ကချင်ပြည် ဖားကန့်မြို့နယ်အတွင်း စစ်ကောင်စီက မြို့ဝင်မြို့ထွက်များကို စစ်ဆေးရေးတင်းကြပ်နေပြီး ကုန်တင်ပို့မှုကို ပိတ်ထားသည့်အတွက်ကြောင့် မြို့တွင်းကုန်ဈေးနှုန်းများ အဆမတန် မြင့်တက်နေလျက်ရှိကြောင်း စုံစမ်းသိရှိရသည်။
ယခုလ ဖေဖော်ဝါရီထဲတွင် စစ်ကောင်စီက ဖားကန့်မြို့တွင်းသို့ ဝင်လာသည့် ကုန်တင်ကားများကို စစ်ဆေးပြီး မြို့တွင်းသို့ မပေးဝင်ကြောင်း မျက်မြင်တွေ့ရှိသူ တစ်ဦးက ပြောသည်။
“ ကျမတို့လည်း ဟိုနေ့လောက်မှပဲ မြို့ထဲ ပြန်ဝင်လာတာ။ တစ်ချို့ကားတွေက ပြန်လှည့်ပြန်သွားတာရှိတယ်။ ကားသမားတွေ ပြောပြတာတော့ ကုန်ပစ္စည်းတွေပါလို့ မပေးဝင်တာတဲ့။ ကုန်ပစ္စည်းတွေ ပါတဲ့ကားဆိုရင် သူတို့က အကြာကြီးထားတယ်။ မပေးဝင်ဘူး။ စစ်လည်းတော်တော်လေးစစ်တယ်” ဟု ဖားကန့်မြို့ ဒေသခံ အမျိုးသမီးက ပြောသည်။
ကုန်တင်ကားကြီးများကို စစ်ကောင်စီတွေက အချိန်ယူစစ်ဆေးပြီး အိမ်စီးကားများဖြင့် သယ်ဆောင်လာခဲ့သည့် ကားများကို စစ်ဆေးတင်းကြပ်မှု မရှိကြောင်း သိရသည်။
အဆိုပါ စစ်ကောင်စီက အခြေခံ စားသောက်ကုန်များကိုပါ မြို့တွင်းတင်သွင်းခွင့် မပြုသည့်အတွက်ကြောင့် ကုန်ဈေးနှုန်းများ မြင့်တက်လာပြီး ပြည်သူများ ယခင်ကထက် ခက်ခဲလာခဲ့ကြောင်း သိရသည်။
“ အခြေခံ စားသောက်ကုန်တွေတောင်မှ မပေးတင်တော့ ကုန်ဈေးနှုန်းတွေက ပိုပြီးမြင့်လာခဲ့တယ်။ တစ်နေ့လုပ် တစ်နေ့စားတဲ့ သူတွေအတွက်ကတော့ ပိုပြီး ခက်ခဲတာပေါ့။ နိုင်ငံရေးကြောင့် ဖားကန့်က ပြည်သူတွေတော့ ပိုပြီးခက်ခဲလာပါတယ်။ အကုန်လုံးကို ဈေးကြီးပေးဝယ်ရတယ်” ဟု ဒေသခံ က ပြောသည်။
အလားတူ လက်ရှိ ဆန်ဈေးနှုန်းသည် တစ်အိတ်ကို ၁ သိန်း ၂ သောင်းကျော်ရှိနေပြီး ယခင်က တစ်အိတ်ကို ၈ သောင်း ဝန်းကျင်သာရှိကြောင်း သိရသည်။
ဖားကန့်မြို့နယ်သည် မြန်မာနိုင်ငံတွင်း ကျောက်စိမ်းအများဆုံးထွက်သည့် နေရာ ဒေသတစ်ခုလည်းဖြစ်သည်။
ဖားကန့်မြို့နယ်တွင်း စစ်ကောင်စီ အပြင် ကချင်အမျိုးသားလွတ်မြောက်ရေးတပ်မတော် KIA ပါ သွားလာလှုပ်ရှားနေသည့် ဒေသဖြစ်သည်။
