သျှမ်းပြည် တောင်ကြီးခရိုင် ပင်လောင်းမြို့ နှင့် နေပြည်တော် လမ်းမကြီးကြားတွင် စစ်ကောင်စီက လက်နက်ကြီး ရမ်းသမ်းပစ်ခတ်မှုကြောင့် ဒေသခံများ စိုးရိမ်နေကြရကြောင်း စုံစမ်းသိရှိရသည်။
ယမန်နေ့ (ဇန်နဝါရီ ၁၈ ) နှင့် ယနေ့ (ဇန်နဝါရီ ၁၉ ) ရက်တွင် စစ်ကောင်စီက ပင်လောင်းမြို့နယ် နမ့်ပန်ကျေးရွာ နှင့် လိန်းလီကျေးရွာကြား လက်နက်ကြီး ၊ လက်နက်ငယ် ပစ်ခတ်ခဲ့ကြောင်း သိရသည်။
“ မနေ့ မနက်တုန်းကတော့ လက်နက်ကြီးနဲ့ ပစ်တာ။ ဒီနေ့တော့ သေနတ်သံတွေပဲ ကြားနေရတာ။ တစ်ဖက်သတ် ပစ်ခတ်သံတွေပဲကြားရတာ။ စစ်ကောင်စီက တောထဲကို ပစ်သွားတာ။ တောထဲပစ်တော့ ပြည်သူတွေရဲ့ တောင်ယာတွေကို ထိသွားတယ်လေ” ဟု ပင်လောင်းမြို့ ဒေသခံတစ်ဦးက ပြောသည်။
အဆိုပါ လက်နက်ကြီးများကို ရမ်းသမ်းပစ်ခတ်မှုကြောင့် ပြည်သူများ၏ တောင်ယာထဲ ကျရောက်မှုရှိပြီး တောင်ယာထဲနေသည့် ပြည်သူများက မြို့ထဲပြောင်းရွှေ့လာရကြောင်း ဒေသခံများက ပြောသည်။
“ ကျနော်တို့ တောင်ယာတွေက မြို့နဲဝေးတော့ တောင်ယာထဲမှာ သွားနေတာရှိတယ်လေ။
လက်နက်ကြီးတွေ ပစ်လာတော့ စိုးရိမ်ပြီး မြို့ထဲပြန်ဝင်လာနေရတာရှိတယ်။ ဒါတွေက ကျနော်တို့အတွက် အခက်ခဲဖြစ်နေတယ်။ စိုးရိမ်စရာတွေဖြစ်နေတယ်” ဟု ဒေသခံများက ပြောသည်။
ပင်လောင်းမြို့နယ်ထဲတွင် စစ်ကောင်စီက မည်သည့်တပ်ဖွဲ့ နှင့် ပစ်ခတ်မှုရှိပြီး မည်သည့်တပ်ဖွဲ့ကို ပစ်ခတ်ကြောင်းကို မသိရှိရသေးပေ။
“တောထဲ ပစ်သွားတာဆိုတော့ ဘယ်သူကို ပစ်ချင်တာလည်းတော့ မသိဘူး။ ခြိမ်းခြောက်ပြီးပစ်တာ။ တောထဲကနေ ထွက်လာအောင် ပစ်ခတ်နေတာ။ ဘယ်တပ်ဖွဲ့ကို ရည်ရွယ်ပြီး ပစ်တာလဲတော့ အသေချာမသိရသေးဘူး” ဟု နမ့်ပန်ကျေးရွာ ဒေသခံတစ်ဦးက ပြောသည်။
ထိုအပြင် လက်ရှိ ပင်လောင်းမြို့နယ်ထဲတွင် စစ်ကောင်စီ နှင့် ပအိုဝ်းပြည်သူ့စစ် PNO တို့က စစ်ဆေးမှုများတင်းကြပ်နေလျက်ရှိကြောင်း သိရသည်။
ပင်လောင်းမြို့နယ်ထဲတွင် ယခုနှစ်အတွင်း ပစ်ခတ်မှုများသည် ပထမဆုံးအကြိမ်ဖြစ်ကြောင်း သိရသည်။
