သျှမ်းပြည်မြောက်ပိုင်း ကွတ်ခိုင်မြို့ နှင့် တာမိုးညဲကြား ပြည်ထောင်စု ကားလမ်းမပေါ်တွင် ခရီးသည်တင်ကား တစ်စီးဓားပြတိုက်ခံရပြီး အမျိုးသား ၂ ဦး ပစ်သတ်ခံရကြောင်း စုံစမ်းသိရှိရသည်။
ပြီးခဲ့သည့် ဒီဇင်ဘာလ ၃၀ ရက် နေ့လည်ပိုင်း ၂ နာရီခွဲ ဝန်းကျင်က ကွတ်ခိုင်- တာမိုးညဲကြား မော်ဟန်ရွာအနီးတွင် ခရီးသည်တင်ကားတစ်စီး ဓားပြတိုက်ခံရပြီး ယာဉ်မောင်းသူ အမျိုးသားတစ်ဦး နှင့် ၎င်းသူငယ်ချင်း ၁ ဦးတို့ လက်ပြန်ကြိုးတုတ် ပစ်သတ်ခံရကြောင်း ကွတ်ခိုင်မြို့ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့ ၂ ယောက်က ကွတ်ခိုင်မြို့ကနေ တာမိုးညဲကို ခရီးသည်တင်ဆောင်သွားတာ၊ ဓားပြအဖွဲ့က ကားကို ဓားပြတိုက်သွားပြီး ယာဉ်မောင်းအမျိုးသား ၂ ဦးကို လက်ပြန်ကြိုးတုတ်ပြီး သတ်သွားတာဗျ။ ဒဏ်ရာကတော့ သေနတ်ပစ်သတ်ခံထားရတယ် “ ဟု ၎င်း အမျိုးသားတစ်ဦးက ပြောသည်။
အဆိုပါ လက်ပြန်ကြိုးတုတ် သေနတ်ပစ်သတ်ခံရသည့် အမျိုးသား၂ ဦးမှာ အသက် (၂၄) နှစ်ဝန်းကျင်ရှိ ယာဥ်မောင်း နှင့် အသက် ၁၉ နှစ်အရွယ်ရှိ ၎င်း၏ သူငယ်ချင်း ဖြစ်ကြပြီး ၎င်းအမျိုးသား ၂ ဦး က ကွတ်ခိုင်မြို့တွင်နေထိုင်သည့် သူများဖြစ်ကြောင်းသိရသည်။
“ အခု ကာလက နိုင်ငံရေး အခြေနေ မကောင်းတာနဲ့ ညဘက် ကားမောင်းရင် မသိတဲ့သူ၊ သူစိမ်းတွေကို ကားပေါ် ခေါ်မတင်ပါနဲ့ သတိထားပါ။ အခုက ပြောလို့မရဘူး၊ အခုသတ်ခံရတဲ့ အမျိုးသား ၂ ဦးဆိုလည်း ကွတ်ခိုင်မြို့ကနေ တာမိုးညဲကို လိုက်ပါစီးသွားတဲ့ ခရီးသည်က ဓားပြတိုက်သွားတယ်လို့ ကြားရတယ်“ လို့ ကွတ်ခိုင်မြို့မှ ဒေသခံ အမျိုးသားက ဆိုသည်။
ကွတ်ခိုင်မြို့နယ်သည် တိုင်းရင်းသား လက်နက်ကိုင်များဖြစ်ကြသော တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) ကချင်လွတ်မြောက်ရေး တပ်မတော် ( KIA)၊ စစ်ကောင်စီ နှင့် စစ်ကောင်စီ လက်အောက်ခံ ပြည်သူ့စစ်များ လှုပ်ရှားရာ နယ်မြေဖြစ်ပြီး မကြာခဏ တိုက်ပွဲဖြစ်ပွားရာ နယ်မြေလည်း ဖြစ်သည်။
ထို့အပြင် ကွတ်ခိုင်မြို့နယ်အတွင်းတွင် လောင်းကစားဝိုင်းများ၊ မူးယစ်ဆေးများပေါ်တင် ဖွင့်လှစ်ရောင်းချသည့် နယ်မြေဖြစ်သည့်နေရာဖြစ်သည်။
အဆိုပါ လူသတ်မှုခင်းနှင့် ပတ်သက်ပြီး ပြစ်မှုကျူးလွန်သူများကို သက်ဆိုင်ရာ ရဲတပ်ဖွဲ့အပြင် လက်နက်ကိုင်များက လိုက်လံ ဖမ်းဆီးဆောင်ရွက်ပေးခြင်း မရှိကြောင်း သိရသည်။
