အကြားအလပ်မရှိ နိုင်ငံတော်အဆင့် ရွေးကောက်ပွဲ ကျင်းပနိုင်ရေးအတွက် အာဏာသိမ်း စစ်ကောင်စီ နှင့် အတူ ပြည်ထောင်စု ရွေးကောက်ပွဲ ကော်မရှင်တို့က နေပြည်တော်တွင် တွေ့ဆုံဆွေးနွေးခဲ့ကြကြောင်း သတင်း ထွက်ပေါ် လာခဲ့သည်။

အဆိုပါ တွေ့ဆုံဆွေးနွေးမှုတွင် နိုင်ငံရေးပါတီများ မှတ်ပုံတင်ခြင်း ဥပဒေ ပြင်ဆင်ပြဋ္ဌာန်းရေးနှင့် ပတ်သက်ပြီး ရွေးကောက်ပွဲဝင်မည့် တည်ဆဲ နိုင်ငံရေးပါတီများက မှတ်ပုံတင် ပြန်လည် တင်ရမည့်အကြောင်းလည်း ဆွေးနွေးခဲ့ကြကြောင်း သတင်း သိရသည်။

ယင်းကဲ့သို့ တည်ဆဲ နိုင်ငံရေးပါတီများက မှတ်ပုံတင် ပြန်လည် တင်ရခြင်း နှင့် ပတ်သက်ပြီး စစ်ကောင်စီ အနေဖြင့် ဒီမိုကရက်တစ် အင်အားစုများကို ပိုတင်းကြပ်နိုင်ကြောင်း နှင့် ၎င်းတို့ကို အားပေးထောက်ခံ သည့် ပါတီကိုသာ ဆက်လက် ရပ်တည်စေရန် ရည်ရွယ်ခြင်း ဖြစ်နိုင်ကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) ကျားခေါင်းပါတီက သျှမ်းသံတော်ဆင့်ကို ပြောသည်။

“နိုင်ငံရေးပါတီများ မှတ်ပုံတင်ခြင်း ဥပဒေကို တင်းတင်းကြပ်ကြပ် ထုတ်ပြန်လာပြီး စစ်ကောင်စီကနေပြီး ပြင်ဆင်ချင်တဲ့ ၂၀၀၈ ဖွဲ့စည်းပုံ အခြေခံ ဥပဒေ နဲ့ ပတ်သက်ပြီးတော့ ပါဝင်ချင်တယ်လို့ ပါလာလို့ရအောင်၊ ပါဝင်သင့် ပါဝင်ထိုက်တယ်လို့ သူတို့အနေနဲ့ ထင်မြင်ယူဆတဲ့ နိုင်ငံရေး ပါတီတွေကို နိုင်ငံရေး အဝန်းအဝိုင်းကနေ တွန်းထုတ်လိမ့်မယ်လို့ ကျနော်တို့က ယူဆတယ်ပေါ့နော်။ ဘာဖြစ်လို့လဲဆိုတော့ စစ်ကောင်စီ ဥက္ကဌကိုယ်တိုင်က နိုင်ငံရေးပါတီတွေ ဖောင်းပွနေတယ် ဆိုတဲ့ သဘောမျိုး သူပြောသွားတာကို ကျနော်တို့ ဖတ်ရတယ်၊ သူတို့ကို ထောက်ခံတဲ့ နိုင်ငံရေးပါတီတွေကိုတော့ နိုင်ငံရေး အဝန်းအဝိုင်းထဲမှာ ဆက်လက်လှုပ်ရှားနိုင်အောင် ဖန်တီး ပေးနိုင်မယ့် အနေအထားလို့ နားလည်ထားပါတယ်” ဟု ကျားခေါင်းပါတီ SNLD ၏ အထွေထွေ အတွင်းရေးမှူး စိုင်းလိတ် က သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၁၀ ခုနှစ်တွင်လည်း ၂၀၀၈ ဖွဲ့စည်းပုံ အခြေခံ ဥပဒေအရ ရွေးကောက်ပွဲအတွက် နိုင်ငံရေး ပါတီများကို မှတ်ပုံတင်အသစ် ပြန်လည်တင်ခိုင်းမှု ရှိခဲ့သော်လည်း နိုင်ငံရေးပါတီ အများစုက မှတ်ပုံတင်ခြင်း မရှိကြောင်း စိုင်းလိတ်က ဆက်ပြောသည်။

သျှမ်းပြည် အခြေစိုက် နိုင်ငံရေးပါတီတစ်ခုဖြစ်သည့် လားဟူဒီမိုကရက်တစ် အစည်းအရုံး (LDU) အနေဖြင့်လည်း စစ်ကောင်စီ၏ ရွေးကောက်ပွဲနှင့် ပတ်သက်ပြီး တုံ့ပြန်ရန် မရှိသေးကြောင်း အစည်းအရုံး၏ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ကျနော်တို့ အနေနဲ့တော့ ဒီရွေးကောက်ပွဲ ဝင်တာ မဝင်တာနဲ့ အခု နိုင်ငံရေး အခြေအနေနဲ့ ပတ်သက်ပြီး ပြောစရာ မရှိသေးဘူး” ဟု LDU မှ တာဝန်ရှိသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

သို့သော်လည်း စစ်ကောင်စီပြောခွင့်ရ ဒု – ပြန်ကြားရေးဝန်ကြီး ဗိုလ်ချုပ်ဇော်မင်းထွန်းက ရွေးကောက်ပွဲ ဖြစ်မဖြစ် မသေချာကြောင်း VOA သတင်းဌာနကို ပြောဆိုထားသည်။

လက်ရှိတွင် အာဏာသိမ်းစစ်ကောင်စီသည် နိုင်ငံ၏ တည်ငြိမ်အေးချမ်းမှုကို မနည်းကြိုးစားယူနေရသည့် အနေအထားဖြစ်သည့်အတွက် မိမိတို့ မျှော်မှန်းသည့် ဒီမိုကရေစီ နှင့် ဖက်ဒရယ် ရရှိရန်အတွက် ကိုယ့်နည်း ကိုယ့်ဟန်ဖြင့်သာ ကြိုးစားရယူမည်ဖြစ်ကြောင်း SNLD အထွေထွေ အတွင်းရေးမှူး စိုင်းလိတ်က ပြောဆို ထားသည်။

“စစ်ကောင်စီ ကိုယ်တိုင်က တိုင်းပြည်ကို တည်ငြိမ်အေးချမ်းအောင် လုပ်ပြီး ဖက်ဒရယ် ဒီမိုကရေစီ နိုင်ငံတည်ဆောက်ရေးဆိုပြီးတော့မှ ဘယ်လောက်ပဲ ကြွေးကြော်နေပါစေ သူတို့လုပ်ဆောင်နေတဲ့ အပိုင်းက ဒီမိုကရေစီ နဲ့ ဖက်ဒရယ်ကို လုပ်နိုင်တာထက် တည်ငြိမ်အေးချမ်းမှုကိုတောင် မနည်းကြိုးစားနေရတဲ့ အနေအထား ဖြစ်နေတယ်၊ ဒါကြောင့်မို့ တိုင်းရင်းသားပြည်သူ တစ်ရပ်လုံးကတော့ ကိုယ့်မျှော်မှန်းတဲ့ ဒီမိုကရေစီ နဲ့ ဖက်ဒရယ် ရဖို့ အတွက်တော့ နောက်တစ်နည်းတစ်လမ်းနဲ့ ကိုယ့်ဘာသာကိုယ် တော်တော်ကြိုးစား ရင်ဆိုင်ရမယ်လို့ ပြောချင် ပါတယ်” ဟု စိုင်းလိတ်က သျှမ်းသံတော်ဆင့်ကို ပြောသည်။

လက်ရှိအချိန်တွင် ရွေးကောက်ပွဲ ကျင်းပမည့် နေ့ရက် ရေရေရာရာ မသိရသေးချိန် ဖြစ်သည့် အတွက် သျှမ်းပြည် အခြေစိုက် နိုင်ငံရေး ပါတီများအနေဖြင့်လည်း ရွေးကောက်ပွဲဝင်ခြင်းနှင့် ပတ်သက်ပြီးသေချာရေရာမှု မရှိကြောင်း ပြောဆိုမှုများ ထွက်ပေါ်လာသည်။

ပြည်ထောင်စု ကြံ့ခိုင်ရေး နှင့် ဖွံ့ဖြိုးရေးပါတီ USDP ကမူ ပါတီအားကောင်းသည့် မြို့နယ်များကို သွားရောက် တွေ့ဆုံ ဆွေးနွေး မဲဆွယ်မှုများ စတင်လုပ်ဆောင်နေကြောင်းလည်း သိရသည်။

တဖက်တွင်လည်း စစ်ကောင်စီ၏ ရွေးကောက်ပွဲအတွက် စစ်ကောင်စီ လက်အောက်ခံ အုပ်စုများက သက်ဆိုင်ရာ မြို့နယ်အလိုက် တစ်အိမ်တက် တစ်အိမ်ဆင်း နှင့် အိမ်ထောင်စု နာမည်စာရင်းကို ဇန်နဝါရီ ၉ ရက်နေ့မှ စတင်ပြီး ကောက်ယူနေသည်။