သျှမ်းပြည် မူဆယ်ခရိုင် မူဆယ်မြို့မှ မြို့မပြည်သူ့စစ် အမှတ် (၂) မှ နေအိမ်တွင် ဗုံးပေါက်ကွဲပြီး တစ်ဦးသေ၊ တစ်ဦးပြင်းထန်စွာ ထိခိုက်ဒဏ်ရာရသွားကြောင်း သတင်းသိရသည်။

ယနေ့ (ဖေဖော်ဝါရီ ၂၅) ရက် နံနက်ပိုင်း ၂ နာရီဝန်းကျင်တွင် မူဆယ်မြို့ စွမ်စော်ရပ်ကွက် အမှတ် (၂) မြို့မ ပြည်သူ့စစ် တပ်ဖွဲ့နေအိမ်ဖြစ်သည့် ကောင်း ဟော်တယ်ရှေ့ နေအိမ်အမှတ် စစ/၃၂ တန်းလျားတွင် ဗုံးပေါက်ကွဲမှု ဖြစ်ပွားခဲ့ပြီး တစ်ဦးသေ၊ တစ်ဦးက လက်နှစ်ဖက်ပြတ် ဒဏ်ရာပြင်းထန်စွာ ရသွားကြောင်း ဒေသခံများက သျှမ်းသံတော်ဆင့်ကို ပြောသည်။

“ဗုံးပေါက်တဲ့အချိန် အဲ့တန်းလျားမှာလည်း သူတို့နှစ်ယောက်တည်း ရှိနေတယ်လို့ ပြောပါတယ်၊ ပြီးတော့ နှစ်ဦး စလုံးကလည်း ဆေးသုံးကြတယ်၊ တစ်ဦးက ပွဲချင်းပြီး သေသွားပြီး နောက်တစ်ဦးကတော့ လက်နှစ်ဖက်လုံးပြတ် သွားတယ်၊ ဆေးကြောင်ပြီး ဖြစ်ကြတာ ထင်တယ်” ဟု မူဆယ်မြို့မှ အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ဗုံးပေါက်ကွဲမှု ဖြစ်ပွားသည့်နေရာသည် မူဆယ်မြို့ စွမ်စော်ရပ်ကွက် နေအိမ်အမှတ် စစ/၃၂ မှ ဖြစ်ပြီး မြို့မ ပြည်သူ့စစ် အဖွဲ့သည်လည်း တရုတ် အများစု ပါဝင်နေကြကြောင်း သိရသည်။

ဗုံးပေါက်မှု ဖြစ်ပွားပြီးနောက် လူမှုကူညီရေးအသင်းများက အလောင်း နှင့် ထိခိုက်ဒဏ်ရာ ရသူများကို ဆေးရုံသို့ သယ်ယူပို့ဆောင်ပေးကြောင်းလည်း သိရသည်။

မူဆယ်မြို့သည် မြန်မာ – တရုတ်နယ်စပ် ဒေသဖြစ်သည့်အတွက် လူဝင်လူထွက်များသည့်အပြင် တရားမဝင် ဂိမ်းဆိုင်၊ လောင်းကစားဆိုင်များ ပေါများပြီး ပြည်သူ့စစ်တပ်ဖွဲ့များမှ အဓိက လုံခြုံရေးယူပေးနေကြောင်း ဒေသခံများကပြောသည်။

“လောင်းကစားဝိုင်းတွေ၊ ဘားတွေ ကလပ်တွေမှာ အဓိက လုံခြုံရေးယူပေးတာက ပြည်သူ့စစ်တွေပေါ့၊ ပြီးတော့ တရုတ်လူမျိုးအများစုလည်း ဖြစ်နေကြတယ်၊ စွမ်စော်ရပ်ကွက်ထဲက ပြည်သူ့စစ်တပ်ဖွဲ့ဝင်တွေ ဆိုရင် ရပ်ကွက် ထဲ လာနေပြီး ရပ်ရွာလူကြီးတွေကို အကြောင်းကြားတာတွေလည်းမရှိဘူး၊ အခုလို ပြဿနာဖြစ်လာကာမှ လူကြီးတွေကို ပြေးခေါ်တာ” ဟု အမည်မဖော်လိုသူ ရပ်ရွာအရေးဆောင်ရွက်သည့် အမျိုးသား တစ်ဦးက ပြောသည်။

စွမ်စော်ရပ်ကွက်အတွင်း နေထိုင်သည့် ပြည်သူ့စစ်တပ်ဖွဲ့ဝင်များသည် ရပ်ကွက်အတွင်း နေထိုင်ကြောင်း ရပ်ရွာ လူကြီးများကို အကြောင်းကြားမှု မရှိသည့်အပြင် ဧည့်စာရင်းစစ်ဆေးမှု၊ ရပ်ရေးရွာရေး ကူညီ ထောက်ပံ့ပေးမှု များကိုလည်း မည်သည့်အခါမှ ပါဝင်ကူညီခြင်း မရှိကြောင်းလည်း သိရသည်။

ယင်းကဲ့သို့ မည်သည့်အချက်အလက်မှ ချိတ်ဆက်မှုမရသဖြင့် ရပ်ရွာလူကြီးများအနေဖြင့်လည်း လုံခြုံရေးပိုင်း နှင့် စီမံခန့်ခွဲမှုအပိုင်းတွင် အခက်တွေ့နေရကြောင်းလည်း ရပ်ရွာအရေးပါဝင်ဆောင်ရွက်နေသူများက ပြောဆိုနေကြသည်။

မူဆယ်မြို့သည် လောင်းကစားဝိုင်းများ ပေါများသည့်အပြင် လက်နက်ကိုင်အဖွဲ့အစည်းလည်း စုံလင်သည့် မြို့ ဖြစ်သည့်အတွက် မကြာခဏဆိုသလို ပေါက်ကွဲမှု ဖြစ်ပွားပြီး လက်နက်ကိုင်ဆောင်သူ အချင်းချင်း ပစ်ခတ်သတ်ဖြတ်မှု ပေါများသည့် ဒေသလည်းဖြစ်သည်။