ထိုင်းနိုင်ငံတွင် အနီရောင်စာအုပ် PJ နိုင်ငံကူး လက်မှတ်ကိုင်ဆောင်ထားသူများ နှင့် အလုပ်လုပ်ကိုင်ခွင့် (Work Permit) သက်တမ်းကုန်သူများ ၃ လ ထပ်တိုးမြှင့်ပေးနေကြောင်း ဘန်ကောက်မြို့ မြန်မာသံရုံးက (ဖေဖော်ဝါရီ ၁၄) ရက်စွဲတွင် ထုတ်ပြန်ထားသည်။

ထိုင်းနိုင်ငံ၌ အလုပ်လုပ်နေကိုင်နေသည့် မြန်မာရွှေ့ပြောင်းအလုပ်သမားထဲမှ အနီရောင်စာအုပ် PJ အမျိုးအစား နိုင်ငံကူး လက်မှတ်ကိုင်ဆောင်ထားသူများ အလုပ်လုပ်ကိုင်ခွင့် (Work Permit) ဖေဖော်ဝါရီ ၁၃ ရက်တွင် သက်တမ်းကုန်သူများကို မေ ၁၅ ရက်ထိ ဆက်လက်နေထိုင်ခွင့်ပြုသွားမည်ဟု ဘန်ကောက်မြို့ မြန်မာသံရုံး ထုတ်ပြန်ချက်တွင် ရေးသားထားသည်။

ထို့ကြောင့် သက်တမ်းကုန်ဆုံးသည့် သူများကို အလုပ်လုပ်ကိုင်ခွင့်အသစ် ရရှိရန် လိုအပ်သည့် စာရွက်စာတမ်းများနှင့် အတူ ယခု (ဖေဖော်ဝါရီ ၁၃ ရက်) မှစ၍ (မေ ၁၅ ရက်) ထိ လာရောက်လျှောက်ထားနိုင်ကြောင်းလည်း ရေးသားထားသည်။

အဆိုပါ သက်တမ်းကုန်ဆုံးသူများကို လျှောက်ထားဖို့ အချိန် ၃ လ ထပ်တိုးပေးခြင်းနှင့် ပတ်သက်ပြီး “ ဖေဖော်ဝါရီ ၁၃ ရက်မှာ သက်တမ်းကုန်သွားလို့ မတိုးရသေးတဲ့သူတွေ အတွက်တော့ ထပ်တိုးလို့ ရသွားတာပေါ့ဗျာ“ ဟု ထိုင်းရောက် မြန်မာရွှေပြောင်း အလုပ်သမား ခွန်ဟန်စိုးက ပြောသည်။

ထိုင်းနိုင်ငံတွင်း တရားဝင်နေထိုင်ခွင့် စာအုပ်ကို (ဖေဖော်ဝါရီ ၁၃ ရက်) မှ သက်တမ်းကုန်ဆုံးသွားပြီဖြစ်သော်လည်း မြန်မာသံရုံးမှ နောက်ထပ် လျှောက်ထားနိုင်ဖို့ အချိန် ၃ လ ထပ်တိုးမြှင့်ပေးနေခြင်း ဖြစ်သည်။

ထို့အပြင် မြန်မာရွှေ့ပြောင်းအလုပ်သမားဖက်မှ အလုပ်လုပ်ကိုင်ခွင့် လက်မှတ်၊ ကျန်မာရေး အာမခံ၊ ဗီဇာကြေး နှင့် ပွဲစားခများကို အများအပြားပေးဆောင်နေရသဖြင့် သက်တမ်းမတိုးဖို့ရန် အခက်ခဲများစွာ ကြုံတွေ့နေရသေးကြောင်း ဘန်ကောက်မြို့ မြန်မာရွှေ့ပြောင်းအလုပ်သမား စိုင်းမိန်းက ပြောသည်။

“အခက်ခဲကတော့ အများကြီးရှိတယ်၊ သူတို့ စကားသိပ်မတတ်တော့ သူတို့စီစဉ်သလို သူတို့ပြောသလို လိုက်လုပ်ရတယ်။ အစကတော့ စာရွက်စာတမ်း နဲ့ အလုပ်သမားကဒ်ကို (၁၁,၀၀၀) ဘတ်ပေးပြီးလုပ်တယ်၊ ဒါတောင် သက်တမ်းထပ်တိုးရတယ် (၁၂,၀၀၀) ဘတ် ထပ်ကုန်တယ်။ ဒီထဲ (CI) စာအုပ် လုပ်ဖို့ (၁၆,၀၀၀) ဘတ် ထပ်ကုန်အုံးမယ် “ ဟု စိုင်းမိန်းက ပြောသည်။

စစ်တပ်က အာဏာသိမ်းပြီးနောက်ပိုင်း ထိုင်းနိုင်ငံအတွင်းသို့ ရောက်ရှိနေသော မြန်မာရွှေ့ပြောင်းအလုပ်သမားများသည် လူသစ်စာရင်းထဲ၌ ရောက်ရှိသွားသဖြင့် ထိုင်းနိုင်ငံ တရားဝင်နေထိုင်ခွင့် စာအုပ်ကို သက်တမ်း တစ်နှစ်သာရရှိကြပြီး (ဖေဖော်ဝါရီ ၁၃ ရက်) ရောက်လာတိုင်း သက်တမ်းတိုးနေရကြောင်း သိရသည်။

“ကျမတို့က သူတို့ပြောတဲ့ လူသစ်စာရင်းထဲ ရောက်တော့ ၁ နှစ်ပဲ သက်တမ်းရမှာ အရမ်းနည်းတယ်။ ၇ လပိုင်း လုပ်ထားတယ် အခုမှရပြီး ချက်ချင်းသက်တမ်းပြန်တိုးရတော့ အတော့်ကို အဆင်မပြေဘူး။ ပိုက်ဆံမစုရဘူး၊ ဖြစ်နိုင်ရင်တော့ အရင်လူဟောင်းလို ၂ နှစ်ထားပေးရင် အဆင်ပြေတယ် “ ဟု နန်းခမ်းဟွမ်က ပြေသည်။

ထိုင်းရောက် မြန်မာရွှေ့ပြောင်းအလုပ်သမားများသည် ထိုင်းစကား၊ ထိုင်းစာဘာသာ အခက်ခဲရှိသောကြောင့် ကိုယ်တိုင်သွားရောက် သက်တမ်းတိုးခြင်း မပြုလုပ်နိုင်ရာ ပွဲစားမှစီစဉ်ပေးထားအတိုင်း လုပ်ဆောင်ရသဖြင့် ကုန်ကျစရိတ်မှာလည်း ပိုကုန်ကျနေကြောင်းလည်း သိရသည်။