ချစ်သူများနေ့ ဟု အများသတ်မှတ်ထားသည့် ဖေဖော်ဝါရီလ ၁၄ ရက်တွင် ကချင်ပြည်နယ်၊ ဝိုင်းမော်မြို့နယ်၊ ဝါရှောင်ကျေးရွာရှိ ဝါရှောင်အပန်းဖြေ စခန်းကို သွားရောက်လည်ပတ်သည့် လူငယ် ၂၀ ဦးကို ကချင်လွတ်မြောက်ရေး တပ်ဖွဲ့ KIA က လူသစ်စုဆောင်းရန် ခေါ်ဆောင်သွားပြီး ညတွင်းချင်းပြန်လွှတ်ပေးခဲ့ကြောင်း သတင်း သိရသည်။

အဆိုပါ လူငယ် ၂၀ ဦးတွင် သျှမ်းလူငယ် ၁၃ ဦး ပါဝင်လျက်ရှိပြီး ဖမ်းဆီးခေါ်ဆောင်သွားသည့်အချိန် သျှမ်းလူငယ် များဖြစ်ကြောင်း နှင့် အသက်မပြည့်သေးကြောင်းသိရသည့်အတွက် စခန်းမရောက်ခင် လမ်းတစ်ဝက်မှာပင် ပြန်လွှတ် ပေးမည်ဟု အကြောင်းပြန်မှုရှိခဲ့ကြောင်း လူငယ်များပြန်လွတ်ရေးအတွက် အကူအညီပေးသည့် ဝါရှောင်ဆရာတော်က သျှမ်းသံတော်ဆင့်ကို မိန့်သည်။

“သူတို့ လူငယ်တွေဆိုတော့ လည်ကြတာပေါ့၊ အဲ့ဒီမှာ KIA အဖွဲ့က လူသစ် စုဆောင်းရေးလုပ်တဲ့ အချိန်နဲ့တိုးပြီး ဖမ်းခံရတာပါ။ ဆရာတော်တို့ ဒီဒေသမှာ က သျှမ်းရော ကချင်ရော ရှိပါတယ်။ အခုက သျှမ်းကလေးတွေ ပါသွားတော့ ဆရာတော်က ပြန်လွှတ်ပေးဖို့ ပြောလိုက်တော့ သျှမ်းကလေး ၁၃ ယောက်လုံးကို ညတွင်းချင်း ပြန်လွှတ်ပေးတယ်၊ မနေ့ညမှာတော့ လုံခြုံရေး အဖက်ဖက်ကြောင့် အဲ့ကလေးတွေကို ဆရာတော်ကျောင်းမှာပဲ ခေါ်ထားတယ်၊ ဒီနေ့ မနက်မှ သြဝါဒ ပေးပြီးတော့ ပြန်လွှတ်ပေးတယ်” ဟု ဝါရှောင်ဆရာတော်က သျှမ်းသံတော်ဆင့်ကို မိန့်သည်။

ဝါရှောင်အပန်းဖြေစခန်းသည် ဝါရှောင်ကျေးရွာအနီးတွင် တည်ရှိနေခြင်းဖြစ်ပြီး အဆိုပါ ဒေသသည် စစ်ကောင်စီ တပ်အပြင် KIA တပ်စခန်းများ ရှိနေသည့်အကြောင်း သိရသည်။

ဝါရှောင်အပန်းဖြေစခန်းသည် အခါကြီးရက်ကြီး နှင့် ပိတ်ရက်များတွင် လာရောက် အပန်းဖြေသူများ နှင့် စည်ကားလျက်ရှိပြီး ဖေဖော်ဝါရီ ၁၄ ရက်နေ့ Valentine Day (ချစ်သူများနေ့) တွင်လည်း လာရောက်လည်ပတ်သည့် လူငယ်များက KIA စစ်ကြောင်း နှင့် တိုးကာ ဖမ်းဆီးခံရကြောင်း သိရသည်။

ဒီဖြစ်စဥ်နှင့်ပတ်သက်ပြီး ကချင်လွတ်မြောက်ရေး တပ်မတော် KIA ပြောရေးဆိုခွင့် ဗိုလ်မှူးကြီး နော်ဘူထံ ဆက်သွယ် မေးမြန်းရာ ဖြစ်စဥ်အသေးစိတ်ကို မသိရသေးကြောင်းနှင့် လူငယ်များကို အကြောင်းမဲ့ ဖမ်းဆီးရင် ပေါ်လစီ မရှိကြောင်း သျှမ်းသံတော်ဆင့်ကို အကြောင်းပြန်သည်။

“ဒီလို လူငယ်တွေကို ဖမ်းဆီးတဲ့ အကြောင်းက ကျနော် မသိရသေးဘူး။ ဒါပေမယ့် လူငယ်တွေ အပြစ် တစ်စုံတစ်ရာ မရှိပဲ အကြောင်းမဲ့ ဖမ်းဆီးဖို့ က မဖြစ်နိုင်ပါဘူး၊ ကျနော်တို့ နယ်မြေထဲက ကျူးကျော်လာတဲ့ ရန်သူတွေ ကိုတော့ ခုခံပိုင်ခွင့်ရှိပါတယ်။ ဒီ ဝါရှောင်ဒေသမှာ ကျနော်တို့ လူသစ်စုဆောင်းဖို့အတွက်လည်း မရှိသေးဘူး” ဟု KIA ၏ ပြောရေးဆိုခွင့် ဗိုလ်မှူးကြီး နော်ဘူက သျှမ်းသံတော်ဆင့်ကို ပြောသည်။

ဝါရှောင်ဒေသသည် သျှမ်း နှင့် ကချင် စုပေါင်း နေထိုင်ကြခြင်းဖြစ်ပြီး သျှမ်းလူငယ်များ ယခုလို လူသစ်စုဆောင်း ခံရချိန် ကချင်ငြိမ်းချမ်းရေးအကျိုးတော်ဆောင်အဖွဲ့ PCG နှင့် ဝါရှောင်ဆရာတော်တို့ ဆွေးနွေးထားချက်အရ ဆရာတော်မှ အမြဲလိုလို ဝင်ရောက် ကူညီပေးလေ့ရှိကြောင်းလည်း ဝါရှောင်ဆရာတော်က ဆက်မိန့်သည်။

“ဒီလိုမျိုး ရံဖန်ရံခါ ကြိုကြားကြိုကြား သျှမ်းကလေးတွေကို လာရောက်ပြီးတော့ လူသစ်စုဆောင်းဖို့ ခေါ်တာတွေ ရှိတယ်၊ အဲ့လိုအခါကျရင် ဘုန်းဘုန်းတို့က ကချင်ငြိမ်းချမ်းရေး အကျိုးဆောင် PCG နဲ့ ဒီဘက်က သျှမ်းရွာတွေကို စစ်ဆင်ရေးတွေ စုဆောင်းရေးတွေ မလုပ်ဖို့ပေါ့နော်၊ အဲ့ကနေ KIA တွေကိုလည်း ပြောထားပေးတယ်လေ၊ ဒေသခံတွေအနေ နဲ့ ပုံမှန်အတိုင်းတော့ သွားလာနေကြတာ ရှိပါတယ်” ဟု ဝါရှောင်ဆရာတော်က သျှမ်းသံတော်ဆင့်ကို မိန့်သည်။

ဝါရှောင်ဒေသအတွင်းတွင် စစ်ကောင်စီ နှင့် KIA တပ်ဖွဲ့တို့၏ စစ်ကြောင်းလှုပ်ရှားမှုများ ရှိနေပြီး စစ်ဆေးရေးဂိတ်များ နှင့် ရှောင်တခင် စစ်ကြောင်း စစ်ဆေးမှုများလည်း ရှိသည့်အတွက် ပုံမှန်အတိုင်းပြည်သူများ သွားလာနေ ကြသော်လည်း လုံခြုံရေးအရ သတိထားသင့်ကြောင်းလည်း သိရသည်။