သျှမ်းပြည် တောင်ကြီးခရိုင် ဆီဆိုင်မြို့နယ် ဆီဆိုင်မြို့တွင် နေထိုင်သည့် အရပ်သား၂ ဦးကို စစ်ကောင်စီ က ပြည်သူ့ကာကွယ်ရေးတပ်ဖွဲ့ PDF ကို ထောက်ပို့ပေးသည်ဟု စွပ်စွဲပြီး ဖမ်းဆီးခဲ့ကြောင်း စုံစမ်းသိရှိရသည်။
ပြီးခဲ့သည့် သီတင်းပတ်အတွင်း သျှမ်း- ကရင်နီ (ကယား)ပြည်နယ်စပ် ဆီဆိုင်မြို့နယ် ရေဖြူရွာမှာ နေထိုင်သည့် အမျိုးသားတစ်ဦးနှင့် ဆီဆိုင်မြို့ပေါ်မှာ စားသောက်ဆိုင်ဖွင့် လှစ်ထားသော အမျိုးသားတစ်ဦးကို ပြည်သူ့ကာကွယ်ရေးတပ်ဖွဲ့ PDF ကိုထောက်ပို့လုပ်ပေးသည်ဟုစွပ်စွဲကာ စစ်ကောင်စီက ဖမ်းဆီးခဲ့ကြောင်း ဆီဆိုင်မြို့ဒေသခံ အသက် ၃၀ နှစ် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ကယားနယ်စပ် ရေဖြူရွာမှာ ရှိတဲ့ တစ်ယောက်က သူ ဆန်သယ်တာ ရပ်ကွက်ထောက်ခံစာ မရှိလို့ဆိုပြီး ဖမ်းသွားတာဗျ။ စားသောက်ဆိုင် ဖွင့်ထားတဲ့တစ်ယောက်ကိုတော့ PDF ကို ဆန်ရောင်းပေးတယ်ဆိုပြီး ဖမ်းသွားတယ်။ ဆိုင်မှာ ဆန်လာဝယ်တဲ့သူက PDF ဟုတ်၊ မဟုတ် ဘယ်လိုသိမှာလဲ။ PDF နဲ့ပတ်သက်ရင် ပြည်သူကို ဖမ်းဖို့ပဲ သူတို့သိတယ် “ ဟု ၎င်းအမျိုးသားတစ်ဦးက ပြောသည်။
ဆီဆိုင်မြို့နယ် ရေဖြူရွာတွင် ဖမ်းဆီးခံရသည့် အမျိုးသားတစ်ဦးမှာ အသက် ၅၀ ကျော် ဦးစိန်မောင်ညွှန့် ဆိုသူဖြစ်ပြီး စားသောက်ဆိုင်ဖွင့်လှစ်ရင်း ဖမ်းဆီးခံရသူ နောက်ထပ်အမျိုးသားတစ်ဦးမှာ အသက် ၄၀ နှစ် ခွန်စိုးဖြူ ဟု သိရသည်။
ထို့အပြင် ဆီဆိုင်မြို့နယ်အတွင်းရှိ ကျေးလက်ဒေသက အိမ်ဈေးဆိုင်များကို စစ်ကောင်စီက ရပ်ကွက်ထောက်ခံချက်၊ ရပ်ကျေးထောက်ခံချက် မရှိသည့်သူများကို ဆန်မရောင်းပေးရန် ညွှန်ကြားခဲ့ကြောင်း သိရသည်။
“ အခု ကျနော်တို့ ရွာဖက်မှာ အိမ်ဈေးဆိုင်ဖွင့်ထားတယ်။ အဲ့လိုဈေးဆိုင်တွေမှာ ဆန်ဝယ်တာကအစ ရပ်ကွက်ထောက်ခံစာ၊ ရပ်ကွက်ထောက်ခံစာပါမှ ရတယ်ဗျ။ အခုနောက်ပိုင်း ဆန်ကို ဒီလို သယ်သွားသယ်လာ လုပ်ဖို့အတွက် အရမ်းခက်ခဲသွားတယ်။ သူတို့ အရမ်းစစ်ဆေးနေတယ်၊ ဆန်သယ်တဲ့သူကို လိုက်တယ်၊ ဖမ်းဆီးနေတယ် “ ဟု ၎င်းအမျိုးသားက ထပ်လောင်းပြောသည်။
စားနပ်ရိက္ခာနှင့် ပတ်သက်ပြီး စစ်ကောင်စီက လိုက်လံဖမ်းဆီးဆောင်ရွက်နေသည့်အတွက် စစ်ရှောင်များအတွက်မှာလည်း စားနပ်ရိက္ခာ ပြတ်လပ်နိုင်ဖွယ်ရာကို အထူးစိုးရိမ်နေသည်ဟု စစ်ရှောင်ကူညီသူ ဒေသခံတစ်ဦးက ပြောသည်။
“ အခုနောက်ပိုင်း အလှူရှင်တွေကလည်း နည်းလာတော့ စားနပ်ရိက္ခာတွေ မလုံမလောက်တာတွေ ရှိလာတယ်ဗျ။ အခုက ဆန်ရောင်း၊ ဆန်ဝယ်တဲ့သူကို စစ်ကောင်စီက လိုက်ဖမ်းနေတော့ ကြာရင် ကျနော်တို့ စစ်ရှောင်တွေ စားနပ်ရိက္ခာ ပြတ်လပ်မှာကို စိုးရိမ်နေရတယ် “ ဟု ၎င်းအမျိုးသားက ပြောသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတဝှမ်းရှိ ပြည်သူ (၂,၇၀၇) ဦး သတ်ဖြတ်ခံရပြီး၊ ပြည်သူ (၁၆,၉၉၂) ဦး ဖမ်းဆီးခံနေရကြောင်း နိုင်ငံရေး အကျဉ်းသားများ ကူညီစောင့်ရှောက်ရေးအသင်းက ယမန်နေ့ (ဇန်နဝါရီ ၆ ) ရက်စွဲ၏ ထုတ်ပြန်ချက်အရ သိရသည်။
