ကချင်ပြည်နယ် ဖားကန့်မြို့ မော်ရှန်ရပ်ကွက် ၊ ကယားမြေ တာယာရောင်းဝယ်ရေးဆိုင်တွင် အိမ်ဖော်ဖြစ်သူက အိမ်ရှင်ကို အဆိပ်ခတ်ပြီး ငွေများကို ခိုးယူရန် ကြိုးစားခဲ့ကြောင်း စုံစမ်းသိရှိရသည်။
ပြီးခဲ့သည့် ဖေဖော်ဝါရီ ၁၁ ရက်နေ့တွင် အိမ်ဖော်ဖြစ်သူက အိမ်ရှင်ကို အဆိပ်ခတ်ခဲ့သည့်အတွက်ကြောင့် ၄ ဦး ဆေးရုံသို့ တက်ခဲ့ရပြီး ခွေး ၃ ကောင် သေဆုံးသွားခဲ့ကြောင်း အဆိပ်ခတ်ခံရသည့် အိမ်ရှင်ဖြစ်သူက သျှမ်းသံတော်ဆင့်ကို ပြောသည်။
“သူ ဟင်းတွေထဲကို အဆိပ်ခတ်ထားတာ မသိဘူး။ အဲ့ဒါ ကျမက ဗိုက်ဆာလို့ ဝင်စားလိုက်တာ။ စားပြီး နာရီဝက်ကြာတော့ ခေါင်းတွေ မူးလာပြီး အန်တယ်။ အိမ်က အလုပ်သမား ၂ ယောက်ကလည်း စားတယ်။ ကျမ အမျိုးသားလည်း စားလိုက်တယ်။ ဟင်းတွေကလည်း မဲနေတော့ ကျမအမျိုးသားက မသိပဲ ခွေးတွေသွားကျွေးလိုက်တော့ ခွေးလေးတွေကလည်း အန်ပြီး သေသွားကြတယ်” ဟု အိမ်ရှင်ဖြစ်သူက ပြောသည်။
အဆိုပါ အဖြစ်ပျက်ကို အိမ်ရှင် က လူမှုကွန်ယက်ပေါ်တွင် တင်လိုက်ပြီးနောက်ပိုင်း ယမန်နေ့ ဖေဖော်ဝါရီ (၁၃) ရက်နေ့က အမည်မသိ အမျိုးသား ၅ ဦးမှ အိမ်ဖော်မလေးကို လာရောက်ဖမ်းဆီး ခေါ်ဆောင်သွားခဲ့ကြောင်း အိမ်ရှင်ဖြစ်သူက သျှမ်းသံတော်ဆင့် သတင်းဌာနကို ပြောသည်။
ထိုအမည်မသိ ၅ ဦးသည် အိမ်နေဝတ်စုံဖြင့် လက်ထိပ်ခတ်ပြီး လာရောက်ခေါ်ဆောင်သွားကြောင်း အိမ်ရှင်ဖြစ်သူက ဆိုသည်။
“သူ့ကို ဘယ်သူတွေလည်း မသိဘူး။ လာခေါ်သွားတယ်။ လာမေးပြီးတော့ လက်ထိပ်ခတ်ပြီး လာခေါ်သွားတယ်။ ရဲတွေလည်းမဟုတ်ဘူး။ အိမ်နေဝတ်စုံနဲ့ပဲ။ အဲ့လူတွေလာခေါ်သွားတော့ သူက ဝန်ခံတယ်။ သူ ခိုးတာဟုတ်တယ်တဲ့။ အဆိပ်ခတ်တာလည်း သူပဲတဲ့။ မသိစိတ်တစ်ခုနဲ့ပဲ လုပ်လိုက်မိတာပါလို့ပြောတယ်။ သူများ လာခေါ်သွားတော့ ပေးသွားလိုက်တယ်” ဟု အိမ်ရှင်ဖြစ်သူက ဆိုသည်။
အဆိုပါ အိမ်ဖော်မလေးသည် အသက် ၁၅ နှစ် အရွယ်ရှိပြီး ဖေဖော်ဝါရီ ၁ ရက်နေ့မှစပြီး အလုပ်လာလုပ်သူ ဖြစ်ကြောင်း သိရသည်။
ထို အိမ်ဖော်မလေး အလုပ်လာလုပ်ရာမှာ ဖုန်းများ မကြာခဏ ပျောက်မှုကြောင့် အိမ်ရှင်က CCTV တပ်ရာမှ မကျေနပ်သည့်အတွက်ကြောင့် အဆိပ်ခတ်ခဲ့ကြောင်း အိမ်ရှင်ဖြစ်သူက ပြောသည်။
ထိုအပြင် အိမ်တွင်း မီးဖိုချောင်းထဲတွင် CCTV မတပ်ထားရသည့်အတွက်ကြောင့် အိမ်ဖော်က အဆိပ်ခတ်နေတာကို သက်သေအနေဖြင့် ဗီဒီယို မရရှိထားကြောင်း ပြောသည်။
“သူ အလုပ်စလာလုပ်တော့ ဖုန်းတွေပျောက်တယ်လေ။ ကျမ ဖုန်းလည်း ခိုးတယ်။ ပြီးတော့ ဆိုင်မှာသွားရောင်းတာ။ အဲ့တာ ကျမတို့ CCTV တပ်လိုက်တာ။ မီးဖိုချောင်ထဲ မတပ်လိုက်ဘူး။ သူဖြစ်မယ်လို့ မထင်ထားဘူးလေ။ မတပ်ခင်မှာလည်း မီးဖိုချောင်ထဲ တပ်မှာလား လာမေးသေးတယ်။ ကျမတို့ ဆိုင်မှာ ကုမ္ပဏီတွေက တစ်ခါတစ်လေ ပိုက်ဆံလာရှင်းတာလည်း ရှိတယ်လေ။ သူ အဲ့တာတွေ မြင်ပြီးတော့ လိုချင်လို့ လုပ်လိုက်တာလား မသိဘူး” ဟု ၎င်းက ပြောသည်။
ဖားကန့်မြို့နယ်သည် ကျောက်စိမ်းတူးဖော်သည့် ဒေသတစ်ခုဖြစ်ပြီး ကချင်လွတ်မြောက်ရေးတပ်မတော် KIA နှင့် စစ်ကောင်စီတို့က သွားလာလှုပ်ရှားသည့် နေမြေဒေသဖြစ်သည်။
