သျှမ်းပြည် မူဆယ်ခရိုင် နမ့်ခမ်းမြို့ သာယာကုန်းကျေးရွာထဲတွင် ခိုလုံလီရှော ရိုးရာယဉ်ကျေးမှု နှစ်သစ်ကူးပွဲတော်ကို အကြောင်းပြပြီး လောင်းကစားဝိုင်းများ ဖွင့်လှစ်နေကြောင်း သတင်းရရှိသည်။

အဆိုပါ ခိုလုံလီရှော နှစ်သစ်ကူးပွဲတော်ကို ဇန်နဝါရီ ၂၅ ရက်နေ့မှ ၃၀ ထိ ကျင်းပသွားမှာဖြစ်ပြီး နမ့်ခမ်းမြို့ ပန်းဆေးပြည်သူ့စစ်မှ လုံခြုံရေး အပြည့်ယူထားပေးကြောင်း သိရသည်။

“ လောင်းကစားဝိုင်းတွေက အများကြီးပဲရှိတယ်။ ၈၀ ရာခိုင်နှုန်းလောက်က လောင်းကစားဝိုင်းတွေပဲ။ ဘယ်သူ ဦးဆောင်ပြီး လုပ်တာလဲတော့ အတိကျမသိရဘူး။ ပန်းဆေး ပြည်သူ့စစ်တွေကတော့ အဝင်အထွက်တွေကို လက်နက်တွေနဲ့ လုံခြုံရေးယူထားပေးတယ်။ သူတို့ ခိုလုံလီရှော နှစ်သစ်ကူးပွဲကို အကြောင်းပြပြီးတော့ ဖွင့်ထားပေးတာ” ဟု နမ့်ခမ်းမြို့ ဒေသခံ အမျိုးသမီးတစ်ဦးက ပြောသည်။

အဆိုပါ နှစ်သစ်ကူးပွဲထဲတွင် လောင်းကစားဝိုင်း မျိုးစုံရှိထားပြီး လူမျိုးမရွေး လူငယ်တွေပါ သွားရောက်ဆော့ကစားနေလျက်ရှိကြောင်း သိရသည်။

လောင်းကစားဝိုင်းကို ဖွင့်လှစ်ထားသည့်နေရာသည် စစ်ကောင်စီ တပ်စခန်း နှင့်လည်း အနီးတွင် ရှိထားကြောင်း သိရသည်။

ထိုအပြင် နှစ်သစ်ကူးပွဲတော်ကို ညအချိန်တွင်လည်း အသံကျယ်ဖြင့် ပြုလုပ်နေသည့်အတွက်ကြောင့် ပြည်သူများအတွက် ညအိပ်ရေး ပျက်စေကြောင်း ဒေသခံများက ပြောသည်။

“နှစ်သစ်ကူး လုပ်တာတာ့ မပြောပါဘူး။ ဒါမဲ့ အသံတွေ အကျယ်ကြီးပဲ။ သီချင်းကလည်း လူမျိုးပေါင်းစုံ တက်ဆိုကြတယ်။ သူက မြို့နဲ့လည်း နီးတယ်လေ။ အသံတွေက အရမ်းကျယ်တော့ ညကောင်းကောင်း အိပ်လို့မရဘူး။ ကလေးကော၊ လူကြီးကော အိပ်ရေးပျက်တော့ ကျောင်းသွားရတာတွေ၊ အလုပ်သွားလုပ် ရတာတွေက အဆင်မပြေဘူးလေနော်” ဟု ဒေသခံများက ပြောသည်။

နမ့်ခမ်းမြို့ထဲတွင် စစ်တပ်က အာဏာသိမ်းပြီးနောက်ပိုင်း လောင်းကစားဝိုင်းကို ပေါ်တင်ဖွင့်လှစ်လာခွင့်ရှိပြီး တာဝန်ရှိ အစိုးရများကလည်း အရေးယူ ဆောက်ရွက်ပေးခြင်း မရှိပေ။

လွန်ခဲ့သည့် လပိုင်းတွင်လည်း မူဆယ်မြို့နယ် ဝိန်းနန်းကျေးရွာ တံတားဖွင့်ပွဲတွင်လည်း ပြည်သူ့စစ်များဦးစီးပြီး လောင်းကစားဝိုင်းများ ထည့်သွင်း ပြုလုပ်ခဲ့သည်။

လက်ရှိ သျှမ်းပြည်တစ်ဝှမ်းထဲတွင် လောင်းကစားဝိုင်း၊ မူးယစ်ဆေးဝါး၊ ခိုးယူလုယက်မှုများ ပိုများလာသည့် အတွက်ကြောင့် တာဝန်ရှိ ရဲ ၊ အစိုးရများမှ တာဝန်ယူ ဖြေရှင်းပေးစေလိုကြောင်း ဒေသခံများက ပြောဆိုကြသည်။