မြန်မာ – ထိုင်းနယ်စပ် တာချီလိတ် ချစ်ကြည်ရေး တံတား အမှတ် (၁) ကို ဖွင့်လှစ်လာပြီး (၇) ရက်မြောက်နေ့တွင် ဗုံး ၅ လုံး ပေါက်ကွဲမှုဖြစ်ပြီး ရပ်ကွက်အုပ်ချုပ်ရေးမှူး အပါအဝင် အရပ်သား ၅ ဦး ထိခိုက်ဒဏ်ရာရရှိခဲ့ကြောင်း သိရသည်။

ယမန်နေ့ (ဖေဖော်ဝါရီ ၂၇ ရက်) ညပိုင်း ၉ နာရီကျော်မှစပြီး တာချီလိတ်မြို့နယ် မကာဟိုခမ်းရပ်ကွက် ကြံ့ခိုင်ရေး နှင့် ဖွံ့ဖြိုးရေးပါတီရုံး အနီးတွင် ဗုံး (၅) လုံး ပေါက်ကွဲမှုဖြစ်ပြီး ရပ်ကွက်အုပ်ချုပ်ရေးမှူးအပါအဝင် အရပ်သား ၅ ဦး ထိခိုက်ဒဏ်ရာ ရရှိခဲ့ကြောင်း ပြည်သူ့ကာကွယ်ရေးတပ်ဖွဲ့ အရှေ့ပိုင်းနဂါးမှ တာဝန်ခံတစ်ဦးက ပြောသည်။

“ စစ်ကောင်စီ နဲ့ အပေါင်းအပါတွေကို တိုက်ခိုက်တာမျိုးပါ။ သူတို့ဖက်က ထိခိုက်တာ နှစ်ယောက်ရှိတယ်။ ကျန်တာတွေက ပြည်သူလို့လည်း ပြောတယ်။ သေချာစုံစမ်းနေတာ မသိရသေးဘူး။ နှစ်ယောက်က အုပ်ကြီးနဲ့ ပါတီဝင်လို့ သိထားရတယ် “ ဟု တာဝန်ခံတစ်ဦးက ပြောသည်။

အဆိုပါ ဗုံး (၅) လုံး ပေါက်ကွဲမှုကြောင့် အနီးနားတဝိုက်ရှိ အမျိုးသား (၅) ဦးသည် ထိခိုက်ဒဏ်ရာ ရရှိခဲ့ကြောင်း သွားရောက်ကူညီသူ လူမှုကူညီရေးအသင်းထံမှ သိရှိရသည်။

ထို့အပြင် ဗုံးပေါက်ကွဲမှု နှင့် ပတ်သက်ပြီး တာချီလိတ် – မယ်ဆိုင် တံတားအမှတ် (၁) ကို ပြန်လည်ပိတ်သွားမည်ကို နှစ်နိုင်ငံ အသွားအလာ ပြုလုပ်သူ ဒေသခံများက စိုးရိမ်နေကြောင်း တာချီလိတ် နယ်စပ်ဒေသခံ အမျိုးသမီးတစ်ဦးက ပြောသည်။

“ အဲ့လို ဗုံးပေါက်ကွဲမှုတွေ ဆက်တိုက်ဖြစ်လာမှာကိုတော့ စိုးရိမ်တာပေါ့။ ပြီးတော့ တံတားပြန်ပိတ်သွားမှာကို ကြောက်တယ်။ မြန်မာပြည်ကို ပြန်ချင်တဲ့ သူဘဲဖြစ်ဖြစ်၊ ထိုင်းကို ပြန်ဝင်ချင်တဲ့သူဘဲ ဖြစ်ဖြစ် တံတားမဖွင့်ရင် ထိုင်းဘတ် (၁) သောင်း၊ (၂) သောင်း ပေးပြီး ခိုးဝင်ရတယ်။ အခု တံတားပြန်ဖွင့်တော့ အဲ့လောက်မကုန်ဘူး။ ပြန်ပိတ်သွားမှာကိုတော့ စိုးရိမ်တာပေါ့ “ ဟု ၎င်းအမျိုးသမီးတစ်ဦးက ပြောသည်။

ထို့အပြင် ပြည်သူများအနေဖြင့် စစ်ကောင်စီ အပေါင်းအသင်း နှင့် နေရာဒေသကို ဝေးရပ်ရာမှာ နေထိုင်ရန် ပြည်သူ့ကာကွယ်ရေးတပ်ဖွဲ့ အရှေ့ပိုင်းနဂါးက တိုက်တွန်းထားသည်။

“ ပြည်သူတွေကိုတော့ အစတည်းက သတိတော့ ပေးထားတယ်။ စကစ အပေါင်းပါတွေနဲ့ ဝေးဝေးနေဖို့၊ သူတို့နေရာတွေနဲ့လည်း ဝေးဝေးနေဖို့ အဓိကတော့ ပြည်သူတွေကို လုံးဝ မထိခိုက်စေချင်ဘူး။ အဲ့ကြောင့် သူတို့နဲ့ ဝေးဝေးနေကြပါ “ ဟု ၎င်း တာဝန်ခံ တစ်ဦးက ထပ်လောင်းပြောသည်။

ယင်း ဗုံးပေါက်ကွဲမှုသည် တာချီလိတ် – မယ်ဆိုင် တံတားအမှတ် (၁) ဖွင့်လှစ်လာပြီး (၇) ရက်မြောက်နေ့ အကြာမှာ ပထမဆုံးအကြိမ် ပေါက်ကွဲမှုဖြစ်ကြောင်း သိရသည်။