သျှမ်းပြည် တောင်ကြီးခရိုင် ဖယ်ခုံမြို့နယ် နှင့် မိုးဗြဲမြို့တွင် စစ်ကောင်စီ နှင့် ပြည်သူ့ကာကွယ်ရေးတို့ တိုက်ပွဲဖြစ်ပွားခဲ့သောကြောင့် ပြည်သူများ ညတွင်းချင်း ထွက်ပြေးတိမ်းရှောင်ခဲ့ရကြောင်း စုံစမ်းသိရှိရသည်။
ယမန်နေ့ (ဖေဖော်ဝါရီ ၅) ရက်တွင် စစ်ကောင်စီ တပ်ဆွဲနေထိုင်ထားသည့် စက်တော်ရာ ကျေးရွာထဲကို ပြည်သူ့ကာကွယ်ရေးတပ်ဖွဲ့ PDF တို့က ဝင်ရောက်တိုက်ခိုက်ခဲ့သောကြောင့် ရွာတွင်းနေထိုင်သည့် ပြည်သူများက ထွက်ပြေးတိမ်းရှောင်ခဲ့ရကြောင်း သိရသည်။
စစ်ကောင်စီဘက်က တပ်ဆွဲနေထိုင်ထားသည့် စက်တော်ရာ ကျေးရွာထဲမှ တပ်ဆုတ်ပေးမည်ဟု ပြောဆိုခဲ့ပြီး တပ်မဆုတ်ပေးသည့်အတွက်ကြောင့် တိုက်ပွဲဖြစ်ပွားခဲ့ရကြောင်း မိုးဗြဲမြို့ ဒေသခံတစ်ဦးက သျှမ်းသံတော်ဆင့် ကို ပြောသည်။
“ စက်တော်ရာ ကျေးရွာကတော့ သူတို့တပ်ဆွဲထားတာကြာပြီ။ အဲ့ဒါ သူတို့တပ်ဆုတ်ပေးမယ်ပြောပြီး မဆုတ်ပေးလို့ PDF ဘက်ကလည်း ဝင်တိုက်ခိုက်လိုက်တာ။ စက်တော်ရာရွာကတော့ ပြည်သူတွေ ထွက်ပြေးနေတာကြာပြီ။ အဲ့ဘေးနားက ရွာကတော့ ညတွင်းထွက်ပြေးရတာရှိတယ်” ဟု မိုးဗြဲမြို့ ဒေသခံတစ်ဦးက ပြောသည်။
တိုက်ပွဲသည် လက်ရှိ ဖေဖော်ဝါရီ ၆ ရက်ထိ ဖြစ်ပွားနေလျက်ရှိပြီး ပြည်သူများကလည်း ဆက်လက်ထွက်ပြေးတိမ်းရှောင်နေရကြောင်း သိရသည်။
ထို့အပြင် ပြည်သူများက ထွက်ပြေးတိမ်းရှောင်ရာတွင်လည်း ဆိုင်ကယ် ၊ ကား လုံလောက်မှု မရှိသည့် အတွက်ကြောင့် ခက်ခဲနေကြောင်း စစ်ဘေးရှောင် ပြည်သူတစ်ဦးက ပြောသည်။
“ဘေးရွာက လူတွေ ရှောင်နေရတာလည်းရှိတယ်။ ညလည်းပစ်တယ်။ အခုလည်း ပစ်နေသေးတယ်. အခြေနေကတော့ လုံးဝမကောင်းဘူး။ တိုက်ပွဲဖြစ်တဲ့နေရာနဲ့ ကျနော်တို့နေတဲ့ နေရာက နီးနီးလေး။ မနေ့ညကတည်းက တစ်ချို့တော့ ရှောင်သွားကြပြီ။ ကျနော်တို့က ကားမရှိလို့ မရှောင်ရသေးဘူး။ လူဦးရေကတော့ များတယ်။ ခန့်မှန်းခြေအရလည်း ကျနော် မပြောနိုင်သေးဘူး” ဟု ၎င်းက ပြောသည်။
အလားတူ ကယား (ကရင်နီ) ပြည် ဝါရီကောခူရွာဒေသခံများကလည်း တိုက်ပွဲဖြစ်ပွားလာနိုင်သည့် အခြေအနေကြောင့် ကြိုတင်ထွက်ပြေးတိမ်းရှောင်နေလျက်ရှိကြောင်း သိရသည်။
ပြီးခဲ့သည့် ဇန်နဝါရီ ၂၄ ရက်နေ့တွင်လည်း စစ်ကောင်စီ နှင့် PDF တို့ တိုက်ပွဲဖြစ်ပွားခဲ့ပြီး စစ်ကောင်စီဘက်က လက်နက်ကြီး ရမ်းသမ်းပစ်ခတ်ခဲ့သောကြောင့် ပြည်သူနေအိမ်များ ပျက်စီးခဲ့သည်။
