သျှမ်းပြည် လွိုင်လင်ခရိုင် ပင်လုံမြို့ အုပ်ချုပ်ရေးမှူးသည် ပြည်သူများထံ ပိုက်ဆံ အဆမတန်ကောက်ယူပြီး လောင်းကစားဝိုင်းများ ပေါ်တင်ဖွင့်လှစ်နေကြောင်း စုံစမ်းသိရသည်။
ပင်လုံမြို့ထဲတွင် မြို့အုပ်ချုပ်ရေးမှူး ဦးရာဇာအောင် နှင့် ပအိုဝ်းအဖွဲ့အစည်း တချို့တို့ ပူးပေါင်းပြီး ရပ်ကွက် (၂) လေးဆူကုန်းဘောလုံးကွင်းရှိ လောင်းကစားဝိုင်းများသည် ၂၄ နာရီလုံး ဖွင့်လှစ်ထားပြီး၊ စတိတ်စင် အသံချဲ့စက်တို့ပါ ဖွင့်လှစ်သဖြင့် ပြည်သူများ ကောင်းမွန်စွာ မအိပ်စက်ရကြောင်း ပင်လုံမြို့ ဒေသခံများ သတင်းပေးပို့ချက်အရ သိရသည်။
“ ည ရောက်ပြီဆိုရင် ဖွင့်ပြီ ၊ မနက်မိုးလင်းတဲ့ အချိန်ထိ ဖွင့်နေတာပဲ။ အသံကလည်း အကျယ်ကြီးပဲ။ တစ်မြို့လုံး ကြားရတယ်။ ညတိုင်း ဆူညံနေတာ တမြို့လုံး ကြားနေရတယ်။ ပြည်သူတွေလည်း စိတ်ဒုက္ခရောက်တယ်။ ညကောင်းကောင်း မအိပ်ရဘူး” ဟု လုံခြုံရေးအရအမည် နှင့် နေရာ မဖော်ပြလိုသည့် ဒေသခံ အသက် ၅၀ အရွယ်ရှိ အမျိုးသမီးတစ်ဦးက ပြောသည်။
ထိုလောင်းကစားဝိုင်းတွင် ဖွင့်လှစ်ထားသည့် သီးချင်သံများကြောင့် အသက်ကြီးသူများအတွက် ကျန်းမာရေး ထိခိုက်မှုရှိနေကြောင်း ၊ လက်ရှိတွင်လည်း အထက်တန်းကျောင်းသားများ စာမေးပွဲ ဖြေဆိုရန် ဖြစ်သည့်အတွက်ကြောင့် ကျောင်းသားများ စာမကျက်နိုင်ကြောင်း သိရသည်။
“အသက်ကြီးတဲ့ သူတွေလည်း ကောင်းကောင်း မအိပ်ရဘူးလေ။ ပြီးတော့ အခုက ကျနော်တို့ ကျောင်းသားတွေ စာမေးပွဲ ဖြေဖို့ အချိန်လည်းနီးပြီ။ အဲ့အသံတွေကြောင့် စာတွေ ကောင်းကောင်းမကျက်နိုင်ဘူး” ဟု ပင်လုံမြို့တွင်းရှိ ကျောင်းသားတစ်ဦးက ပြောသည်။
ပင်လုံမြို့ အုပ်ချုပ်ရေးမှူး ဦးရာဇာအောင်သည် လောင်းကစားဝိုင်းများကို တညလျှင် ကျပ်ငွေ တစ်သိန်း အခွန်ကောက်ယူမှုရှိနေသည့် အပြင် ပင်လုံမြို့ရှိ ဓာတ်ဆီဆိုင် ၊ ပရိဘောဂဆိုင် နှင့် ကြက်ခြံ ၊ ကုန်စုံဆိုင်များထံလည်း ကောက်ယူမှုရှိကြောင်း နှင့် ထောက်ခံစာ အိမ်ထောင်စု ပြောင်းရန်အတွက်လည်း ငွေတောင်းခံကြောင်း ဒေသခံများထံမှ သိရသည်။
“သူက ပင်လုံမြို့ထဲမှာ ပိုက်ဆံကောက်ယူတာ အကြမ်းဆုံးပဲ။ ပင်လုံမြို့ အုပ်ချုပ်ရေးမှူးတွေထဲမှာ ပိုက်ဆံကောက်အကြမ်းဆုံးက သူပဲ။ လောင်းကစားဝိုင်းတွေမှာလည်း ယူတယ်။ ကုန်စုံဆိုင်၊ ဓာတ်ဆီဆိုင်တွေမှာလည်း ကောက်တယ်။ ပြီးတော့ ထောက်ခံစာတွေ လာယူရင်လည်း သူတောင်းတယ်။ ၅ သောင်း ကနေ ၁ သိန်းအထိ ပေးရတယ်။ သူ့ကြောင့် ပြည်သူတွေ ဒုက္ခ ရောက်တာ အများကြီးပဲ။ အရင်က အိမ်ဆောက်ဖို့ ကောက်တာလည်း သူပဲ” ဟု ဒေသခံများက ပြောသည်။
သို့သော် မြို့အုပ်ချုပ်ရေးမှူး ဦးရာဇာအောင်က ဒေသခံ ပြည်သူများထံ ငွေကောက်ယူမှု မရှိခဲ့ဖူးကြောင်း သျှမ်းသံတော်ဆင့် ကို ပြီးခဲ့သည့် ဒီဇင်ဘာ ၂၂ ရက်နေ့ မနက်ပိုင်းအချိန်က ဖြေကြားဖူးခဲ့သည်။
အဆိုပါ မြို့အုပ်ချုပ်ရေးမှူး ဦးရာဇာအောင်သည် ပင်လုံမြို့သို့ (၇) လကျော်ကြာ ရောက်ရှိလာပြီဖြစ်ကြောင်း သိရသည်။
ပင်လုံမြို့ထဲတွင် စစ်ကောင်စီ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တို့ သွားလာလှုပ်ရှားသည့် နယ်မြေ ဒေသဖြစ်သည်။
စစ်တပ် အာဏာသိမ်း ၂ နှစ်ကာလအတွင်း သျှမ်းပြည်အတွင်း လောင်းကစားဝိုင်း ၊ မူးယစ်ဆေးဝါး ၊ ခိုးယူမှုများ တစ်နေ့ထက်တစ်နေ့ များပြားလာခဲ့ပြီး ပင်လုံမြို့ အုပ်ချုပ်ရေးမှူး ဦးရာဇာအောင်ကို နေရာပြောင်းရွှေ့ ပေးရန်လည်း ပင်လုံဒေသခံများက တောင်းဆိုလိုက်သည်။
