မြန်မာ – ထိုင်းနိုင်ငံ နယ်စပ်ဒေသဖြစ်သည့် တာချီလိတ်မြို့တွင် ယခု (ဖေဖော်ဝါရီလ ၁၇ ရက်) ထိ ဓား၊ တုတ်ဖြင့် ရိုက်နှိက်မှု ၅ ကြိမ်ထက် မနည်း ဖြစ်ပွားနေကြောင်း စုံစမ်းသိရှိရသည်။

နယ်စပ်ဒေသဖြစ်သည့် တာချီလိတ်မြို့တွင် စစ်တပ်က အာဏာသိမ်းပြီးနောက်ပိုင်း လူအများအပြား လာရောက် အလုပ်လုပ်ကိုင်နေကြပြီး တချို့မှာ အလုပ်လက်မဲ့အဖြစ် အိမ်ခြေမဲ့ နေထိုင်သည့်လူများလည်း ယခင်ထက် ပိုများလာကြောင်း တာချီလိတ် ဒေသခံများထံမှ သိရသည်။

ထိုထဲတွင် မူးယစ်ဆေးဝါး သုံးစွဲသူများလည်း ယခင်နှစ်ထက် ပေါများလာကာ ဒေသခံ ဆိုင်ကယ် လုယက်မှု၊ ခိုးဆိုး လုယက်မှုများ ပြုလုပ်ပြီး မရလျှင် ဓား၊ တုတ်ဖြင့် ရိုက်နှိက်ပြီး ပစ္စည်းများ လုယူသွားကြောင်း တာချီလိတ် ဦးလှမိုး ပရဟိတအသင်းမှ တာဝန်ခံတစ်ဦးက ပြောသည်။

“ ဓား၊ တုတ် နဲ့ ရိုက်နှိက်မှုကတော့ ဒီလထဲမှာ ကျနော်တို့ ၃ ကြိမ်လောက် သွားကူညီခဲ့ပြီဗျ။ အဓိကတော့ မူးယစ်ဆေးဝါး သုံးစွဲတဲ့ သူတွေ၊ သူခိုး၊ ဓားပြတွေကပေါ့။ ဆိုင်ကယ်တွေ လုယူတယ်၊ မရရင် ဓား၊ တုတ်နဲ့ ရိုက်နှိက်တယ် “ ဟု ၎င်း တာဝန်ခံတစ်ဦးက ပြောသည်။

ပြီးခဲ့သည့် (ဖေဖော်ဝါရီ ၁၃ ရက်) မှစပြီး (ဖေဖော်ဝါရီ ၁၇ ရက်) ထိ သျှမ်းသံတော်ဆင့် သတင်းဌာနမှ မှတ်တမ်းစုစည်းထားရာ ရိုက်နှိက်မှု (၅) ကြိမ်ဖြစ်ပွားပြီး အမျိုးသား ၆ ဦးသည် ဦးခေါင်းပေါ်၌ ဓား၊ တုတ်ဖြင့် ရိုက်နှိက်ခံရသည့် ထိခိုက်ဒဏ်များ ရရှိခဲ့ကြသည်။

ထို့အပြင် ခေတ်ကာလ အခြေအနေ မကောင်းသည့် ကာလဖြစ်သဖြင့် ပြည်သူများ အနေဖြင့် အပြင်သို့ ထွက်တိုင်း မူးယစ်ဆေးဝါးသုံးစွဲသူများကို သတိပြုပြီး သွားလာကြရန် ၎င်းက တိုက်တွန်းထားသည်။

“မူးယစ်ဆေးဝါးဆွဲတဲ့ သူများလာတော့ အားလုံး သွားလာတဲ့ချိန်မှာ သတိထားဖို့၊ ဆင်ခြင် ဂရုစိုက်သွားလာကြပါ။ မူးယစ်ဆေးဝါး သားကောင်တွေက လူစိတ်ရှိသာ မဟုတ်ဘူး၊ လုပ်ချင်ရာ လုပ်ကြတယ်။ အဲ့တော့ သတိထားသွားလာကြပါ “ ဟု ၎င်းက တိုက်တွန်းထားသည်။

တာချီလိတ်မြို့တွင် ဓား၊ တုတ် ရိုက်နှိက်ခံရသူများ နေစဉ်ဆက်တိုက် ဆိုသလို ဖြစ်ပွားနေသော်လည်း သက်ဆိုင်ရာ ရဲတပ်ဖွဲ့များက ပြစ်မှုကျူးလွန်သူများကို လိုက်လံဖမ်းဆီးဆောင်ရွက်ပေးခြင်း မရှိသေးကြောင်း တာချီလိတ် ဒေသခံများထံမှ သိရှိရသည်။