သျှမ်းပြည် တာချီလိတ်ခရိုင် တာချီလိတ်မြို့နယ်အတွင်း၌ လေထုညစ်ညမ်းမှုကြောင့် ဒေသခံ ပြည်သူများ အသက်ရှုရ ခက်ခဲလာကြောင်း သတင်းသိရသည်။

ယခု ရက်ပိုင်းအတွင်း၌ တာချီလိတ်မြို့နယ်အတွင်း လေထုညစ်ညမ်းမှုသည် ယခင်ကထက် ပိုမိုများပြားလာပြီး အပြင်ထွက်ပါက အသက်ရှူရ ခက်ခဲကြောင်း ဒေသခံ အမျိုးသား ဦးစော က သျှမ်းသံတော်ဆင့်ကို ပြောသည်။

“အိမ်ထဲမှာ နေရင်တော့ မိုးအုံ့နေသလိုပဲ ခံစားရတယ်၊ ဒါပေမဲ့ အပြင်ထွက်ရင်တော့ လေထုညစ်ညမ်းမှုကြောင့် ဒီလိုဖြစ်နေမှန်းက သိသာတယ်၊ အသက်ရှုလို့လည်း မကောင်းဘူး၊ အပြင်မထွက်တာပဲ ကောင်းတယ်” ဟု ဦးစောက ပြောသည်။

ဖေဖော်ဝါရီလ (၁၁) ရက်နေ့ မှ (၁၃) ရက်နေ့အထိ (၃) ရက်ကြာ တိုင်းတာရရှိသည့် တာချီလိတ်မြို့နယ် ဝန်းကျင်ရှိ လေထု အရည်အသွေးသည် PM 2.5 အနီရောင်အဆင့် (Unhealthy ) အဆင့်တွင် ရှိနေကြောင်း တာချီလိတ်ခရိုင် ပတ်ဝန်းကျင် ထိန်းသိမ်းရေး ဦးစီးဌာနမှလည်း ထုတ်ပြန်ခဲ့သည်။

ထို့ကဲ့သို့ ဖြစ်နေသည့် အခြေအနေများကြောင့် ထိခိုက်လွယ်အုပ်စုများဖြစ်သည့် သက်ကြီးရွယ်အိုများ၊ ကလေး သူငယ်များ၊ ကိုယ်ဝန်ဆောင်များ၊ အသက်ရှူလမ်းကြောင်းဆိုင်ရာ ရောဂါရှိသူများ၊ နှလုံး ရောဂါရှိသူများ အနေဖြင့် မလိုအပ်ဘဲ နေအိမ်ပြင်ပသို့ ထွက်ခြင်းမှ ရှောင်ကြဥ်သင့်ပါကြောင်း နှင့် အပြင်ထွက်ပါက နှာခေါင်းစည်းတပ် သင့်ကြောင်းလည်း အသိပေး ထုတ်ပြန်ထားသည်။

ထို့အပြင် အနံ့ဆိုးများ ထွက်ခဲ့ဖူးသည့် တာချီလိတ်မြို့နယ် လွယ်သထုံကျေးရွာရှိ ကျောက်မီးသွေးသုံး ထုံးဖို စက်ရုံမှ အနံ့ဆိုးများ ထွက်ခြင်းမရှိသော်လည်း ဖုန်မှုန့်များ နှင့် လေထု ညစ်ညမ်းမှုက ရှိနေကြောင်းလည်း ဒေသခံများက ပြောသည်။

“ပွင့်လင်း ရာသီရောက်လာပြီ ဆိုတော့ အမှိုက်မီးရှို့တဲ့ အနံ့တွေလည်း ဆိုးလာတယ်၊ ပြီးတော့ ဖုန်တွေလည်း တအားထတယ်၊ Mask တပ်ပြီး အပြင်ထွက်သွားလို့ ပြန်လာရင် Mask လည်း ပေကုန်တာပဲ၊ ထုံးဖိုက တောင်ကုန်းပေါ်မှာ ရှိတော့ အဲ့ဘက်က လေတိုက်လာတဲ့ ဖုန်မှုန့်တွေ ရှိတယ်” ဟု ထုံးဖိုဒေသခံ တစ်ဦးက ပြောသည်။

တာချီလိတ်မြို့နယ် အတွင်း လေထုညစ်ညမ်းမှုသည် ပွင့်လင်းရာသီ ရောက်ချိန် နှစ်စဥ်နှစ်တိုင်း ဖြစ်ပေါ်နေလျက် ရှိသော်လည်း သက်ဆိုင်ရာ တာဝန်ရှိသူများက ကာကွယ်မှု၊ လေထုသန့်ရှင်းမှုများကို လုပ်ဆောင်ပေးမှု မရှိကြောင်းလည်း သိရသည်။