Sunday, February 5, 2023

မူဆယ်မြို့ တရုတ်နှစ်သစ်ကူးချိန် သေနတ်ပစ်ဖောက် ပြည်သူနေအိမ် ထိမှန်

Must read

သျှမ်းပြည် မူဆယ်ခရိုင် မူဆယ်မြို့နယ်အတွင်းတွင် တရုတ်နှစ်သစ်ကူး ကျင်းပရာ၌ သေနတ်ဖြင့် ပစ်ဖောက်သဖြင့် ပြည်သူ့နေအိမ်များ ကျည်ဆံထိမှန်မှု ရှိနေကြောင်း သတင်း သိရသည်။

ပြည်သူ့နေအိမ်ထိမှန်သည့် ကျည်

မူဆယ်မြို့ပေါ် နှင့် ကောင်းမူးတုံရပ်ကွက်အတွင်း တရုတ်နှစ်သစ်ကူး ပွဲတော် ပြုလုပ်ရာ ပြည်သူ့စစ်များ က ၉ မမ သေနတ်များကို မီးရှူးမီးပန်း နှင့်အတူ ပစ်ဖောက်သဖြင့် အနီးရှိ ပြည်သူ့နေအိမ်များကို ကျည်ဆံ ထိမှန်ကြောင်း ဒေသခံများက သျှမ်းသံတော်ဆင့်ကို ပြောသည်။

“တရုတ်နှစ်သစ်ကူးမှာ ပြည်သူ့စစ်တွေက မီးရှူးမီးပန်းတွေ ပစ်ရင် သေနတ်အစစ်နဲ့လည်း ပစ်တယ်။ မိုးပေါ် ထောင်ပစ်တာ မဟုတ်ပဲ ၄၅ ဒီဂရီအောက်ကနေ ပစ်တာဆိုတော့ အိမ်တွေကို လာထိတယ်။ အခု ကောင်းမူးတုံ ရပ်ကွက်ထဲမှာပဲ ကျည်ထိတဲ့ နေအိမ် ၆ အိမ်ထက် မနည်းရှိတယ်။ မူဆယ်မြို့ပေါ်နဲ့ ပေါင်းရင် ၁၀ အိမ် ထက်မနည်းဘူး” ဟု ကောင်းမူးတုံ ရပ်ကွက်မှ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြော သည်။

မူဆယ်မြို့ပေါ်ရှိ ပြည်သူ့စစ် အဖွဲ့များ နှင့် လောပန်းများ၏ တရုတ်နှစ်သစ်ကူး ပွဲတော်ကျင်းပနေစဥ် သေနတ်ဖြင့် ပစ်ခတ်မှုကြောင့် နေအိမ်နံရံ နှင့် ခေါင်မိုးပေါ်သို့ ကျည်ဆံ ထိမှန်ကြောင်းလည်း အထက်ပါ အမျိုးသားက ဆက်ပြောသည်။

ပြည်သူ့နေအိမ်ထိမှန်သည့် ကျည်

ယင်းကဲ့သို့ သေနတ်ကျည်ဆံ အစစ်ပစ်ဖောက်မှုတွေကြောင့် အနီးရှိ ပြည်သူများကို ကျည်ဆန်ထိမှန်မှာကို စိုးရိမ်ရကြောင်းလည်း မူဆယ်မြို့နေ အမျိုးသား တစ်ဦးက ပြောသည်။

“မီးရှူးမီးပန်းဖောက်တာ နဲ့ သေနတ်သံနဲ့ဆို သိပ်မကွဲဘူး။ ပြီးတော့ သေနတ်ကို မိုးပေါ်တည့်တည့် ၉၀ ဒီဂရီ အနေအထား နဲ့ ထောင်ပစ်တာ မဟုတ်တော့ စောင်းပြီးပစ်တာက လူကို ထိနိုင်ခြေများတယ်။ အခုက အိမ်တွေကိုပဲ ထိတယ် ဆိုပေမဲ့ လူကိုလည်း ထိနိုင်တယ်လေ။ အရမ်းအန္တရာယ်များတယ်” ဟု မူဆယ်မြို့နေ နေအိမ်အတွင်း ကျည်ဆံကျသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် သေနတ်ကျည်ဆံများ ထိမှန်သည့် အိမ်နံရံ နှင့် ခေါင်မိုးများ အတွက် တာဝန်ယူ ပြင်ဆင် ဆောင်ရွက် ပေးမှုများလည်း မရှိကြောင်း အထက်ပါ မူဆယ်မြို့ခံ အမျိုးသားက ဆက်ပြောသည်။

“ပြည်သူ့စစ်တွေက သေနတ်ကိုင်တာ မဆန်းပေမဲ့ တချို့လောပန်းတွေကလည်း သေနတ်တွေ ပစ်ဖောက်တာတွေ ရှိတယ်။ ဒါပေမဲ့ သူတို့ ကျည်ဆံ ထိမှန်တဲ့ နေအိမ်တွေကိုတော့ ဘာမှ တာဝန်ယူပေးတာ မရှိဘူး။ ဖြစ်နိုင်ရင်တော့ တရုတ်နှစ်သစ်ကူးမှာ အရင်ကလို မီးရှူးမီးပန်းတွေ ဖောက်တာမျိုးလောက်ပဲ ဖြစ်စေချင်တယ်။ အန္တရာယ် နည်းတာပေါ့” ဟု ၎င်းက ပြောသည်။

နယ်စပ်မြို့ ဖြစ်သည့် မူဆယ်မြို့နယ်အတွင်း၌ စစ်တပ်မှ နိုင်ငံတော် အာဏာသိမ်းယူပြီး ၂ နှစ်နီးပါး ကြာလာသည့် အချိန် သေနတ်ကိုင်ဆောင်သူ အရင်ကထက် ပေါများလာပြီး လောပန်းများ၏ မွေးနေ့ နှင့် အိမ်သစ်တက်ပွဲများ မှာလည်း သေနတ်ပစ်ဖောက်မှု ရှိနေကြောင်း ဒေသခံများက ပြောသည်။

ပြီးခဲ့သည့် ၂၀၂၂ ခုနှစ်အတွင်းမှာလည်း မူဆယ်မြို့ မွေးနေ့ပွဲ ပါတီတစ်ခုအတွင်း သေနတ်ပစ်ဖောက်ရာ နေအိမ်အနီးရှိ ပြည်သူတစ်ဦး၏ ပုခုံးကို ကျည်ဆံရှပ်ထိမှန်ခဲ့သည့် ဖြစ်စဥ် ဖြစ်ပွားခဲ့သည်။

Leave a Comments

- Advertisement -spot_img

Latest article