သျှမ်းပြည် တောင်ကြီးခရိုင် တောင်ကြီးမြို့ စစ်တပ်၏ တပ်ပိုင်နယ်မြေအတွင်းရှိ ဆိုင်ခန်းများကို ဘူဒိုဇာကားနှင့် လာရောက် ဖြိုဖျက်ခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီ ၂၈) ရက် နံနက်ပိုင်းမှစတင်ကာ စစ်တပ်၏ တပ်ပိုင်နယ်မြေအတွင်းရှိနေသည့် ဆေးတပ်ရင်း အပါအဝင် အမှတ် (၂၆၂) တပ်ထိန်း၊ စုဆောင်းရေး တပ်ဖွဲ့ရုံး နှင့် GE တပ်နယ်မြေအတွင်း ရှိသည့် ဆိုင်ခန်းများကို စစ်ကောင်စီတပ်ဖွဲ့၊ ရဲတပ်ဖွဲ့ နှင့် ထွေအုပ်တို့က ဘူဒိုဇာကားဖြင့် ဆိုင်ခန်းများကို ဖြိုဖျက်ခဲ့ကြောင်း ဆိုင်ခန်းပိုင်ရှင်တစ်ဦးက သျှမ်းသံတော်ဆင့်ကို ပြောသည်။
“ ဆိုင်ခန်းတွေ မဖျက်ခင်တော့ ကိုယ်လိုချင်တာတွေ အကုန်ဖြုတ်ယူသွားလို့ရတာပေါ့။ သူတို့ လုံခြုံရေးအတွက် တပ်ကကော ၊ ရဲတပ်ဖွဲ့ကကော ပါတယ်။ ဘူဒိုဇာနဲ့ မနေ့က နေ့လည် ၁၂ နာရီခွဲလောက် လာဖျက်သွားတယ်။ ဖျက်ခံရတဲ့ နေရာတော့ ၄ နေရာလောက်ရှိတယ် “ ဟု ၎င်းကပြောသည်။
အဆိုပါ စစ်တပ်၏ တပ်ပိုင်နယ်မြေအတွင်းရှိ ဆိုင်ခန်းများကို ၂၀၂၃ ခုနှစ် ဇန်နဝါရီ ၂၈ ရက်နေ့မှာ နောက်ဆုံးထားပြီး ဖယ်ရှားခိုင်းထားကြောင်း ဆိုင်ခန်းပိုင်ရှင်များက ပြောသည်။
စစ်တပ်၏ တပ်ပိုင်နယ်မြေအတွင်း ဆိုင်ခန်း ဖွင့်လှစ်ရောင်းချနေရသော အခြေခံလူတန်းစားများသည် လက်ရှိတွင် ရွှေ့ပြောင်းရန် နေရာမရှိသေးကြောင်း မြို့ပေါ်ရှိ ဆိုင်ခန်းတစ်ခန်းမှာ ကျပ် ၂ သိန်းအထက် ဈေးနှုန်းမြင့်တက်နေသဖြင့် ငှားရမ်းရန် ခက်ခဲနေကြောင်း သိရသည်။
“တခြားနေရာတော့ ရှာရမှာပေါ့၊ ဘယ်မှာ ဖွင့်ရမှာတောင် နေရာအတိတကျ မရှိသေးဘူး။ တချို့နေရာမှာဆို ဆိုင်ခန်းက ဘယ်လောက်မှ မကျယ်ဘူး အနည်းဆုံး ကျပ် ၃ သိန်းပေးရတယ်။ တချို့ကလည်း ရွှေ့ဖို့နေရာရှိသလို တချို့ကလည်း ရွှေ့ဖို့နေရာမရှိသေးတော့ ပစ္စည်းတွေကို လမ်းမှာဘဲ ဒီတိုင်းထားထားရတယ် “ ဟု ၎င်းက ထပ်လောင်းပြောသည်။
လက်ရှိ စစ်တပ်၏ တပ်ပိုင်နယ်မြေအတွင်း ဖယ်ရှားပေးရသည့် ဆိုင်ခန်းများမှာ စုစုပေါင်း (၅၀၀) ကျော်ရှိပြီး အများစုမှာ ဆိုင်ခန်းအသစ်ထပ်မံ တည်ဆောက်ဖို့နှင့် ဆိုင်ခန်းငှားနေထိုင်ဖို့ရန် အခက်အခဲ ရှိနေကြောင်း သိရသည်။
အလားတူ တောင်ကြီးမြို့ အနောက်မြို့ပတ်လမ်းရှိ မောချယ်ဂိတ်ကိုလည်း ဖေဖော်ဝါရီ ၄ ရက်နေ့ နောက်ဆုံးထားပြီး ဖယ်ရှားဖို့ စစ်ကောင်စီ ညွှန်ထားကြောင်း သိရသည်။
