သျှမ်းပြည် တောင်ကြီးခရိုင် မိုးဗြဲမြို့ထဲတွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားခဲ့ပြီး ပြည်သူနေအိမ် ပျက်စီးဆုံးရှုံးမှုများရှိခဲ့ကြောင်း စုံစမ်း သိရှိရသည်။
ယမန်နေ့ (ဇန်နဝါရီ ၂၄) ရက် ည ၉ နာရီဝန်းကျင်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့ မိုးဗြဲမြို့ ညောင်ဝိုင်းရပ်ကွက်ထဲ တိုက်ပွဲဖြစ်ပွားခဲ့ပြီး စစ်ကောင်စီက လက်နက်ကြီးကို ရမ်းသမ်းပစ်ခတ်ခဲ့သောကြောင့် ပြည်သူနေအိမ်များ ပျက်စီးဆုံးရှုံးခဲ့ကြောင်း သိရသည်။
“တိုက်ပွဲ ဖြစ်ပွားခဲ့တာပါ။ နှစ်ဦးနှစ်ဖက် ပစ်ခတ်ကြတာ။ စစ်ကောင်စီ နဲ့ PDF တို့ ပစ်ခတ်ကြတာ။ ဘယ်အဖွဲ့စည်းတွေပါလဲတော့ မသိဘူး။ နေအိမ်တွေ လက်နက်ကြီး ကျတာတွေရှိတယ်။ အခု လောလောဆယ်တော့ နေအိမ်တစ်လုံး မီးလောင် ဆုံးရှုံးသွားတာရှိတယ်။ လူထိခိုက်တာတော့ မကြားမိသေးဘူး” ဟု မိုးဗြဲမြို့ ဒေသခံတစ်ဦးက ပြောသည်။
အဆိုပါ တိုက်ပွဲ အနီးနားတွင် နေထိုင်သည့် ပြည်သူများက ရှောင်တိမ်းနေကြရပြီး တစ်ဖက်တွင်လည်း မြို့ထဲတွင် နေ့အချိန်မှာ ပုံမှန်သွားလာနေကြောင်း သိရသည်။ ထို့အပြင် တိုက်ပွဲသည် ညအချိန်မှ ဖြစ်ပွားလေ့ရှိကြောင်းသိရသည်။
“ တိုက်ပွဲဖြစ်တဲ့နေရာမှာ နေတဲ့သူတွေကတော့ ထွက်ပြေး တိမ်းရှောင်နေကြတာတော့ရှိပါတယ်။ တိုက်ပွဲကလည်း ညအချိန်ပဲ ဖြစ်တာများတယ်။ ဒါပေမယ့် မြို့ထဲမှာတော့ ပုံမှန်သွားလာနေတာတော့ ရှိပါတယ်” ဟု အထက်ပါ ဒေသခံက ပြောသည်။
အဆိုပါ တိုက်ပွဲ ဖြစ်ပွားရခြင်းသည် စစ်ကောင်စီက မြို့တွင်း ပြည်သူနေအိမ်တွေမှာ လိုက်လံနေထိုင်မှုရှိသောကြောင့် မြို့တွင်းမှ စစ်ကောင်စီတွေ ထွက်သွားပေးရန် ပြည်သူများက တောင်းဆိုကြသည်။
“တိုက်ပွဲကိုတော့ ဘယ်နေရာမှ မဖြစ်စေချင်ဘူး။ တိုက်ပွဲဖြစ်ရတာလည်း စစ်တပ်က သူတို့ တပ်စခန်းမှာမနေပဲ ပြည်သူရှိတဲ့ အိမ်မှာဝင်နေတော့ အဆင်မပြေဘူးလေ။ စစ်တပ်က မြို့ထဲက ပြည်သူတွေအိမ်မှာနေသ၍တော့ တိုက်ပွဲ ဆက်ရှိနေအုံးမှာပဲ။ စစ်တပ်တွေ သူတို့ တပ်စခန်းမှာပဲ သွားနေခိုင်းစေချင်တယ်” ဟု ဒေသခံများက ပြောသည်။
အလားတူ မိုးဗြဲမြို့ထဲတွင် လက်နက်ကြီးသံများ နှင့် တိုက်ပွဲဖြစ်ပွားမှု အချိန်မရွေး ဖြစ်ပွားနိုင်သည့် အတွက်ကြောင့် ပြည်သူများအနေဖြင့် နေအိမ်မှ မထွက်ကြရန် Mobye Rescue Team မှ ထုတ်ပြန်ထားသည်။
ပြီးခဲ့သည့် ဇန်နဝါရီ ၁၆ ရက်နေ့ ည ၇ နာရီဝန်းကျင်တွင် မိုးဗြဲမြို့ စစ်ဘေးရှောင်များရှိသည့်နေရာကို စစ်ကောင်စီမှ လက်နက်ကြီးတွေကို ရမ်းသမ်းပစ်ခတ်ခဲ့သောကြောင့် ပြည်သူ ၁ ဦး သေဆုံးခဲ့ရပြီး ၂ ဦး ထိခိုက်ဒဏ်ရာ ရရှိခဲ့ကြောင်း သိရသည်။
