Sunday, May 26, 2024

မူဆယ်မြို့ရှိ ဟိုတယ်တစ်ခုရှေ့တွင် ဗုံးပေါက်

Must read

သျှမ်းပြည် မူဆယ်ခရိုင် မူဆယ်မြို့ရှိ ဟိုတယ်ရှေ့တွင် ဗုံးပေါက်ကွဲမှုဖြစ်ပွားခဲ့ကြောင်း သတင်းသိရသည်။

ဗုံးလာရောက်ပစ်သည့် အမျိုးသား

ယမန်နေ့ (မတ်လ ၇) ရက် ည ၆ နာရီဝန်းကျင်တွင် မူဆယ်မြို့ရှောင်လမ်း စိုးသစ္စာ ဆီဆိုင်အနီးရှိ 69 Hotel ၌ အမျိုးသား တစ်ဦး ဗုံးဖြင့် လာရောက်ပစ်ခတ်သဖြင့် ပေါက်ကွဲမှုဖြစ်ပြီး ဆိုင်ကယ်နှစ်စီး ပျက်စီးရကြောင်း ဒေသခံများက သျှမ်းသံတော်ဆင့်ကို ပြောသည်။

“အင်္ကျီ အမဲဝတ်ထားတဲ့ အမျိုးသားတစ်ယောက်က လမ်းလျှောက်လာပြီး 69 Hotel ရှေ့မှာ ဗုံးတစ်လုံး လာပစ် သွားတာ၊ ချိန်ကိုက်ဗုံးပဲ ထင်တယ်၊ ချက်ချင်းတော့ မပေါက်ဘူး၊ ခနနေပြီးမှ ဗုံးပေါက်ကွဲမှုဖြစ်တာ၊ ဆိုင်ကယ် နှစ်စီး ပျက်စီးသွားတယ်၊ ကျန်တဲ့ အသေးစိတ်တော့ မသိရသေးဘူး” ဟု မူဆယ်မြို့ခံ အမျိုးသား တစ်ဦးက သျှမ်းသံတော်ဆင့်ကိုပြောသည်။

69 Hotel အနီးရှိ CCTV ဗီဒီယို မှတ်တမ်းအရ ဗုံးဖြင့် လာရောက်ပစ်ပေါက်သူသည် အင်္ကျီအမဲ နှင့် ခေါင်းစွပ် ဝတ်ဆင်ထားပြီး ဗုံးတစ်လုံးကို လာရောက်ပစ်ပေါက်သွားကြောင်းသိရသည်။

အလားတူ ယမန်နေ့ အတွင်း၌ပင် ကွမ်လုံမြို့နယ် ချင်းရွှေဟော်သွားသည့် လမ်းတွင်လည်း ကုန်တင်ကားကြီး နှစ်စီး မီးရှို့ဖျက်ဆီးခံရကြောင်း သတင်းသိရသည်။

အဆိုပါ ကုန်တင်ကား နှစ်စီး မီးရှို့ဖျက်ဆီးခံရခြင်းသည် မည်သူ၏ လက်ချက်ဖြစ်ကြောင်းကို သျှမ်းသံတော်ဆင့်မှ ဆက်လက်စုံစမ်းနေခြင်း ဖြစ်သည်။

လားရှိုး – မူဆယ် ပြည်ထောင်စု လမ်းပိုင်း တစ်လျှောက်သည် စစ်ကောင်စီ တပ်နှင့် ၎င်းတို့၏ လက်အောက်ခံ ပြည်သူ့စစ် တပ်ဖွဲ့တို့ အပြင် တိုင်းရင်းသား လက်နက်ကိုင် ပေါင်းစုံတို့က ဆက်ကြေးကောက် အခွန်တောင်း နေကြသော်လည်း ပြည်သူလူထုနှင့် လမ်းသွားလမ်းလာတို့၏ လုံခြုံရေးအတွက်ကို မည်သည့်အဖွဲ့မှ တာဝန်ယူ ဆောင်ရွက်ပေးခြင်း မရှိကြောင်း သိရသည်။

မူဆယ်မြို့နယ်သည် မြန်မာ – တရုတ်နယ်စပ် မြို့ဖြစ်သည့်အတွက် လူမျိုးစုံ ဝင်ထွက်သွားလာသည့်အပြင် လက်နက်ကိုင် တပ်ဖွဲ့မျိုးစုံလည်း ရှိသည့် ဒေသဖြစ်သည်။

ထို့အပြင် စစ်အာဏာသိမ်းပြီးနောက်ပိုင်း မူဆယ်မြို့တွင်းတွင် တရားမဝင် လောင်းကစားဝိုင်းများ၊ အကြောင်းရင်း မသိ ပစ်ခတ်သတ်ဖြတ်မှုများ၊ ရာဇဝတ်မှုများလည်း ပေါများသည့် ဒေသလည်း ဖြစ်သည်။

Leave a Comments

- Advertisement -spot_img

Latest article