သျှမ်းပြည် တောင်ကြီးခရိုင် ဆီဆိုင်မြို့နယ် ပုံးအင်းဒေသတွင် ယခုနှစ် မြေသြဇာဈေးနှုန်း အဆမတန်မြင့်တက် လာသည့်အတွက်ကြောင့် တောင်သူများသည် ထက်ဝက်လျော့ပြီး လယ် စိုက်ပျိုးနေရကြောင်း စုံစမ်းသိရှိရသည်။

လယ်ယာစပါး ရေလွှမ်းမိုးခံခဲ့ရသည့် ပုံးအင်းဒေသမှ တောင်သူများသည် ယခုနှစ်တွင် လယ်ယာဧကများများ ရင်းနှီးစိုက်ပျိုးဖို့ရန် ဓာတ်မြေသြဇာ၊ လယ်ထွန်စရိတ်၊ ကောက်စိုက်စရိတ် စသည်ဖြင့် ကုန်ကျစရိတ် များပြားလာသည့်အတွက် လယ်ယာ ဧကကို တစ်ဝက်လျှော့ပြီး စိုက်ပျိုးနေရကြောင်း ပုံးအင်းတောင်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ စပါးဈေးတွေက တက်တယ်ပြောတာပါ။ မြေသြဇာဈေးနှုန်းနဲ့ ပြန်လာနှိုင်းကြည့်ရင် ဘယ်လောက်မှ မတက်ဘူး။ ပြီးတော့ စပါးတွေက ရေထဲမြှုပ်သေးတယ်၊ ဘာမှမကျန် မရောင်းလိုက်ရဘူး။ အခုတောင် တောင်သူတွေကမှ ဆန်တွေ ပြန်ဝယ်စားရတဲ့ အဆင့်ဖြစ်နေပြီ” ဟု ၎င်း အမျိုးသမီးတစ်ဦးက ပြောသည်။

အဆိုပါ စူပါဓာတ်မြေသြဇာအမျိုးအစား (၅၀) ကီလိုဂရမ်အိတ် တစ်အိတ်ကို (၁၅၀,၀၀၀) ကျပ်၊ ပုလဲဓာတ်မြေသြဇာ တစ်အိတ်လျှင် (၁၂၀,၀၀၀) ကျပ် အထိ ဈေးနှုန်းမြင့်တက်နေကြောင်း သိရသည်။

ထို့အပြင် အရင်းအနှီးများများ မရှိသည့်တောင်သူများသည် ကုမ္ပဏီတစ်ခုမှ ဓာတ်မြေသြဇာတစ်အိတ်ကို (၇၅,၀၀၀) ကျပ်ဖြင့် အကြွေးယူထားရပြီး စပါးရိတ်သိမ်းပြီးမှသာ ပြန်လည်အကြွေးဆပ်ရမည်ဖြစ်ကြောင်း သိရသည်။

“ လယ် ၁ ဧကကို အနည်းဆုံး စူပါတစ်အိတ်နဲ့ ပုလဲတစ်အိတ် ထည့်ပေးရတယ်။ မထည့်ရင်လည်း အထွက်နှုန်းက မကောင်းဘူးလေ။ အပြင်မှာ မြေသြဇာကလည်း ဈေးတက်တော့ သူများဆီက အတိုးနဲ့ယူရတာပေါ့။ အတိုးအပြီးစီး တစ်အိတ်ကို (၇၅,၀၀၀) ပေးရတယ်။ နောက်ပိုင်း စပါးရိတ်သိမ်းချိန်မှ ပြန်ပြီးအကြွေးဆပ်ရတာပေါ့ “ ဟု ၎င်း တောင်သူအမျိုးသမီးတစ်ဦးက ထပ်လောင်းပြောသည်။

ပုံးအင်းဒေသမှ တောင်သူများသည် နှစ်စဉ်နှစ်တိုင်း လယ်ယာစပါးများ ရေလွှမ်းခံရသဖြင့် ယခုနှစ် စပါးများ ရေလွှမ်းမိုးမခံရအောင် သက်ဆိုင်ရာဌာန ဆည်မြောင်းဦးစီးမှူးများအနေဖြင့် လာရောက်မြောင်းဖောက်လုပ် ပေးရန် တောင်သူများက တောင်းဆိုနေသည်။

“ မနှစ်က သူတို့မြောင်းဖောက်တာ မပြီးမစီး နဲ့ ရေတက်တော့ ရေအရမ်းကြီးခဲ့တာ။ ဒီနှစ်လည်း သူတို့ပြန်ဖောက်ပေးမှာလားတော့ မသိသေးဘူး။ ဖြစ်နိုင်ရင် ရေမတက်သေးတဲ့အချိန်မှာ မြန်မြန် ဖောက်လုပ်ပေးစေချင်တယ် “ ဟု ပုံးအင်းဒေသခံ တောင်သူအမျိုးသားတစ်ဦးက ပြောသည်။

စစ်တပ်က အာဏာသိမ်းပြီး ၂ နှစ်ကျော် ကာလအတွင်း စီးပွားရေး အဆမတန် ကျဆင်းလာနေသလို တစ်ဖက်တွင် ကျပ်ငွေ ဖောင်းပွမှုကြောင့် ကုန်ဈေးနှုန်း၊ ဓာတ်မြေသြဇာ၊ စက်သုံးဆီများသည် ယခင်ထက် ဈေးနှုန်းမြင့်တက်လာနေပြီး တောင်သူများ အပါအဝင် အခြေခံလူတန်းစားများ စားဝတ်နေရေး ပိုမိုကြပ်တည်း လာနေသည်။