သျှမ်းပြည် ကျိုင်းတုံခရိုင် မိုင်းယန်းမြို့နယ်ထဲတွင် ရိုးရာဓလေ့ ထုံးတမ်းအရ ကျွဲခတ်ပွဲကို ပြုလုပ်ခဲ့ကြောင်း စုံစမ်း သိရှိရသည်။
ပြီးခဲ့သည့် ဒီဇင်ဘာ ၂၉ ရက်နေ့ကစပြီး မိုင်းယန်းမြို့နယ် မိုင်းလွေကျေးရွာအုပ်စုထဲတွင် ကျွဲခတ်ပွဲကို စတင်ကျင်းပခဲ့ပြီး အဆိုပါ ကျွဲခတ်ပွဲကို မိုင်းလွေကျေးရွာမှ စတင်ကျင်းပပြီးမှ မိုင်းယန်း နှင့် မိုင်ကွယ်ကျေးရွာတွင်လည်း ကျင်းပသွားမည်ဖြစ်ကြောင်း သိရသည်။
အဆိုပါ ကျွဲခတ်ပွဲကို ပြုလုပ်ရခြင်းသည် ကျွဲများ အနာရောဂါမှ ကင်းဝေးစေလိုကြောင်း၊ စိုက်ပျိုးသီးနှံများ ဖြစ်ထွန်းစေလိုကြောင်း ဒေသခံများ ယုံကြည်ချက်ဖြင့် နှစ်စဉ်နှစ်တိုင်း ပြုလုပ်လျက်ရှိကြသည်။
“ ဒေသခံတွေရဲ့ ယုံကြည်ချက်ဆိုရင် ကျွဲခတ်ပွဲကို ၃ နေရာလုပ်ရမှာ၊ မိုင်းလွေကနေ စလုပ်ပြီးတော့ မိုင်းယန်း၊ မိုင်းယန်းပြီးမှ မိုင်းကွယ်ကို သွားလုပ်ရတာ။ ကျွဲခတ်ပွဲလုပ်ရတာက ကျွဲတွေ ရောဂါကင်းဝေးစေဖို့ နဲ့ စိုက်ပျိုးသီးနှံတွေဖြစ်ထွန်းဖို့ဆိုပြီး ယုံကြည့်ချက်နဲ့ တစ်နှစ်တစ်ခါ စည်ကားပြုလုပ်ကြတယ်” ဟု စိုင်းလိန်ခမ်းက ပြောသည်။
အဆိုပါ ကျွဲခတ်ပွဲကိုလည်း ကိုဗစ်- ၁၉ ကြောင့် ၃ နှစ်ခန့် မကျင်းပခဲ့ရပဲ ယခုနှစ်မှ ပြန်လည် ကျင်းပ နိုင်ခဲ့ကြောင်းသိရသည်။
သို့သော် ယခုနှစ်တွင်လည်း မိုင်းလွေကျေးရွာထဲတွင်သာ ကျင်းပနိုင်ခဲ့ပြီး ကျန်ရှိနေသည့် မိုင်းယန်း နှင့် မိုင်းကွယ်ကျေးရွာတွင် ကိုဗစ် -၁၉ ကြောင့် မကျင်းပနိုင်သေးပေ။
မိုင်းလွေကျေးရွာထဲတွင် ပြုလုပ်ခဲ့သည့် ကျွဲခတ်ပွဲသည် ကျွဲအကောင် ၂၀ ထက် မနည်းပါဝင် ယှဉ်ပြိုင်ခဲ့ကြောင်း သိရသည်။ တစ်နှစ်တစ်ခါ ကျင်းပရာတွင်လည်း ရပ်နီးရပ်ဝေး ပြည်သူများက လာရောက်လည်ပတ်လေ့ရှိကြောင်း စိုင်းလိန်ခမ်းက ပြောသည်။
“ ကျွဲခတ်ပွဲကို မလုပ်ရတာ ၃ နှစ်လောက်တော့ ရှိနေပြီထင်တယ်။ ကိုဗစ်ကြောင့် မလုပ်ရတာ။ ဒီနှစ်လည်း မိုင်းလွေမှာပဲ လုပ်ရသေးတယ်။ ကျန်တဲ့နေရာတွေက ကိုဗစ် ကြောင့် နဲ့ မလုပ်နိုင်သေးဘူး။ ဘယ်တော့ ပြန်လုပ်နိုင်မလဲဆိုတာလည်း မပြောတတ်သေးဘူး” ဟု ၎င်းက ပြောသည်။
ဒေသခံများ ယုံကြည်ချက်အရ တစ်နှစ်ကို ကျွဲခတ်ပွဲ ၁၅ ရက် ကျင်းပပြုလုပ်သွားလျက်ရှိကြောင်း သိရသည်။ အဆိုပါ ၁၅ ရက်တွင် ၅ ရက် တစ်ကြိမ် ကျွဲခတ်ပွဲကို ပြုလုပ်သွားကြောင်း သိရသည်။
Leave a Comments