သျှမ်းပြည်ဒေသ၏ ရိုးရာစားဖွယ် ပြုလုပ်ပြီး တပိုင်တနိုင် စီးပွားရေး လုပ်ငန်းအဖြစ် လုပ်ကိုင်ကြသူများ ကုန်ကြမ်းဈေးတက်မှုကြောင့် အခက်အခဲ ကြုံနေရကြောင်း သတင်းရရှိသည်။
လက်ရှိ နိုင်ငံရေး အခြေအနေများကြောင့် သျှမ်းမရွေး ခေါ် ခေါက်(ဝ်)တော် လုပ်ရန်အတွက် လိုအပ်သည့် ကုန်ကြမ်းဈေးနှုန်းများ မြင့်တက်မှုကြောင့် ခေါက်(ဝ်)တော် လုပ်သူများက အရင်းအနှီး မကိုက်သဖြင့် အခက်အခဲများ ရှိနေကြောင်း သိရသည်။
ခေါက်(ဝ်) တော် (သျှမ်းမရွေး) လုပ်ရန်အတွက် လိုအပ်သည့် ဆန်ဈေးနှုန်း၊ ကြံဈေးနှုန်းများ မြင့်တက်လာမှုကြောင့် ခေါက်(ဝ်) တော် ဈေးနှုန်းလည်း အနည်းငယ် မြင့်တက်လာခြင်း ဖြစ်ကြောင်း သျှမ်းပြည် လွိုင်လင်ခရိုင် ပင်လုံမြို့မှ ခေါက်(ဝ်)တော် လုပ်ရောင်းသူ ပါနန်းယုံက သျှမ်းသံတော်ဆင့်ကို ပြောသည်။
“အရင်နှစ်တွေ တုန်းကတော့ ကြံဈေးနှုန်းကလည်း ဒီလောက်ဈေးမကြီးသေးဘူး၊ ဆန်တွေလည်း ဝယ်ရလွယ်ကူ ခဲ့တော့ ရောင်းရလွယ်တယ်လေ၊ အခုတော့ ကုန်ကြမ်းဈေးနှုန်းတွေ အားလုံး တက်လာတော့ ခေါက်(ဝ်)တော်လည်း ဈေးမြင့်ပြီး ရောင်းရတယ်၊ အခု ခေါက်(ဝ်) တော်က အစိပ်သား ၃,၀၀၀ ကျပ် ၊ တစ်ပိဿာကို ၁၂,၀၀၀ ကျပ်နဲ့ ရောင်းရတယ်၊ အရင်းကာမိရုံပဲ” ဟု ပါနန်းယုံက သျှမ်းသံတော်ဆင့်ကို ပြောသည်။
ခေါက်(ဝ်) တော် ဈေးနှုန်းများသည် နိုင်ငံရေး တည်ငြိမ်အေးချမ်းအချိန်၌ တစ်ပိဿာလျှင်ကျပ် ၁၀,၀၀၀ (တစ်သောင်း) ဖြင့်သာ ရောင်းချရသော်လည်း လက်ရှိတွင် တစ်ပိဿာကို ကျပ် တစ်သောင်းကျော် ရောင်းချနေရခြင်း ဖြစ်ကြောင်း ပါနန်းယုံက ပြောသည်။
ဈေးနှုန်းများ မြင့်ပြီး ပြုလုပ်ရောင်းချနေရသော်လည်း တခါတရံတွင် အရင်းပင် မရကြောင်း နှင့် ကုန်ကြမ်းဈေးနှုန်းများ မြင့်တက်လာမှု နှင့် ဈေးကွက် ရှားပါးလာမှုတွေကြောင့် လုပ်ရောင်းသူများလည်း နည်းပါးလာကြောင်း ခေါက်(ဝ်)တော်လုပ်သူ နန်းခမ်းအိမ်က သျှမ်းသံတော်ဆင့်ကို ပြောသည်။
“ဒီလုပ်ငန်းက ဝင်ငွေ အများကြီးလည်း မရပါဘူး၊ ဒါပေမဲ့ ရိုးရာစားဖွယ် သျှမ်းအစားအစာ ဖြစ်နေတော့လည်း လုပ်နေတာပဲ ၊ ကုန်စျေးနှုန်းကတက် အရောင်းအဝယ်က မဖြစ်တော့ ရှေ့ဆက်လုပ်ကိုင်ဖို့ လွယ်တော့ မလွယ်ဘူး၊ ဒါကြောင့် လုပ်သူတွေလည်း နည်းလာတယ်” ဟု နန်းခမ်းအိမ်က ပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် ပြည်တွင်း စီးပွားရေး နှင့် နိုင်ငံရေးအခြေနေ မတည်ငြိမ်မှု ဖြစ်ပေါ်လာပြီး ပြည်သူများ၏ တပိုင်တနိုင် ဝမ်းစာရှာဖွေရေး လုပ်ငန်းများ၊ ရိုးရာလုပ်ငန်းများတချို့ ဆိုင်းငံ့ထားရကြောင်း သိရသည်။
Leave a Comments