သျှမ်းပြည် လင်းခေးခရိုင် လင်းခေးမြို့နယ်အတွင်းတွင် စစ်ကောင်စီမှ လူဦးရေစာရင်း စစ်ဆေးရာတွင် လဝက ရုံးမှ ပါလာသည့် အိမ်ထောင်စု စာရွက်ထဲ၌ ပြင်ပလူနာမည်များ ပါရှိနေကြောင်း စုံစမ်းသိရှိရသည်။
ပြီးခဲ့သည့် ဒီဇင်ဘာလ နှင့် ယခုလအတွင်း စစ်ကောင်စီက ရွေးကောက်ပွဲအတွက် သျှမ်းပြည်တစ်ဝှမ်း လူစာရင်းများ လိုက်လံစစ်ဆေးရာတွင် လဝက အိမ်ထောင်စု စာရင်းထဲက အမည်မသိသည့်သူများ ပါဝင်နေကြောင်း သိရသည်။
“ ဟိုနေ့က သူတို့လူစာရင်း လာကောက်တာ။ သူတို့ အိမ်ထောင်စုထဲမှာ ကျနော်တို့ အိမ်သား မဟုတ်တဲ့သူတွေရဲ့ နာမည်တွေ ပါထားတာတွေ့လိုက်ရတယ်။ ၂ ယောက်တောင် နာမည်ရှိထားတာ။ ဘယ်သူလဲတော့ ကျနော်တို့လည်း မသိဘူး။ ပြန်ပြောလိုက်တော့ သူတို့ ကောင်းကောင်း ပြန်ဖျက်ပေးပါတယ်” ဟု လင်းခေးမြို့ ဒေသခံ အမျိုးသားတစ်ဦး က ပြောသည်။
အဆိုပါ ဖြစ်ရပ်သည် လင်းခေးမြို့ပေါ်တွင် ဖြစ်ပွားခဲ့ပြီး ကျေးရွာဘက်တွင်လည်း ဒီထက်ဖြစ်ပွားနိုင်ကြောင်း ဒေသခံများက ပြောသည်။
တစ်ချို့ပြည်သူများက စစ်ကောင်စီ လဝက နှင့် အုပ်ချုပ်ရေးမှူးများကို ပြန်ပြောဆိုခြင်း မပြုလုပ်ရဲကြောင်း သိရသည်။
“မြို့ပေါ်မှာတောင် ၃ ရပ်ကွက်လောက်က အိမ်သားမဟုတ်တဲ့သူတွေ အိမ်ထောင်စုထဲမှာရှိနေတာကို ကြုံတွေ့နေရတာရှိတယ်။ တစ်ချို့ကလည်း လဝက နဲ့ အုပ်ချုပ်ရေးမှူးကို ပြန်မပြောရဲကြဘူး။ ကျေးရွာတွေဘက်မှာဆိုရင်လည်း ဒီလိုမျိုး အိမ်ထောင်စုထဲမှာ လူပိုတွေရှိနေတာများနိုင်တယ်” ဟု အထက်ပါ ဒေသခံက ပြောသည်။
စစ်ကောင်စီက လာမည့် ဩဂုတ်လတွင် ကျင်းပမည့် ရွေးကောက်ပွဲအတွက် ဇန်နဝါရီ (၉) ရက်နေ့မှစပြီး ယနေ့အထိ လူစာရင်းများကို လိုက်လံစစ်ဆေးနေလျက်ရှိသည်။
စစ်ကောင်စီသည် ၂၀၂၀ ရွေးကောက်ပွဲကို မဲ မသင်္ကာမှုဖြင့် အာဏာကို သိမ်းယူခဲ့ရာတွင် ၂ နှစ် နီးပါးရှိလာပြီဖြစ်ပြီး လာမည့် ၂၀၂၃ ဩဂုတ်လတွင် PR စနစ်ဖြင့် ရွေးကောက်ပွဲကို ပြန်လည် ပြုလုပ်သွားမည်ဖြစ်ကြောင်း သိရသည်။
Leave a Comments