သျှမ်းပြည် လောက်ကိုင်ခရိုင် လောက်ကိုင်မြို့တွင်းတွင် လွတ်လပ်ရေးနေ့ အကြို အနေဖြင့် စစ်ကောင်စီမှ စစ်အင်အား လှည့်ပတ် ပြသမှုကြောင့် ပြည်သူများ ထိတ်လန့်နေကြောင်း သတင်းသိရသည်။

ပြီးခဲ့သည့် ဒီဇင်ဘာလ ၂၄ ရက်မှ စတင်ကာ လောက်ကိုင်မြို့ အတွင်းတွင် လွတ်လပ်ရေးအတွက် အလံတိုင် စိုက်ထူခြင်းများ စတင်ပြုလုပ်ခဲ့ပြီး ဒီဇင်ဘာ ၃၀ ရက်မှ စတင်ကာ စစ်သားအင်အားက မြို့တွင်း လှည့်ပတ်နေ ကြောင်း သိရသည်။

“အလံတိုင်တွေတော့ တမြို့လုံးနီးပါး အပြည့်ပေါ့၊ စိန်ရတုနှစ်မြောက်တဲ့ လွတ်လပ်ရေးနေ့ အတွက် ဆိုလားပဲ၊ ပြီးတော့ နေရာတိုင်းမှာလည်း စစ်သားတွေ လုံခြုံရေးယူထားတယ်၊ စစ်သားတွေ အပြည့်ပါတဲ့ စစ်ကား ၁၀ စီး ၊ စစ်သား ၁၅၀ လောက်လည်း မြို့ထဲကို နေ့တိုင်းပတ်နေတယ်” ဟု လောက်ကိုင်မြို့မှ အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

လောက်ကိုင်မြို့တွင်း စစ်အင်အား ပြသမှုများတွင် စစ်သားများ စစ်ကားများအပြင် သံချပ်ကာ ကားများလည်း လိုက်ပါ လှည့်ပတ်ကြောင်း ၊ စစ်အင်အား ပြသမှုများကြောင့် ပြည်သူများက စိတ်အနှောင့်အယှက်ဖြစ်ရသည့်အပြင် ကြောက်လန့်မှုလည်း ကြုံတွေ့နေရကြောင်း ၎င်း အမျိုးသားက ပြောသည်။

“အရေးအကြောင်းရှိလို့ အပြင်ထွက်ရင်လည်း သူတို့ စစ်ယာဉ်တန်းနဲ့ တွေ့ရင် ထင်သလောက် သွားလို့ မရဘူး၊ နှေးတာပေါ့၊ ကျော်ပြီးလည်း မသွားရဲဘူးလေ၊ စစ်သားဆိုတာနဲ့လည်း ကြောက်နေရတယ်” ဟု အထက်ပါ ပုဂ္ဂိုလ် က သျှမ်းသံတော်ဆင့်ကို ပြောသည်။

လက်ရှိတွင် လောက်ကိုင်မြို့အတွင်း၌ စစ်သားများ နေရာအနှံ့ လုံခြုံရေး ယူထားသည့်အပြင် မနက် ၁၀ နာရီ ဝန်းကျင်မှ မွန်းလွဲ ၁ နာရီကျော်အထိ စစ်အင်အား လှည့်ပတ်ပြသမှုများကြောင့် သွားလာရေးအတွက် ခက်ခဲနေကြောင်း သိရသည်။

လောက်ကိုင်မြို့သည် ပြီးခဲ့သည့် ဒီဇင်ဘာလ အစပိုင်းမှာလည်း မြို့တွင်းတိုက်ပွဲဖြစ်ပွားမည့်သတင်း ပျံ့နှံ့မှု ကြောင့် စိုးရိမ်ကြောက်လန့်မှုများဖြင့် နေရပ်ပြန်သူ အများအပြား ရှိလာပြီး အငှားယာဉ်များ ပြတ်လပ်သည် အထိ ဖြစ်ခဲ့ရသည်။

လာမည့် ဇန်နဝါရီလ ၄ ရက်နေ့သည် ၇၅ နှစ်မြောက် စိန်ရတု လွတ်လပ်ရေးအခမ်းအနားနေ့ ဖြစ်သည်။