သျှမ်းပြည် ကျောက်မဲခရိုင် သီပေါမြို့ မီးရထား (ဘူတာ) အနီးနှင့် မီးရထားသံလမ်းဘေး တလျောက် အိမ်ခြံမြေယာနှင့် နေအိမ်ဆောက်ပြီး နေထိုင်ကြသူများသည် တခြားနေရာသို့ ရွှေ့ပြောင်းနေထိုင်ရန် ဖိအားပေးခံနေရကြောင်း သတင်းရရှိသည်။
စစ်တပ်က အာဏာသိမ်းပြီးနောက်ပိုင်း သီပေါမြို့ မြန်မာရပ်ကွက်အပါအဝင် မီးရထားသံလမ်းဘေး တလျောက် အိမ်ခြံမြေယာနှင့် နေအိမ်ဆောက်ပြီး နေထိုင်သည့် အိမ်ခြေရာချီကို စစ်ကောင်စီ၏ လက်အောက်ခံ သက်ဆိုင်ဌာနများက တခြားနေရာသို့ ရွှေ့ပြောင်းနေထိုင်ရန် ဖိအားပေးနေကြောင်း သီပေါမြို့ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ အဓိကတော့ မီးရထားလမ်းဘေးမှာ နေထိုင်တဲ့သူတွေ ရွှေ့ရမယ်လို့ ကြားတယ်။ ရွှေ့ပြောင်းခံရမှာ အိမ်ခြေရာနှင့်ချီရှိတယ်။ ဘယ်ချိန်၊ ဘယ်ခါ ရွှေ့ပြောင်းရမယ်လို့တော့ မပြောသေးဘူး။ ရွှေ့ပြောင်းဖို့ အတွက်တော့ အကြောင်းကြားလာတယ် “ ဟု ၎င်းက ပြောသည်။
ကိုလိုနီခေတ်ကတည်းစပြီး ဘိုးဘွားခေတ်အဆက်ဆက်က ရွှေ့ပြောင်းနေထိုင်သူများနှင့် မီးရထား (ဘူတာ) အနီးရှိ အခြေခံလူးသားတန်းများသည် အိမ်ခြေရာချီရှိကြောင်းလည်း သိရသည်။
နှစ်ပေါင်း (၂၀) နီးပါးခန့် မီးရထားလမ်းဘေးအနီး၌ နေထိုင်သူများသည် လက်ရှိမှာ တခြားနေရာသို့ ရွှေ့ပြောင်းနေထိုင်ရန် အခက်ခဲများစွာကို စိန်ခေါ်နေရကြောင်း သီပေါမြို့ခံ အမျိုးသမီး တစ်ဦးက ပြောသည်။
“ စစ်ကောင်စီက ဘာအစီစဉ်ထပ်ဆွဲနေတာတော့ မသိဘူး။ မီးရထားလမ်းမှာ နေထိုင်သူက အခြေခံ လူတန်းစားတွေ၊ တစ်နေ့ရှာ တစ်နေ့စားမှ ဝမ်းဝတဲ့သူတွေ၊ ကလေးငယ်တွေ အများကြီးရှိတယ်။ ဒီခေတ်ကာလနဲ့ သူတို့နေရာရွှေ့နေရမယ်ဆိုရင်တော့ အရမ်းကိုခက်ခဲတယ် “ ဟု သီပေါမြို့ဒေသခံ အမျိုးသမီးတစ်ဦးက ပြောသည်။
အဆိုပါ နေရာရွှေပြောင်းမှုနှင့် ပတ်သက်ပြီး စစ်ကောင်စီသည် ၎င်းတို့၏ ဝန်းထမ်းများကို နေရာပြန်လည်ချ ထားရေးအတွက်ကြောင့် မီးရထားသံလမ်းဘေးအနီး နေထိုင်သူများကို ရွှေ့ပြောင်းခိုင်း ရခြင်းဖြစ်ကြောင်း ဒေသခံများ၏ ပြောချက်အရသိရသည်။
