သျှမ်းပြည် တောင်ကြီးခရိုင် ပင်လောင်းမြို့နယ်အတွင်း စစ်ဘေးရှောင် ခိုလှုံနေသည့် ကလေးငယ်တစ်ဦးနှင့် အမျိုးသားတစ်ဦးသည် ခွဲစိတ်ကုသမှု ကုန်ကျစရိတ် အကူညီ လိုအပ်နေကြောင်း သိရှိရသည်။

စစ်ရှောင်စခန်းမှ အသက် ၃ နှစ်အရွယ် ကလေးတစ်ဦးသည် ခြေထောက် ပေါင်တွင် မွေးရာပါ အဖုအတိပ် များဖြစ်ပြီး ခွဲစိတ်ရမည်ဟုဆိုသဖြင့် ပြီးခဲ့သည့် ၂၀၂၂ ခုနှစ် ဒီဇင်ဘာလ နောက်ဆုံးပတ်တွင် ပင်လောင်းမြို့နယ် ဆေးရုံမှ တစ်ဆင့် ပြည်နယ်ဆေးရုံ တောင်ကြီးမြို့သို့ ပို့ဆောင်ပြီး ခွဲစိတ်ကုသနေရကြောင်း သိရသည်။

အလားတူ အသက် ၄၀ နှစ် ဝန်းကျင် အမျိုးသားတစ်ဦးက အစာအိမ်ရောဂါ အခံရှိရာကနေ အစားအသောက် ပုံမှန်မရသည့်အတွက် အူတက်ပေါက်ဖြစ်ပြီး တောင်ကြီးဆေးရုံတွင် ခွဲစိတ်ကုသနေရကြောင်း ပင်လောင်းစစ်ရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ပေါင်ခွဲစိတ်ရတဲ့ ကလေးတစ်ယောက်က ရက် ၂၀ လောက်ကြာပြီရှင့်..။ ဆေးရုံကနေ မဆင်းလာ ရသေးဘူး။ သူက မွေးရာပါလို့ဘဲ ပြောရမလား ပေါင်ပေါ်မှာ အဖုအတိပ် အကြီးဖြစ်လို့ ခွဲစိတ်ရတာ။ နောက်တစ်ယောက် အူတက်ပေါက်ဖြစ်တာ၊ ခွဲစိတ်ဖို့ ကုန်ကျစရိတ်၊ စားစရိတ်၊ ဆေးရုံမှာ နေထိုင်စရိတ်တွေ ကျပ်သိန်း ၂၀ လောက်၊ အများကြီး လိုအပ်နေတယ် “ ဟု ၎င်း စစ်ရှောင်အမျိုးသမီးတစ်ဦးက ပြောသည်။

အရေးပေါ် ခွဲစိတ်ရန်လိုအပ်သည့် စစ်ရှောင် ကလေးတစ်ဦး နှင့် အမျိုးသားတစ်ဦးသည် ပင်လောင်းမြို့နယ် ဆေးရုံ၌ ကုသနေစဉ် ဆေးဝါးလုံလောက်မှု မရှိခြင်း နှင့် ကျန်းမာရေးစောင့်ရှောက်ပေးသူ ဝန်ထမ်းများ အားနည်းခြင်းကြောင့် ခွဲစိတ်မရသဖြင့် ၎င်းတို့မှာ ပြည်နယ်ဆေးရုံ တောင်ကြီးမြို့သို့ ခွဲစိတ်ရန် ပို့ဆောင်ရသည်ဟု သိရသည်။

ထို့အပြင် အလုပ်အကိုင် အခွင့်အလမ်း မရှိသည့် (ပင်လောင်း) မြို့က စစ်ရှောင်များမှာ အလှူရှင် ပြတ်တောက် လာသည့်ချိန်မှစပြီး ပုံမှန် ထမင်းမစားရခြင်း၊ ဆေးဝါးများ လုံလောက်မှု မရှိခြင်း စသည့်ဖြင့်ကြောင့် ရောဂါအခံရှိသူ စစ်ရှောင်အချို့မှာ ကျန်မားရေး စောင့်ရှောက်မှုမှာ ကျဆင်းလာရခြင်း ဖြစ်ကြောင်း သိရသည်။

“အူတက်ပေါက် ဖြစ်တဲ့တစ်ယောက်က အရင်က သူအစာအိမ်ရောဂါ ဖြစ်ဖူးတယ်တဲ့။ အခု အူမကြီး ထွက်ပေါက်သွားတဲ့ အဆင့်ထိဖြစ်သွားတာ။ သူက အစားအသောက်ကို ပုံမှန်မစားတာရယ်၊ ဆေးဝါး လုံလောက်မှု မရှိတာတွေကြောင့် အဲ့အဆင့်ထိ ဖြစ်သွားတာ “ လို့ ၎င်းနှင့် နီးစပ်သူ အမျိုးသမီးတစ်ဦးက ပြောသည်။

လက်ရှိ ပင်လောင်းမြို့နယ်အတွင်းသို့ ရောက်ရှိနေသည့် ကရင်နီ (ကယားပြည်) စစ်ဘေးရှောင် ဒေသခံပြည်သူများမှာ မှတ်ပုံတင် နှင့် အိမ်ထောင်စုဇယား ကိုင်ဆောင်ထားခြင်း မရှိသည့်အတွက် ခရီးသွားလာမှုလည်း ခက်ခဲနေဆဲဖြစ်ကြောင်း သိရသည်။

စစ်တပ်အာဏာသိမ်းပြီးနောက်ပိုင်း ၂ နှစ်နီးပါး ပင်လောင်းမြို့နယ်အတွင်း စစ်ဘေးရှောင် ခိုလှုံနေရသည့် စစ်ဘေးဒုက္ခသည် ဦးရေမှာ (၅,၀၀၀) ဝန်းကျင် ရှိကြောင်း သိရသည်။