သျှမ်း – ကယားပြည် နယ်စပ် ဖယ်ခုံမြို့ အရှေ့ဘက်ခြမ်းတွင် စစ်ကောင်စီတပ်ဖွဲ့၊ PNO တပ်ဖွဲ့ နှင့် ပြည်သူ့ကာကွယ်ရေး PDF တပ်ဖွဲ့တို့ တိုက်ပွဲ ဖြစ်ပွားနေကြောင်း စုံစမ်းသိရှိရသည်။
ယနေ့ (မတ်လ ၈) ရက် နံနက်အစောပိုင်း ၇ နာရီမှစပြီး ဖယ်ခုံမြို့နယ် ခေါင်းအိကျေးရွာအနီးကို စစ်ကောင်စီတပ်ဖွဲ့ နှင့် PNO တပ်ဖွဲ့ ပူးပေါင်းတပ်ဖွဲ့တို့ စစ်ကြောင်းထိုးလာချိန် ပြည်သူ့ကာကွယ်ရေးတပ်ဖွဲ့ PDF နှင့် ထိတွေ့တိုက်ပွဲဖြစ်ပွားခဲ့ကြောင်း ဖယ်ခုံ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ဒီနေ့ အစောပိုင်း ၇ နာရီလောက်ကစပြီး စကစနဲ့ PNO တို့ စစ်ကြောင်းထိုးလာချိန်မှာ တိုက်ပွဲဆက်ဖြစ်တာ။ ကျနော်တို့ အရှေ့ဘက်ခြမ်း ခေါင်းအိ၊ ရွှေပြည်အေးတို့ဖက်မှာ တိုက်ပွဲဖြစ်နေတာ။ အခုထိ တိုက်ပွဲဆက်တိုက် ဖြစ်နေတာ။ ကျနော်တို့ နေအိမ်ကနေပြီး ကြားနေရတယ် “ ဟု ၎င်းအမျိုးသားတစ်ဦးက ပြောသည်။
လက်ရှိ ထိတွေ့တိုက်ပွဲကြောင့် ဒေသခံ၏ နေအိမ် ပျက်စီးဆုံးရှုံးမှုများ၊ ထိခိုက်ဒဏ်ရာရသူ အသေးစိတ်ကိုတော့ စုံစမ်း၍ မသိရှိရသေးပေ။
ထို့အပြင် စစ်ကောင်စီတပ်ဖွဲ့၊ PNO တပ်ဖွဲ့ နှင့် ပြည်သူ့ကာကွယ်ရေးတပ် PDF တို့ တိုက်ပွဲကြောင့် ဒေသခံကျေးရွာ ၆ ရွာခန့်က ထွက်ပြေးတိမ်းရှောင်နေရကြောင်း၊ တိုက်ပွဲ ဆက်တိုက်ဖြစ်ပွားပါက စစ်ရှောင်များ ဦးရေများ ပိုတိုးလာနိုင်ဖွယ်ရှိကြောင်း စစ်ရှောင်ကူညီသူ ဒေသခံ အမျိုးသားတစ်ဦးက ပြောသည်။
“အခု တိုက်ပွဲကြောင့် စစ်ရှောင်တွေ ပိုများလာနိုင်တယ်။ အရင်က တောင်စလုံး၊ မြောက်စလုံး၊ လုံးပျဉ်၊ နမ့်နိမ့်၊ တောင်မဲသင်း အဲ့က စစ်ရှောင်တွေ ထပ်တိုးလာမှာ သေချာတယ်ဗျ။ အခုစစ်ကြောင်းက နေရာမရွေး ထိုးလာတယ်ဆိုတော့ တိုက်ပွဲတွေက ဆက်တိုက်ဖြစ်ပွားနေအုံးမယ် “ ဟု ၎င်းကပြောသည်။
ပင်လောင်းမြို့နယ်အတွင်းတွင် ဖေဖော်ဝါရီ ၂၄ ရက်နေ့ကစ တိုက်ပွဲဖြစ်ပွားခဲ့သဖြင့် ပြည်သူ ၄ ဦး သေဆုံးခဲ့ပြီး ၄ ဦး ပျောက်ဆုံးနေကာ လက်ရှိ သတင်းရေးသားသည့်အချိန်ထိ တိုက်ပွဲဆက်လက်ဖြစ်ပွားနေဆဲဟု သိရသည်။
