သျှမ်းပြည် တောင်ကြီးခရိုင် ရွှေညောင်မြို့ လှိုင်ဘုံသာ (၁) ကုန်းလှိုင်ရပ်ကွက်တွင် နေထိုင်သည့် အသက် ၁၈ နှစ်အရွယ် အမျိုးသမီးငယ်တစ်ဦးသည် (၁၀) ရက်ကြာ ပျောက်ဆုံးနေကြောင်း စုံစမ်းသိရသည်။

ဖြစ်စဉ်မှာ ဇန်နဝါရီ ၁၄ ရက် ညနေ ၂ နာရီဝန်းကျင်တွင် အသက် ၁၈ နှစ်အရွယ်ရှိ မယွန်းယွန်းထက်သည် သူငယ်ချင်းနှင့်အတူ မုန့်သွားစားမည်ဟုပြောပြီး နေအိမ်မှ ဆိုင်ကယ်တစ်စီး ထွက်သွားရာ ယနေ့ချိန်ထိ အိမ်ကို ပြန်လာခြင်းမရှိကြောင်း၊ ဖုန်းဖြင့် ဆက်သွယ်သော်လည်း ဖုန်းဆက်ပိတ်ထားသဖြင့် ၎င်း မိသားစုဝင်များက စိတ်ပူနေကြောင်း အဖွားဖြစ်သူက သျှမ်းသံတော်ဆင့်ကိုပြောသည်။

“ သူက သူငယ်ချင်းတွေနဲ့ တစ်နေနေရာမှာ မုန့်သွားစားမယ်လို့ ပြောတယ်။ သူ့ သူငယ်ချင်းတွေကလည်း အန်တီအိမ်ကို ရောက်လာပြီး သူနဲ့မတွေ့လို့ဆိုပြီး လာပြောပြတယ်။ ယောင်္ကျားခိုးပြေးတာလားတော့ မပြောတတ်ဘူး။ သူပျောက်သွားတာ ဒီနေ့နဲ့ဆို ၁၀ ရက်ကြာပြီ၊ ဖုန်းလည်းဆက်ပိတ်ထားတယ်။ ဘာသတင်းအချက်အလက်မှလည်း မကြားဘူး “ လို့ ၎င်းက ပြောသည်။

အဆိုပါ ပျောက်ဆုံးမှု နှင့် ပတ်သက်ပြီး သက်ဆိုင်ရာ ရဲတပ်ဖွဲ့ကို တိုင်ကြားထားခြင်း မရှိကြောင်းလည်း သိရသည်။

ထို့အပြင် နိုင်ငံရေး အခြေအနေ မတည်ငြိမ်မှုကြောင့် လူကုန်ကူး ရောင်းစားခံရခြင်းနှင့် အန္တရာယ် တစ်ခုခုဖြစ်မည်ကို ၎င်းမိသားစုဝင်များက စိုးရိမ်နေကြောင်း၊ မယွန်းယွန်းထက်ကို တွေ့ရှိပါက ဖုန်းနံပါတ် (09- 424 235 020၊ 09-762 729 628 နှင့် 09-970 225 142 ကို ဆက်သွယ်အကြောင်းကြားပေးပါရန် တိုက်တွန်းထားပါသည်။

စစ်တပ်က အာဏာသိမ်းပြီးနောက် သျှမ်းပြည်တွင် တရားဉပဒေ စိုးမိုးမှုပျက်ပြားလာပြီး စီးပွားရေးကျဆင်းမှု၊ ပညာရေး ကျဆင်းမှု စသည်ဖြင့် ပြည်တွင်းရှိ လူငယ်များမှာ နယ်စပ်ဒေသ နှင့် အိမ်နီးချင်းနိုင်ငံ ထိုင်းနိုင်ငံအတွင်းသို့ အလုံးအရင်းထွက်ပြေး တိမ်းရှောင်ကြသည်။