သျှမ်းပြည် တောင်ကြီးခရိုင် ဆီဆိုင်မြို့နယ် ဆိုက်ခေါင်စံပြကျေးရွာ ဆိုက်ခေါင်ဈေးအတွင်း ဖွင့်လှစ်ထားသော ရွှေနဒီရွှေဆိုင် ဓားပြတိုက်ခံရပြီး ရွှေ ၄၀ ကျပ်သားခန့် ပါသွားကြောင်း စုံစမ်း သိရှိရသည်။
ယနေ့ (ဇန်နဝါရီ ၄ ) ရက် နံနက် ၉ နာရီခွဲခန့်တွင် ဆိုက်ခေါင်ဈေးအတွင်းသို့ ဖွင့်လှစ်ထားသော ရွှေနဒီ ရွှေဆိုင်ကို အမည်မသိ အမျိုးသားတစ်ဦးက သေနတ်ထောက်ပြီး ရွှေ ၄၀ ကျပ်သားကို ဓားပြတိုက်သွားကြောင်း ဆိုက်ခေါင်ဒေသခံ အသက် ၂၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိ ပြင်ပအခေါက်ရွှေ ပေါက်ဈေးမှာ ၁ ကျပ်သားလျှင် ၂၇ ကျပ်သိန်းထိ ဈေးနှုန်းမြင့်တက်နေကြောင်း သိရသည်။
“ ရွှေနဒီ ရွှေဆိုင် ဓားပြတိုက်ခံရတာဗျ။ ဒီနေ့က ဈေးနေ့ ဆိုပေမယ့် ဈေးက ၁၀ နာရီမှ ဖွင့်တာ၊ လူသိပ်မများသေးဘူး။ ဓားပြ လာတိုက်တဲ့သူက အမျိုးသား တစ်ယောက်ထဲဗျ။ ဆိုင်ကယ် ဦးထုပ်ဆောင်းပြီး အင်္ကျီလက်ရှည်၊ ဘောင်းဘီရှည် ဝတ်ထားတော့ မျက်နှာမမြင်ဘူး။ ဆိုင်ရှင်ကို သေနတ်နဲ့ ထောက်ပြီး ဓားပြတိုက်သွားတာ။ ရွှေ ၄၀ ကျပ်သားလောက် ပါသွားတယ်လို့ပြောတယ် “ ဟု ၎င်း အမျိုးသားတစ်ဦးက ပြောသည်။
အဆိုပါ ရွှေဆိုင်ဓားပြတိုက်ခံရမှုနှင့် ပတ်သက်ပြီး လက်ရှိမှာ သက်ဆိုင်ရာ ရဲတပ်ဖွဲ့နှင့် ပြည်သူ့စစ်ကို တိုင်ကြားထားကြောင်း သိရသည်။
ထို့အပြင် ဓားပြတိုက်မှု နှင့် ပတ်သက်ပြီး လုံခြုံရေးကို ယခင်ကထက် ပိုမိုတင်းကြပ်သွားသာလျှင် လုံခြုံစိတ်ချရတော့မည်ဟု ဆိုက်ခေါင်ဒေသခံ အသက် ၃၀ ကျော် အမျိုးသားတစ်ဦးက ပြောသည်။
“ ကျနော်တို့တော့ ကြောက်လည်းကြောက်တယ်၊ စိုးလည်း စိုးရိမ်တယ်။ အရင်ကလို ကင်းစောင့်မှ ရတော့မယ်။ မဟုတ်ရင်ဘာမှ လုံခြုံစိတ် မချရဘူး“ ဟု ၎င်း အမျိုးသားတစ်ဦးက ပြောသည်။
ဓားပြတိုက်ခံရသည့် အချိန်တွင် ဆိုက်ခေါင်စံပြကျေးရွာမှာ မီးပျက်နေသည့်အတွက်ကြောင့် CCTV မှတ်တမ်းမရလိုက်ခဲ့ကြောင်း ၎င်းရွှေဆိုင်နှင့် နီးစပ်သူက ပြောသည်။
စစ်အာဏာသိမ်းပြီးနောက်ပိုင်း သျှမ်းပြည်တွင် တရား ဥပဒေ စိုးမိုးမှု မရှိသည့်အတွက် ဒေသခံပြည်သူများသည် မကြာခဏ ခိုးဆိုးလုယက်၊ ဓားပြတိုက်ခံနေရကြောင်း သိရသည်။
Leave a Comments