သျှမ်းပြည် လွိုင်လင်ခရိုင် ပင်လုံမြို့ ရပ်ကွက် ၄ အတွင်း တည်းခိုခန်းတစ်ခုတွင် လာရောက်တည်းခိုခဲ့သူ (၂) ဦးသည် အခန်းခကို မရှင်းသည့်အပြင် ပိုင်ရှင်၏ ဖုန်းကိုပါ ခိုးယူသွားခဲ့ကြောင်း စုံစမ်းသိရှိရသည်။
ယနေ့ (ဖေဖော်ဝါရီ ၂၂) ရက် နေ့လည် ၁၂ နာရီခွဲဝန်းကျင်တွင် အခန်းခ ရှင်းရန်ဟုဆိုကာ တည်းခိုခန်း ပိုင်ရှင်၏ ဖုန်းခဏငှားဆက်ပြီး လုယူသွားခဲ့ကြောင်း ပင်လုံမြို့ ဒေသခံတစ်ဦးကပြောသည်။
“ သူတို့ ၂ ယောက်လာတာ။ အခန်းခ ရှင်းမယ်ဆိုပြီးတော့ ဖုန်းခန ငှားဆက်မယ်တဲ့။ သူများWave money ကနေ ပိုက်ဆံလွဲလာပေးမယ်ဆိုပြီးတော့ ငှားဆက်တာ။ ပိုင်ရှင်ကလည်း ဖုန်းပေးလိုက်ပြီးတော့ အခန်းထဲမှာ ကလေးခနပဲ သွားကြည့်တာ။ ပြန်ထွက်လာတော့ မရှိတော့ဘူး။ ဖုန်းလည်း ခိုးသွားတယ်။ အခန်းခလည်း မရှင်းသွားဘူး” ဟု ပင်လုံမြို့ ဒေသခံ တစ်ဦးက ပြောသည်။
လုယူသွားသည့် ဖုန်းသည် Oppo ဖုန်းဖြစ်ပြီး တန်းဖိုငွေ ၃ သိန်း ၇ သောင်းရှိသည့်အပြင် လာရောက် တည်းခိုခဲ့သည့်သူ (၂) ဦးသည် အမျိုးသမီးတစ်ဦး နှင့် အမျိုးသားတစ်ဦးတို့ ဖြစ်ကြောင်း သိရသည်။
လာရောက်တည်းခိုခဲ့သည့်သူသည် မှတ်ပုံတင်အတွင်း လွိုင်ကော်ဟု ရေးသားထားပြီး မှတ်ပုံတင်ပုံ နှင့် အပြင်မျက်နှာတို့ မတူကြောင်း တည်းခိုခန်း ပိုင်ရှင် နှင့် နီးစပ်သူက ပြောသည်။
“ သူတို့က မှတ်ပုံတင် အတုနဲ့လာတာလား မသိဘူး။ မှတ်ပုံတင် မျက်နှာ နဲ့ အပြင်က မျက်နှာ လုံးဝမတူဘူး။ မှတ်ပုံတင်ထဲမှာ လွိုင်ကော်လို့တော့ ရေးထားတယ်။ သျှမ်း ၊ ဓနုလို့တော့ ပြောတယ်။ မြန်မာပြည် ကလာတဲ့သူတွေနဲ့ တူတယ်” ဟု ၎င်းက ပြောသည်။
စစ်တပ် အာဏာသိမ်း ၂ နှစ်ကာလအတွင်း သျှမ်းပြည်အတွင်း ခိုးယူလုယက်မှု ၊ ဓားပြတိုက်မှု ၊ လောင်းကစား ၊ မူးယစ်ဆေးဝါး နေ့စဉ်ဖြစ်ပွားနေလျက်ရှိသည်။
ပင်လုံမြို့သည်လည်း လက်ရှိအချိန်ထိ မြို့အုပ်ချုပ်ရေးမှူး ဦးရာဇာအောင်က ဦးဆောင်ပြီး လောင်းကစားဝိုင်းများ ကို ဖွင့်လှစ်ထားပေးကြောင်း ဒေသခံများ ပြောပြချက်အရသိရသည်။
Leave a Comments