သျှမ်းပြည် တောင်ကြီးခရိုင် မိုးဗြဲမြို့ ကျေးရွာများထဲတွင် စစ်ကောင်စီဘက်က စစ်အင်အားများ ဖြည့်တင်းနေသည့်အတွက်ကြောင့် တိုက်ပွဲအချိန်မရွေး ဖြစ်ပွားလာနိုင်ကြောင်း စုံစမ်းသိရှိရသည်။
အဆိုပါ စစ်ကောင်စီတပ်သည် မိုးဗြဲမြို့အတွင်း တင့်ကားတစ်စီးပါ ဝင်ရောက်အင်အားဖြည့်တင်းလာသည့် အတွက်ကြောင့် ဖယ်ခုံ – မိုးဗြဲ – လွိုင်ကော်လမ်းကို သွားလာခြင်း ပြည်သူ့ကာကွယ်ရေးဘက်က ယာယီပိတ်ထားလိုက်ကြောင်း ထုတ်ပြန်ထားသည်။
“စစ်ကောင်စီဘက်က အင်အားဖြည့်တင်းနေတာ။ တင့်ကားတွေနဲ့လည်း ဝင်လာတာရှိတယ်။ စစ်ဖြစ်လာနိုင်ဖို့ ရှိတယ်။ ပြင်ဆင်နေကြတာ။ အခုလည်း ထိတွေ့မှုတွေလည်း ရှိတယ်။ လမ်းတစ်ချို့ကလည်း သွားလာဖို့ ပိတ်ထားရတယ်။ မိုးဗြဲ – ပီကင်း သွားလမ်းတွေကိုလည်း ပိတ်ထားတယ်” ဟု မိုးဗြဲမြို့ ဒေသခံတစ်ဦးက ပြောသည်။
ယမန်နေ့ (ဖေဖော်ဝါရီ ၇) ရက်တွင်လည်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ မိုးဗြဲ – ပီကင်းလမ်းတွင်လည်း ထိတွေ့ တိုက်ခိုက်မှု အနည်းငယ်ရှိခဲ့ကြောင်း သိရသည်။
အလားတူ မိုးဗြဲ စက်တော်ရာ ကျေးရွာထဲတွင်လည်း စစ်ကောင်စီတပ်မှ တပ်စွဲနေထိုင်နေသည်။
စစ်ကောင်စီ စစ်အင်အားဖြည့်တင်းမှုကြောင့် တိုက်ပွဲ အချိန်မရွေး ဖြစ်ပွားလာနိုင်သည့်အတွက်ကြောင့် မိုးဗြဲမြို့ အနောက်ဘက်အတွင်းရှိ ကျေးရွာတချို့ မှ ပြည်သူများ ကြိုတင်ထွက်ပြေး တိမ်းရှောင်ကြပါရန် မိုးဗြဲ PDF က ထုတ်ပြန်ကြေညာထားသည်။
“ ကျနော်တို့က တိုက်ပွဲအခြေနေ တင်းမာနေတာရှိတယ်။ တိုက်ပွဲကတော့ ထိတွေ့မှုတွေ ရှိနေတယ်။ သူတို့ဘက်ကလည်း စစ်အင်အားတွေ ပိုပြီးဖြည့်လာနေတယ်။ ပြင်းထန်လာနိုင်ပါတယ်။ မိုးဗြဲမြို့ အနောက်ဘက်ရွာတွေ ကြိုတင်ရှောင်တိမ်းဖို့လည်း ကျနော်တို့ ထုတ်ပြန်ထားပါတယ်” ဟု မိုးဗြဲမြို့ PDF တပ်ဖွဲ့ဝင်တစ်ဦးက ပြောသည်။
အလားတူ ပြီးခဲ့သည့် ဖေဖော်ဝါရီ ၅ ရက်တွင်လည်း မိုးဗြဲမြို့ စက်တော်ရာ ကျေးရွာထဲတွင် တိုက်ပွဲဖြစ်ပွားခဲ့သည့် အတွက်ကြောင့် အဆိုပါ ကျေးရွာအနီးရှိ ရွာအချို့မှ ပြည်သူများ ညချင်းတွင်း ထွက်ပြေးတိမ်းရှောင်ခဲ့ရကြောင်း သိရသည်။
