သျှမ်းပြည် တာချီလိတ်ခရိုင် တာချီလိတ်မြို့နယ် တာလေမြို့ နားယောင်းအုပ်စု ရန်အောင်ကျေးရွာတွင် မူးယစ်ဆေးဝါး အလွန်အကျူး သုံးစွဲသည့် အမျိုးသား တစ်ဦးသည် အိမ်နီးချင်း သားအမိ ၂ ဦးကို ဓားဖြင့်ခုတ်ရာ ကလေးငယ် တစ်ဦးသေဆုံးသွားကြောင်း စုံစမ်းသိရှိရသည်။
ပြီးခဲ့သည့် ဇန်နဝါရီ ၇ ရက် ညနေ ၉ နာရီခွဲတွင် တာလေမြို့ နားယောင်းအုပ်စု ရန်အောင်ကျေးရွာတွင် နေထိုင်သည့် အမျိုးသားတစ်ဦးသည် မူးယစ်ဆေးဝါး သုံးစွဲပြီး အသိစိတ်လွှတ်ရာမှ မီးလှုံနေသည့် အိမ်နီးနားချင်း သားအမိ နှစ်ဦးကို ဓားဖြင့်ခုတ်ရာ အမျိုးသမီး ထိခိုက်ဒဏ်ရာရရှိပြီး၊ ကလေးငယ် သေဆုံးခဲ့ကြောင်း တာလေမြို့ လောကပါလ လူမှုကူညီရေးအသင်းမှ တာဝန်ရှိသူ တစ်ဦးက သျှမ်းသံတော်ဆင့်ကိုပြောသည်။
ဓားဖြင့် ခုတ်ခံရသည့် အသက် (၂၅) နှစ်အရွယ် အမျိုးသမီးသည် (ဘယ်) လက်တစ်ဖက်ကျိုးပြီး ဦးခေါင်းထိခိုက်ဒဏ်ရာ ရရှိခဲ့ကြောင်း အသက် (၅) နှစ် ဝန်းကျင်အရွယ်ရှိ သားဖြစ်သူသည် ဦးခေါင်းထိခိုက်ဒဏ်ရာ ပြင်းထန်စွာရရှိပြီး (ဇန်နဝါရီ ၈ ရက်) နံနက် ၇ နာရီခွဲခန့် ကျိုင်းတုံပြည်သူ့ဆေးရုံတွင် သေဆုံးသွားကြောင်း သိရသည်။
“ မီးလှုံနေတဲ့ သားအမိ ၂ ယောက်ကို အိမ်ထဲက ထွက်လာပြီး ဓားကောက် နဲ့ ပိုင်းခုတ်လိုက်တာဗျ။ သူက အသိစိတ်လွှတ်သွားလားတော့ မပြောတတ်ဘူး။ မိခင်ဖြစ်သူကတော့ ဘက်ဖက်လက်ကျိုးတယ်၊ ဦးခေါင်း ဒဏ်ရာရတယ်။ ကလေးကတော့ ဦးခေါင်းထိခိုက်ဒဏ်ရာ ပြင်းထန်လို့ ကျိုင်းတုံဆေးရုံကို ဆေးဝါးကုသရင်း ဆုံးသွားပြီ “ ဟု ၎င်းတာဝန်ရှိသူ တစ်ဦးက ပြောသည်။
အဆိုပါ ပြစ်မူကျုးလွန်ခဲ့သည့် အသက် (၃၆) နှစ် ဝန်းကျင် အမျိုးသားတစ်ဦးကိုတော့ သက်ဆိုင်ရာ တာလေမြို့ ရဲတပ်ဖွဲ့က ဖမ်းဆီးထားကြောင်း သိရသည်။
ထို့အပြင် စစ်တပ်က အာဏာသိမ်းပြီးနောက်ပိုင်း တာလေမြို့တွင် တရားစိုးမိုးမှု ပျက်ပြားလာသလို ကျေးရွာနှင့် ရပ်ကွက်တိုင်းတွင်လည်း မူးယစ်ဆေးဝါးသုံးစွဲသူများလာကြောင်း တာလေမြို့ဒေသခံ တစ်ဦးက ပြောသည်။
“ ကျနော် ကြုံဖူး၊ တွေ့ဖူးသလောက်တော့ မူးယစ်ဆေးဝါးသုံးစွဲတဲ့သူတွေက ကျေးရွာ နဲ့ ရပ်ကွက်တိုင်းမှာ လူငယ်၊ လူကြီးတွေ အယောက် ၂၀ လောက်ရှိတယ်။ နယ်မြေခံ ဌာနဆိုင်ရာတွေက မဖမ်းဘူးဗျ။ လောင်းကစားဝိုင်းကလည်း ပေါသေးတယ် “ ဟု ၎င်း ဒေသခံတစ်ဦးက ပြောသည်။
ပြီးခဲ့သည့် ၂၀၂၃ ခုနှစ် ဇန်နဝါရီ ၈ ရက် ညနေပိုင်း ၂ နာရီဝန်းကျင် ကျောက်မဲမြို့နယ် ကောင်းအက်ရွာနှင့် ငြိမ်းချမ်းရေး ကုန်းကြားတွင် မူးယစ်ဆေးဝါးသုံးစွဲပြီး အိမ်ခြေမဲ့ နေထိုင်သူ အမျိုးသားတစ်ဦး သေဆုံးခဲ့ကြောင်း သိရသည်။
Leave a Comments