သျှမ်းပြည် မူဆယ်ခရိုင် မူဆယ်မြို့နယ် လေယာဉ်ကွင်းထဲတွင် ယနေ့ (ဖေဖော်ဝါရီ ၁) ရက် နံနက် ၉ နာရီခွဲဝန်းကျင်တွင် ဗုံးပေါက်ကွဲမှု ဖြစ်ပွားခဲ့ကြောင်း စုံစမ်းသိရှိရသည်။
အဆိုပါ လက်ရှိ လေယာဉ်ကွင်းထဲတွင် ဗုံးထပ်မံပေါက်ကွဲနိုင်သည့်အတွက်ကြောင့် ပြည်သူများ အသွားလာကို ကန့်သတ်ထားကြောင်း သိရသည်။
” ဒီနေ့ မနက် ၉ နာရီဝန်းကျင်လောက်မှာ လေယာဉ်ကွင်းထဲ ဗုံးပေါက်ကွဲသွားတာ။ လေယာဉ်ကွင်းဟောင်းထဲမှာ ပေါက်ကွဲသွားတာ။ အခုလည်း ထပ်ပြီးပေါက်ကွဲနိုင်တဲ့ အခြေနေရှိတယ်တဲ့။ အသွားလာကို ကန့်သတ်ထားတယ်” ဟု မူဆယ်မြို့ ဒေသခံတစ်ဦးက ပြောသည်။
အဆိုပါ ဗုံးပေါက်ကွဲမှုသည် မည့်သည်တပ်ဖွဲ့မှ လက်ရောက်လုပ်ဆောင်ထားခြင်းကို မသိရှိရသေးပေ။
အလားတူ ယနေ့ (ဖေဖော်ဝါရီ ၁) ရက်သည် စစ်တပ်က အာဏာသိမ်း ၂ နှစ်ပြည့်သည့်အတွက်ကြောင့် မူဆယ်မြို့နယ်ထဲတွင် အသံတိတ်သပိတ်ကို ပါဝင်ဆင်နွှဲမှုများလည်းရှိကြောင်း သိရသည်။
” ဘယ်အဖွဲ့လာထောင်သွားတာလဲတော့ မသိဘူး။ ဒါမဲ့ ဒီနေ့တော့ မူဆယ်မှာ အသံတိတ်သပိတ် လုပ်ကြတာ ရှိတယ်။ ဈေးတွေလည်း ပိတ်ထားတယ်။ တစ်ချို့ကတော့ ပုံမှန်သွားလာနေတာတော့ရှိတာပေါ့” ဟု မူဆယ်မြို့ ဒေသခံ အမျိုးသားက ပြောသည်။
ဗုံးပေါက်ကွဲမှုဖြစ်ပွားပြီးနောက် မူဆယ်မြို့တွင်းသွားလာသူများကိုလည်း စစ်ကောင်စီတပ်ဖွဲ့မှ စစ်ဆေးမှုတင်းကြပ်နေကြောင်း သိရသည်။
ယနေ့ (ဖေဖော်ဝါရီ ၁)ရက်စစ်တပ်အာဏာသိမ်း ၂ နှစ်ပြည့်သည့်အတွက် မြန်မာနိုင်ငံတစ်ဝှမ်းတွင် တစ်ချို့မြို့နယ်များတွင် အသံတိတ်သပိတ်ဖြင့် ဆန့်ကျင်ဆန္ဒပြလျက်ရှိသည်။
