သျှမ်းပြည် တောင်ကြီးခရိုင် တောင်ကြီးမြို့နယ် အသုံးတော်ကျေးရွာအုပ်စု အတွင်းရှိ ပုံးအင်းဒေသ လယ်ယာများစိုက်ပျိုးရန် အဆင်မပြေသဖြင့် လယ်များရောင်းနေရကြောင်း စုံစမ်းသိရသည်။
ပုံးအင်းလယ်ယာမှ ထွက်သည့် စပါးသည် သျှမ်းပြည်တောင်ကြီးမြို့နယ်အတွက် တနှစ်သာ ဖူလုံသည်။
လက်ရှိမှာ တောင်သူလယ်သမားများအတွက် အစစအရာရာ ခက်ခဲလာသည့်အတွက် ပုံးအင်းတောင်သူအချို့သည် မွေးမြူရေး ကုမ္ပဏီတစ်ခုထံ ၎င်းလယ် ၁ ဧကကို မြန်မာကျပ်ငွေ ၁၂ သိန်း ပေးပြီး ဝယ်ယူနေကြောင်း သတင်းရရှိသည်။
သို့ရာတွင် လယ်ယာဧကများ အရောင်းအဝယ် ပြုလုပ်ရာ တစ်ဆင့်ခံ ပွဲစားများက လယ် ၁ ဧကကို မြန်မာကျပ်ငွေ ၈ သိန်းကျပ်သာ ဈေးနိမ်ပြီး ဝယ်ယူနေကြောင်း ဝမ်နောက်ဒေသခံ တောင်သူအမျိုးသမီးတစ်ဦးက ပြောသည်။
“ လယ်လုပ်ချိန် ရောက်ပြီဆို ရေကမကျသေးဘူး။ နောက်ကျမှ ကောက်စိုက်ရတာ ရေပြန်တက်ရင်လည်း စပါးက မဖြစ်သေးဘူး ရေထဲမြုပ်ပြီ။ အဲ့နေရာတွေမှာ လယ်လုပ်ဖို့အတွက် ခက်ခဲတယ်။ ကုမ္ပဏီ က တစ်ဧကကို ၁၂ သိန်းပေးပြီး ဝယ်တာ၊ ကြားခံ ပွဲစားတွေက တစ်ဧကကို ၈ သိန်း ဈေးနိမ်ပြီး လာဝယ်တာ။ အဲ့လောက်ဈေးနဲ့ တော့ ဘယ်သူမှ မရောင်းချင်ပါဘူး။ ဒါပေမယ့် အခုက စားဝတ်နေရေး၊ အခက်ခဲတွေ အမျိုးမျိုးကြောင့် ရောင်းကြတာပေါ့ “ ဟု ၎င်းကအမျိုးသမီးတစ်ဦးက ပြောသည်။
ယမန်နှစ် ၂၀၂၂ ခုနှစ် အတွင်းတွင် ပုံးအင်းမှာ အဆမတန် ရေကြီးရေလျှံဖြစ်ပွားမှုကြောင့် စပါးများပျက်စီးဆုံးရှုံးခဲ့ရပြီး တောင်သူများသည် စားဝတ်နေရေး ကြပ်တည်းလာသဖြင့် လယ်ယာဧကများကို ဈေးနှုန်းသက်သာစွာဖြင့် ရောင်းချနေရကြောင်း သိရသည်။
အလားတူ ဓာတ်မြေသြဇာ ဈေးနှုန်းအဆမတန် မြင့်တက်လာမှုကြောင့် တောင်သူများသည် လယ်ယာစပါးကို တစ်ဝက်လျှော့ စိုက်ရသလို စိုက်ပျိုးရန် လူအင်အားမရှိသည့် တောင်သူများမှာလည်း လယ်ယာဧကများကို ရောင်းချခဲ့ကြောင်း ဟိုတပ်ရွာဒေသခံ တောင်သူအမျိုးသမီးတစ်ဦးက ပြောသည်။
“ အခုမြေသြဇာ တစ်အိတ်ကို ကျပ် (၁) သိန်းကျော် ပေးပြီးဝယ်ရတာ။ ကုန်ကျစရိတ်ကလည်း အရင်နှစ် တွေထက် ပိုကုန်လာတယ်။ မြေသြဇာ၊ လယ်ထွန်စရိတ်၊ ဒီဇယ် အမျိုးမျိုး ဈေးတက်လာတယ်။ အခု လူအင်အားက မရှိတော့ဘူး။ ထိုင်းနိုင်ငံထဲကို သွားကြတော့ လယ်လုပ်မယ့်သူက အရမ်းကိုနည်းလာတယ်။ အဲ့ကြောင့် ရောင်းကြတယ် “ ဟု ဟိုတပ်ရွာဒေသခံ တောင်သူအမျိုးသမီးတစ်ဦးက ပြောသည်။
ပုံးအင်းဒေသရှိ လယ်ယာဧကများသည် ကျေးလက်ဒေသ ရွာလမ်းဘေး နှင့် နီးလျှင် အတိုင်းအတာ မြေ ၁ ပေကို ကျပ် ၁ သိန်းကျပ် ဈေးပေါက်နေပြီး ရေရှားပြဿနာ ကြုံရသည့် အချို့နေရာကို ဈေးနှုန်းအမျိုးမျိုးရှိကြောင်းသိရသည်။
“တကယ်လို့ ပုံးအင်းက လယ်ယာဧကတွေ ကုမ္ပဏီတွေကို ရောင်းပေးလိုက်မယ်ဆိုရင် နောက်ပိုင်း ကုမ္ပဏီတွေလည်း ဝယ်လာမယ်။ လယ်ယာ ဧကတွေ ကျဉ်းလာမယ်။ စီးပွားရှာတတ်တဲ့ ကုမ္ပဏီတွေတော့ အလုပ်ဖြစ်လာမှာပေါ့။ အခုက လယ်လုပ်မယ့်သူတွေ နည်းတော့၊ ဒီ လယ်ယာဧကတွေကို ရောင်းလိုက်တာပေါ့ “ ဟု ဝမ်နောက်ဒေသခံ အမျိုးသမီးတစ်ဦးက ထပ်လောင်းပြောသည်။
လက်ရှိ ရောင်းချခဲ့ပြီးသော ပုံးအင်းဒေသမှ လယ်ယာဧကများသည် စုစုပေါင်း ၃၀ ဧကရှိပြီ ဖြစ်ကြောင်း၊ နေ့စဉ်နေတိုင်း လယ်ယာဧက ရောင်းချမှုများ ပြုလုပ်နေကြောင်းကို သိရှိရသော်လည်း သျှမ်းသံတော်ဆင့်သတင်းဌာနမှ အတည်ပြု မရသေးပေ။
ပြီးခဲ့သည့် ၂၀၂၂ ခုနှစ် သြဂုတ်လပိုင်းတွင် ပုံးအင်းဒေသမှာ အဆမတန် ရေကြီးရေလျှံမှုဖြစ်ပြီး လယ်ယာဧက စုစုပေါင်း ၂ သောင်းဝန်းကျင်သည် ရေနစ်မြုပ်ခဲ့ကြောင်း သိရသည်။
