သျှမ်းပြည် တာချီလိတ်ခရိုင် တာချီလိတ်မြို့တွင် ကား နှင့် ဆိုင်ကယ်တစ်စီး တိုက်မိပြီး ဆိုင်ကယ်ပေါ်မှ စည်ပင်သာယာရေး ဝန်ထမ်း လူငယ်တစ်ဦး သေဆုံးကြောင်း သတင်း သိရှိရသည်။

ယမန်နေ့ (ဇန်နဝါရီ ၂၂) ရက် ညနေပိုင်း (၆) နာရီတွင် တာချီလိတ်မြို့ ဗိုလ်ချုပ်လမ်းမ၊ ဝမ်ကောင်းတရားရုံးလမ်းဆုံတွင် ကားကြီးတစ်စီး နှင့် ဆိုင်ကယ်တစ်စီး တိုက်မိပြီး ဆိုင်ကယ်ပေါ်မှ အသက် ၂၃ နှစ် စည်ပင်သာယာရေး ဝန်ထမ်း မောင်စည်သူမှာ ဗိုက်ပေါက်ကာ ဦးခေါင်းထိခိုက် ဒဏ်ရာပြင်းထန်စွာရရှိသဖြင့် ပွဲချင်းပြီး သေဆုံးသွားကြောင်း တာချီလိတ် ဦးလှမိုး ပရဟိအသင်းမှ တာဝန်ရှိသူတစ်ဦးက သျှမ်းသံတော်ဆင့်ကိုပြောသည်။

“ကား နဲ့ ဆိုင်ကယ် တိုက်မိတာဗျ၊ ဆိုင်ကယ်ပေါ်က လူတော့ ကားကြီးအောက်ကို ရောက်သွားတယ်။ သူက စည်ပင်သာယာရေးဌာနက ဝန်ထမ်းတစ်ဦးပါဗျ။ ဝမ်းဗိုက်ပေါက်၊ ဦးခေါင်းထိခိုက် ဒဏ်ရာတွေနဲ့ ပွဲချင်းပြီး သေဆုံးသွားတယ် “ဟု ၎င်းက ပြောသည်။

အဆိုပါ ယာဉ်တိုက်မှုနှင့် ပတ်သက်ပြီး တာချီလိတ်ခရိုင် ရဲတပ်ဖွဲ့များက စစ်ဆေးမေးမြန်းပြီး အရေးယူဆောင်ရွက်မှုများ ပြုလုပ်နေကြောင်း သိရသည်။

ထို့အပြင် စစ်တပ်က အာဏာသိမ်းပြီးနောက်ပိုင်း မြန်မာ – ထိုင်းနယ်စပ်ဒေသဖြစ်သည့် တာချီလိတ်မြို့တွင် ရွှေ့ပြောင်း အလုပ်လုပ် နေထိုင်သူ များပြားလာသည်နှင့်အမျှ ယာဉ်စည်းကမ်း၊ လမ်းစည်းကမ်း မလိုက်နာသူများ ပေါများလာနေသလို မတော်တဆ ယာဉ်တိုက်မှုမှာလည်း မကြာခဏ ဖြစ်ပေါ်နေကြောင်းလည်း သိရသည်။

“ လူတွေက တဖြည်းဖြည်းများလာတယ်၊ မြို့ကလည်း ကျဉ်းတော့ အဲ့လိုယာဉ်စည်းကမ်း၊ လမ်းစည်းကမ်း မလိုက်နာတဲ့ သူတွေလည်း များလာတယ်။ ယာဉ်တိုက်မှု မကြာခဏဖြစ်တယ် အစ်ကိုတို့ အနေနဲ့ နှစ်ရက်တစ်ခေါက် အနည်းဆုံး သွားကူညီရတယ် “ ဟု ၎င်းကပြောသည်။

စစ်တပ်က အာဏာသိမ်းပြီးနောက်ပိုင်း ပြည်တွင်းတွင် စီးပွားရေးအဖက်ဖက်က ကျဆင်းနေပြီး လူငယ်များသည် နယ်စပ်ဒေသဖြစ်သည့် မူဆယ်၊ နမ့်ခမ်း နှင့် တာချီလိတ်မြို့တွင် ရှာဖွေအလုပ်လုပ်ကိုင်နေလျက်ရှိသည်။

တာချီလိတ်မြို့မှာ ယာဉ်မတော်တဆဖြစ်ပွားမှု ပျှမ်းမျှ နှစ်ရက်တကြိမ် သွားရောက်ကူညီရပြီး၊ တလလျှင် ၂၀ ကြိမ်ခန့် လူသေဆုံးမှုများနှင့် ထိခိုက်ဒဏ်ရာရသူများလည်း ရှိနေကြောင်း သိရသည်။