စစ်ကောင်စီ၏ အတုအယောင် ရွေးကောက်ပွဲကို အားပေးထောက်ခံမှု ပြုသူများသည် စစ်ကောင်စီမှ ကျူးလွန်သည့် စစ်ရာဇဝတ်မှုများကို ဖုံးကွယ်ပေးထားရန် အသိအမှတ်ပြုသူများဟု မှတ်ယူမည်ဖြစ်ကြောင်း ချင်းမိုင်ရောက် မြန်မာပြည်သူများက ပြောဆိုလိုက်သည်။
အဆိုပါပြောဆိုမှုသည့် ယနေ့ ဖေဖော်ဝါရီလ ၁ ရက်နေ့တွင် ကျရောက်သော စစ်တပ်မှ နိုင်ငံတော်အာဏာ သိမ်းယူနေ့တွင် ချင်းမိုင် တက္ကသိုလ်ရှိ ထိုင်းနှင့် မြန်မာကျောင်းသား ကျောင်းသူများ၊ ချင်းမိုင်ရောက် မြန်မာ ပြည်သူပြည်သားများ စုပေါင်းပြီး စစ်အာဏာရှင် ဆန့်ကျင်ရေး အခမ်းအနား ပြုလုပ်ခဲ့သည်။
“ဒီကနေ့မှာ ကျမတို့က ဒီစစ်ကောင်စီရဲ့ အတုအယောင် ရွေးကောက်ပွဲကို ဆန့်ကျင်တယ်၊ လုံးဝလက်မခံနိုင် ပါဘူး ဆိုတဲ့ Message ကို ကျမတို့ ပြောခဲ့ပြီးပြီ၊ အဲ့ဒီအပေါ်မှာ နိုင်ငံတကာနဲ့ အာဆီယံက ဒီအချက်ကို သိထား ရက်နဲ့ ဒီအကြမ်းဖက် စစ်တပ်ရဲ့ ရွေးကောက်ပွဲကို လက်ခံမယ်ဆိုရင်လည်း သူတို့တွေသည် အကြမ်းဖက် စစ်အုပ်စုရဲ့ ပြစ်မှုတွေကို ဖုံးကွယ်ပေးချင်လို့ အသိအမှတ်ပြုတယ်လို့ပဲ ကျမတို့က သတ်မှတ်လိုက်မယ်” ဟု မယုလှိုင်သင်းက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ၂၀၂၀ ခုနှစ် ရွေးကောက်ပွဲအနိုင်ရ လွှတ်တော်ကိုယ်စားလှယ်များ နှင့် တခြား နိုင်ငံရေးတက်ကြွလှုပ်ရှား သူများကို စစ်တပ်က ဖမ်းဆီးပြီး အာဏာသိမ်းယူသည့် စစ်ကောင်စီမှ ကျင်းပသည့် ရွေးကောက်ပွဲကို ဆန့်ကျင် ကန့်ကွက်ရန် ရည်ရွယ်လုပ်ဆောင်ခြင်းဖြစ်ကြောင်း အခမ်းအနားကို အဖွင့်အမှာစကားပြောကြားသူ Justice Movement For Community -Innlay မှ မယုလှိုင်သင်းက ပြောသည်။
“ကျမတို့ မြန်မာနိုင်ငံက အကြမ်းဖက် စစ်အုပ်စုတွေဟာ ရွာလုံးကျွတ်မီးရှို့မှု၊ လူတွေကို မတရား ဖမ်းဆီး ညှင်းဆဲ သတ်ဖြတ်မှုကို ပြုနေကြတယ်၊ ဒီလိုကိစ္စတွေကို သူတို့အများကြီး ကျူးလွန်ဖောက်ဖျက် နေကြတယ်၊ ပြီးတော့ သူ့အတိုက်အခံပါတီဝင်တွေကိုလည်း ဖမ်းဆီးပြီးတော့ ရွေးကောက်ပွဲကို အတင်းအကြပ်စီစဥ်နေတာ လုံးဝလက်မခံနိုင်ဘူး၊ ဒီ အတုအယောင် ရွေးကောက်ပွဲကို ကျမတို့က အာဆီယံ နဲ့ နိုင်ငံတကာကို ချပြဖို့ လိုအပ်လို့ ဒီ Campaign ကို လုပ်ခဲ့တာ” ဟု မယုလှိုင်သင်းက သျှမ်းသံတော်ဆင့်ကို ပြောသည်။
လှုပ်ရှားမှု Campaign တွင် ဓာတ်ပုံပြပွဲ၊ စစ်အာဏာရှင်တို့ ကျူးလွန်ခဲ့သည့် ရာဇဝတ်မှု မှတ်တမ်းဗွီဒီယို ပြသခြင်း နှင့် အတူ အတုအယောင်ရွေးကောက်ပွဲ ဖြစ်ရပ်နှင့် အကျိုးဆက်တွေ အကြောင်း ဆွေးနွေးမှု လုပ်ဆောင်ခဲ့ကြသည်။
ထို့အပြင် စစ်အာဏာသိမ်းမှု ၂ နှစ်ပြည့်သည့်နေ့၌ ပြုလုပ်သည့် စစ်ကောင်စီ၏ အတုအယောင် ရွေးကောက်ပွဲဆန့်ကျင်ရေး လှုပ်ရှားမှုသို့ ပေးပို့သော KNU, KNPP, WLB, GSC, DPNS, GSCN, ၈၈ မျိုးဆက်ကျောင်းသား နှင့် တခြားသော အဖွဲ့အစည်းများစွာက ထုတ်ပြန်ချက်၊ အသိအမှတ်ပြုလွှာများကို ထုတ်ဖော်ပြသမှုလည်းပြုလုပ်ခဲ့သည်။
ယင်းနောက်တွင် ထိုင်းကျောင်းသားများ အဖွဲ့၏ အနုပညာသရုပ်ဖော်တင်ဆက်မှု၊ ကမ္ဘာမကြေ သီချင်းကို သံပြိုင်သီဆိုမှု ပြုလုပ်ခဲ့ပြီး မှတ်တမ်းဓာတ်ပုံ နှင့် ဗီဒီယိုများ ရိုက်ယူကာ အခမ်းအနားပြီးဆုံးခဲ့သည်။
