သျှမ်းပြည် မူဆယ်ခရိုင် ၊ မူဆယ်မြို့နယ်ထဲတွင် စစ်ကောင်စီက အင်တာနက်လိုင်းများကို ဖြတ်တောက် ထားသောကြောင့် ပြည်သူများ အချင်းချင်းကြား အဆက်သွယ်ပျက်နေပြီး ငွေလွှဲ၊ ငွေထုတ် ရန်အတွက် ခက်ခဲနေကြောင်း စုံစမ်းသိရှိရသည်။

အဆိုပါ မူဆယ်မြို့နယ်တွင် အင်တာနက်လိုင်းကို စစ်ကောင်စီပိုင် Mytel တစ်ခုတည်းသာ ရရှိနေကြောင်း၊ ပြည်သူများ Mytel ကို မဝယ်သုံးသည့် အတွက်ကြောင့် ခက်ခဲနေကြောင်း မူဆယ်မြို့ ဒေသခံများကပြောသည်။

“ ကျနော်တို့ လုပ်ဖော်ကိုင်ဖက်တွေ အချင်းချင်းကြား အဆက်သွယ်တွေ ပျက်နေတာ။ အလုပ်လုပ်ရတာလည်း ခက်တယ်။ ကျနော်တို့က အင်တာနက်ကို အဓိက အားထားပြီး ငွေလွှဲ၊ ငွေထုတ်တွေ လုပ်ရတာလေ။ ပြီးတော့ အင်တာနက်လိုင်းကောင်းကောင်း ရချင်ရင် Mytel ပဲရတာ။ စစ်ကောင်စီ ပိုင်ဆိုတော့ ကျနော်တို့က မဝယ်သုံးချင်ဘူး” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။

လက်ရှိ မူဆယ်မြို့နယ် နှင့် နမ့်ခမ်းမြို့နယ်တို့တွင် MPT ဖုန်းလိုင်းအတွက် အင်တာနက် ရရှိသော်လည်း 3G သာရရှိသောကြောင့် လိုင်းမကောင်းသည့်အတွက် အလုပ်လုပ်ကိုင်၍ မရကြောင်း၊ တစ်ခြား ဖုန်းလိုင်းများဖြစ်သည့် တယ်လီနော် နှင့် အော်ရီဒူး တို့က ဖုန်းလိုင်း နှင့် အင်တာနက်လိုင်း လုံးဝ မရရှိထားကြောင်း သိရသည်။

“ တယ်လီနော် နဲ့ အော်ရီဒူး ကတော့ လုံးဝမရသေးဘူး။ MPT က အင်တာနက်တော့ရတယ်။ 3G ပဲရတယ်။ လိုင်းမကောင်းဘူး။ လိုင်းကောင်းချင်ရင် ည ၁၂ နာရီ လောက်မှ လိုင်းကောင်းတာ။ နေ့ပိုင်းတွေမှာ သုံးလို့မရဘူး။ စာပဲပို့လို့ရတာ။ အင်တာနက်မရှိတော့ ငွေတွေလွှဲရတာ သိပ်အဆင်မပြေဘူးပေါ့” ဟု မူဆယ်မြို့ ကုန်စုံဆိုင်ဖွင့်ထားသည့် ဆိုင်ရှင်တစ်ဦးက ပြောသည်။

မူဆယ်မြို့နယ် နှင့် နမ့်ခမ်းမြို့နယ်တွင် အင်တာနက်လိုင်းကို ဒီဇင်ဘာ ၂၀ ရက်မှစပြီး ပိတ်ထားလိုက်သည့် အတွက်ကြောင့် ပြန်ဖွင့်ပေးရန်အတွက် ပြည်သူများက တောင်းဆိုကြသည်။

အဆိုပါ အင်တာနက်လိုင်းကို ပိတ်ထားရခြင်းသည် စစ်ကောင်စီက တရုတ်နိုင်ငံမှ ထွက်လာသည့် ကုန်တင်ကားများကို စစ်ဆေးရန်အတွက်ဖြစ်ကြောင်း ဒေသခံများထံသိရသည်။

မူဆယ်မြို့သည် မြန်မာ – တရုတ် ကုန်သွယ်ရေးဇုန် ရှိသည့်ဒေသဖြစ်သည့်အလျောက် လက်နက်ကိုင် အဖွဲ့အစည်း အများအပြား သွားလာလှုပ်ရှားသည့် ဒေသဖြစ်သည်။