ်ပြီးတော့ ကချင်တပ် KIA တပ်ဖွဲ့က PDF အလောင်း (၁) လောင်းနဲ့ သူတို့ကိုင်တဲ့ K-12 အမျိုးအစား သေနတ် (၁) လက်၊ ပြီးတော့ ကျည်ထောင့်တွေကို တွေ့ရတယ်” ဟု အမည်မဖော်လိုသူ အမျိုးသားက ပြောသည်။
ယင်းတိုက်ပွဲအတွင်းတွင် ကချင်လွတ်မြောက်ရေး တပ်မတာ် KIA ပူးပေါင်း တပ်ဖွဲ့မှ PDF တပ်ဖွဲ့ဝင် တစ်ဦး ကျဆုံးခဲ့ကြောင်း သတင်းသိရသော်လည်း စစ်ကောင်စီ၏ သေဆုံးမှုများကို သျှမ်းသံတော်ဆင့်မှ ဆက်လက် စုံစမ်းနေဆဲဖြစ်သည်။
နယ်မြေ ကင်းလှည့်လာသည့် စစ်ကောင်စီ ယာဥ်တန်းသည် KIA ပူးပေါင်း တပ်ဖွဲ့ PDF စစ်ကြောင်း နှင့် တွေ့မိရာမှ ထိတွေ့တိုက်ပွဲ ဖြစ်ပွားရခြင်း ဖြစ်ကြောင်းလည်း သိရသည်။
စစ်ကောင်စီမှ နိုင်ငံတော် အာဏာသိမ်းယူပြီး နောက်ပိုင်းတွင် စစ်ကောင်စီ တပ်ဖွဲ့မှ ဦးတည်ချက်မရှိ လက်နက်ကြီးများ ရမ်းသမ်းပစ်ခတ်ခြင်း၊ လေကြောင်းလိုင်းဖြင့် ပစ်ခတ်ခြင်း တို့ကြောင့် အရပ်သား ပြည်သူတို့ ထိခိုက်မှုများ ရှိသည့်အပြင် သေဆုံးမှုအထိ ရှိလာခဲ့သည်။
စစ်ကောင်စီတပ်ဖွဲ့သည် ဂျီနီဗာ သဘောတူညီချက် စာချုပ်ချုပ်ဆိုထားသည့် တပ်ဖွဲ့ တစ်ခု ဖြစ်သော်လည်း ဂျီနီဗာ သဘောတူညီချက်အရ စစ်ပဋိပက္ခများကြား အရပ်သား လူထုများကို ရည်ရွယ်ချက်ရှိရှိ ပစ်မှတ်ထား တိုက်ခိုက်ခြင်း၊ တိုက်ခိုက်မှု လုပ်ရင် အရပ်သားများ အသက်ဆုံး၊ ဒဏ်ရာရမှာ သိလျက်ဖြင့် ရည်ရွယ်ချက်ဖြင့် တိုက်ခိုက်မှု လုပ်ဆောင်ခြင်း မပြုလုပ်ရန် ပါရှိသည်။
